దారుణం.. కరోనా రోగిపై మేల్ నర్స్ అత్యాచారం.. 24 గంటల్లో మహిళ మృతి

కరోనా బారినపడి చికిత్స పొందుతున్న మహిళపై ఓ కామాంధుడు దారుణానికి తెగబడ్డాడు. కోవిడ్ బాధితురాలిపై నర్సు అత్యాచారానికి పాల్పడగా.. ఆమె 24 గంటల్లో ప్రాణాలు కోల్పోయిన దురదృష్టకర ఘటన మధ్యప్రదేశ్ రాజధాని భోపాల్ ఆస్పత్రిలో చోటుచేసుకుంది. ఈ షాకింగ్ ఘటన నెల రోజుల తర్వాత వెలుగులోకి రావడంతో అనుమానితుడ్ని పోలీసులు గురువారం అరెస్ట్ చేశారు. పోలీసులకు చేసిన ఫిర్యాదు ప్రకారం.. కోవిడ్ సోకిన ఓ 43 ఏళ్ల మహిళ ఏప్రిల్ 6న చికిత్స కోసం భోపాల్ మెమోరియల్ హాస్పిల్ అండ్ రిసెర్చ్ సెంటర్‌లో చేరింది. కోవిడ్ వార్డులో చికిత్స పొందుతున్న ఆమెపై మగ నర్సు అత్యాచారానికి పాల్పడ్డాడు. ఈ ఘటన తర్వాత ఆమె పరిస్థితి విషమించడంతో ఐసీయూలోకి చేర్పించారు. అయితే, అదే రోజు రాత్రి ఆమె అక్కడ చికిత్స పొందుతూ మృతిచెందింది. ఈ ఘటనపై నిషాత్‌పుర పోలీస్ స్టేషన్‌లో కేసు నమోదుకాగా... నిందితుడ్ని సంతోష్ అహిర్‌వార్ అనే మగ నర్సుగా గుర్తించారు. నిందితుడిని అరెస్ట్ చేసి భోపాల్ సెంట్రల్ జైలుకు తరలించారు. పోలీసులకు ఫిర్యాదు చేసిన బాధితురాలు.. ఈ ఘటన గురించి, తన వివరాలను ఎవ్వరికీ వెల్లడించవద్దని కోరిందని సీనియర్ పోలీస్ అధికారి ఇర్షాద్ వలీ తెలిపారు. అందుకే ఈ వివరాలను దర్యాప్తు టీమ్‌కు తప్పా బయటకు వెల్లడించలేదన్నారు. విశ్వసనీయ వర్గాల సమాచారం ప్రకారం నిందితుడు గతంలో సహోద్యోగినిపై లైంగిక వేధింపులకు పాల్పడటం, విధుల్లో ఉండగా మద్యం సేవించినట్టు ఆరోపణలు ఎదుర్కొంటున్నాడు. చనిపోయిన మహిళ 1984 భోపాల్ గ్యాస్ విషాదంలో ప్రాణాలతో బయటపడింది. దీంతో విపత్తు బాధితుల సంఘం భోపాల్ మెమోరియల్ హాస్పిటల్ రిసెర్చ్ సెంటర్‌లో ‘కోవిడ్ వార్డుల్లోని బాధితుల దయనీయ పరిస్థితిని’ వివరిస్తూ అధికారులకు ఘాటుగా లేఖ రాసింది. ‘ఈ ఘోరాన్ని కప్పిపుచ్చడానికి BMHRC యాజమాన్యం తన శక్తియుక్తులను ఉపయోగించి ప్రతిదీ చేసింది.. అత్యాచార బాధితురాలి కుటుంబానికి సంఘటన గురించి కూడా తెలియకపోవడానికి ఇది ఓ కారణం’’ అని దుయ్యబట్టింది. ఆమె మరణంపై దర్యాప్తు చేపట్టాలని, కోవిడ్ వార్డుల్లో సీసీటీవీ కెమెరాలను అమర్చాలని డిమాండ్ చేసింది. లైంగిక నేరాలకు పాల్పడినవారిని ఆస్పత్రుల్లో నియమించవద్దని సూచించింది.

By May 14, 2021 at 08:14AM

Read More https://telugu.samayam.com/latest-news/crime/covid-patient-raped-by-nurse-in-hospital-died-in-24-hours-in-madhya-pradesh-bhopal/articleshow/82623460.cms