విషాదం: ఆస్పత్రిలో ఆక్సిజన్ కొరతతో 24 మంది మృతి.. అంతా 30-40 ఏళ్లలోపువారే

దేశంలో కరోనా వైరస్ విలయం కొనసాగుతోంది. గడచిన వారం పది రోజులుగా రోజుకు మూడు లక్షలకుపైగా కేసులు బయటపడుతున్నాయి. మరణాలు కూడా 3 వేలు దాటుతున్నాయి. కోలుకున్నవారి కంటే కొత్తగా వైరస్ నిర్ధారణ అవుతున్న వారి సంఖ్య ఎక్కువగా ఉంటోంది. దీంతో ఆస్పత్రుల్లో బెడ్స్, ఆక్సిజన్‌కు తీవ్ర కొరత ఏర్పడి రోజూ డజన్ల కొద్దీ ప్రాణాలు కోల్పోతున్నారు. దేశ రాజధాని ఢిల్లీ, మహారాష్ట్ర, మధ్యప్రదేశ్ సహా పలు రాష్ట్రాల్లో ఆక్సిజన్ అందక బాధితుల ప్రాణాలు అనంత వాయువుల్లో కలిసిపోతున్నాయి. తమ కళ్లేదుటే విగతజీవులుగా మారుతుంటే వైద్యులు నిస్సాహయ స్థితిలో ఉండిపోతున్నారు. ఇలాంటి పరిస్థితి చూడలేక ఢిల్లీలో ఓ యువ వైద్యుడు నిరాశతో ఆత్మహత్యకు పాల్పడ్డాడు. దేశంలో తీవ్రంగా వేధిస్తోంది. ఈ ఇబ్బందులను అధిగమించడానికి కేంద్ర ప్రభుత్వం యుద్ధ ప్రాతిపదికన చర్యలు చేపట్టింది. ఇదే విషయంలో సుప్రీంకోర్టు సహా పలు హైకోర్టులు సుమోటాగా స్వీకరించి విచారణ జరుపుతున్నాయి. సకాలంలో వైద్యసేవలు అందక నిండు ప్రాణాలు హరించుకుపోతున్నాయి. తాజాగా, కర్ణాటకలోని ఓ ఆస్పత్రిలో ఆక్సిజన్ అందక 24 మంది ప్రాణాలు కోల్పోయారు. ఈ హృదయవిదారక ఘటన చామరాజనగర్ జిల్లా ఆస్పత్రిలో చోటుచేసుకుంది. వీరిలో కోవిడ్ బాధితులతోపాటు సాధారణ రోగులు కూడా ఉననట్టు స్థానికులు తెలిపారు. ఆదివారం ఉదయం నుంచి సోమవారం ఉదయం వరకు ఆక్సిజన్ అందక 24 మంది ప్రాణాలు కోల్పోయినట్టు చామరాజనగర్ డిప్యూటీ కమిషనర్ డాక్టర్ ఎంఆర్ రవి తెలిపారు. అయితే, వైద్యులు మాత్రం ఆక్సిజన్ కొరతతో 12 మంది చనిపోయారని, మిగతావారు ఇతర అనారోగ్య కారణాలతో చనిపోయారన్నారు. ఆస్పత్రిలో ఆదివారం రాత్రి నుంచి ఆక్సిజన్ కొరతతో సరఫరా నిలిచిపోవడం దురదృష్టకరం. ఆస్పత్రిలో 6,000 లీటర్ల సామర్ధ్యం ఉన్న ఆక్సిజన్ ప్లాంట్‌లో రోజున్నరకు సరిపడే నిల్వ ఉండటం.. అది సాయంత్రానికి ఖాళీ అయ్యింది. ఆక్సిజన్ అందక తమవారు చనిపోవడంతో ఆస్పత్రి వద్దకు భారీగా చేరుకున్న కుటుంబసభ్యులు, బంధువులు అక్కడ ఆందోళనకు దిగారు. అధికారుల నిర్లక్ష్యం వల్లే ఇలా జరిగిందని ఆగ్రహం వ్యక్తం చేశారు. చనిపోయినవారిలో చాలా మంది 30-40 ఏళ్లలోపు వారే కావడం బాధాకరం.

By May 03, 2021 at 01:15PM

Read More https://telugu.samayam.com/latest-news/india-news/without-oxygen-24-people-die-in-chamarajanagara-district-of-karnataka/articleshow/82367595.cms