Vakeel Saab: ఏప్రిల్ నెలపై పవన్ ఫ్యాన్స్లో టెన్షన్.. గతంలో ఇదీ పరిస్థితి! రీ- ఎంట్రీ కలిసొచ్చేనా..?
పవర్స్టార్ పవన్ కళ్యాణ్కు తెలుగు రాష్ట్రాల్లో ఏ రేంజ్లో క్రేజ్ ఉందో అందరికీ తెలిసిందే. హిట్, ఫ్లాప్లతో సంబంధం లేకుండా పవన్ సినిమా విడుదల అవుతుందంటే చాలు.. అభిమానులు చేసే సందడి పీక్స్లో ఉంటుంది. అయితే రాజకీయలపై పూర్తిస్థాయిలో దృష్టి కేంద్రీకరించాలనే ఉద్దేశ్యంతో పవన్ కళ్యాణ్ ‘అజ్ఞాతవాసి’ తర్వాత సినిమాలకు దూరమయ్యారు. దాదాపు మూడు సంవత్సరాల తర్వాత పవన్ హిందీలో భారీ హిట్ సాధించిన ‘పింక్’ సినిమా రీమేక్గా తెరకెక్కిన ‘’ అనే సినిమాతో టాలీవుడ్లోకి రీఎంట్రీ ఇస్తున్నారు. ఈ సినిమా శుక్రవారం(ఏప్రిల్ 9న) విడుదల అవుతుంది. ఇప్పటికే విడుదలైన ఈ సినిమా ట్రైలర్, టీజర్, పాటలు సినిమాపై భారీగా అంచనాలను పెంచేశాయి. తెలుగు రాష్ట్రాలతో పాటు విదేశాల్లోనూ ఈ సినిమాకు మంచి ఓపెనింగ్స్ వచ్చే అవకాశం ఉంది. అయితే గతంలో పవన్ నటించిన పలు సినిమాలు ఏప్రిల్ నెలలో విడుదల అయ్యాయి. అందులో కొన్ని సూపర్ హిట్లు అవ్వగా.. కొన్ని డిజాస్టర్లు అయ్యాయి. ఆ సినిమాలు ఏంటో ఒకసారి పరిశీలిద్దాం. బద్రి: పవన్కళ్యాణ్ హీరోగా.. దర్శకుడు పూరి జగన్నాథ్ను తెలుగు తెరకు పరిచయం చేసిన చిత్రం ‘బద్రి’. ఏప్రిల్ 20, 2000న విడుదలైన ఈ సినిమా సూపర్ హిట్ అయింది. ఈ సినిమాలో విలన్గా నటించిన ప్రకాశ్ రాజ్ క్యారెక్టర్ పేరు నంద.. మరోసారి వకీల్సాబ్లో ప్రకాశ్ రాజ్ పాత్ర పేరు అదే కావడం విశేషం. ఖుషీ: కెరీర్లో ఖుషీ సినిమాని ఓ మైలురాయి అని చెప్పుకోవచ్చు. పవన్ కళ్యాణ్ ఎస్.జే.సూర్య దర్శకత్వంలో తెరకెక్కిన ఈ సినిమా ఏప్రిల్ 21, 2001న విడుదలై బ్లాక్బస్టర్గా నిలిచింది. జాని: అప్పటి వరకూ హీరోగా కెరీర్ అద్భుతంగా సాగుతుండగా.. పవన్ తన దృష్టిని డైరెక్షన్ వైపు మలిపిన చిత్రం ‘జాని’. గీతా ఆర్ట్స్ బ్యానర్పై అల్లు అరవింద్ నిర్మించిన ఈ చిత్రం ఏప్రిల్ 23, 2003న విడుదలై.. అట్టర్ ఫ్లాప్ అయింది. ఈ సినిమాతో పవన్కు వరుసగా ఫ్లాప్లు మొదలయ్యాయి. జల్సా: వరుస ఫ్లాపులతో సతమతమవుతున్న పవన్కళ్యాణ్కు కాస్త ఉపశమనం కల్పించిన చిత్రం ‘జల్సా’. పవన్ - త్రివిక్రమ్ శ్రీనివాస్ కాంబినేషన్లో తెరకెక్కిన తొలి సినిమా ఇది. ఏప్రిల్ 2, 2008న విడుదలైన ఈ సినిమా బాక్సాఫీస్ వద్ద భారీ విజయం సాధించింది. తీన్ మార్: బాలీవుడ్లో సూపర్ హిట్ సాధించిన ‘లవ్ ఆజ్ కల్’ సినిమా రీమేక్గా పవన్, జయంత్ సీ పరాన్జీ కాంబినేషన్లో తెరకెక్కిన సినిమా ‘తీన్ మార్’. బండ్ల గేణేశ్ నిర్మాణంలో తెరకెక్కిన ఈ సినిమా ఏప్రిల్ 14, 2011న విడుదలై.. అట్టర్ ఫ్లాప్ అయింది. సర్దార్ గబ్బర్సింగ్: పదేళ్లపాటు భారీ సక్సెస్ అందుకొని పవర్స్టార్ పవన్కళ్యాణ్కు సూపర్హిట్ను అందించి మళ్లీ ఫామ్లోకి తెచ్చిన సినిమా గబ్బర్ సింగ్. ఆ సినిమా సీక్వెల్గా కే.ఎస్.రవీంద్ర(బాబీ) దర్శకత్వంలో తెరకెక్కిన సినిమా ‘సర్దార్ గబ్బర్సింగ్’. ఈ సినిమాకి పవన్ కథ కూడా అందించాడు. దీంతో భారీ అంచనాల నడుమ విడుదలైన ఈ సినిమా డిజాస్టర్ అయింది. ఇవీ ఇప్పటివరకూ ఏప్రిల్ నెలలో విడుదలైన పవన్ సినిమాల ఫలితాలు. ఇప్పటివరకూ ఏప్రిల్లో పవన్కు హిట్లు, ఫ్లాపులు 50-50 శాతంతో సమానంగా ఉన్నాయి. దీంతో ఏప్రిల్ నెలలో పవన్ ట్రాక్ రికార్డు చూసిన అభిమానుల్లో టెన్షన్ నెలకొంది. తమ హీరోకి ‘వకీల్సాబ్’ సినిమాతో రీ ఎంట్రీ కలిసొస్తుందా.. లేదా.. అని వాళ్లు కంగారు పడుతున్నారు. ఈ కంగారుకు చెక్ పడాలంటే.. శుక్రవారం వరకూ వేచి ఉండాల్సిందే.
By April 08, 2021 at 02:09PM
No comments