గుడ్ న్యూస్.. Sputnik Vకి డీసీజీఐ అనుమతి.. అందుబాటులోకి మూడో టీకా

దేశంలో కరోనా వైరస్ మహమ్మారి విజృంభణ కొనసాగుతున్న వేళ.. ఊరటనిచ్చేలా మరో కరోనా టీకా అందుబాటులోకి వచ్చింది. ఇప్పటికే కొవాగ్జిన్, కొవీషిల్డ్‌ వ్యాక్సిన్లు వినియోగిస్తుండగా.. రష్యన్ టీకా స్పుత్నిక్‌-వికి ఆమోదం లభించింది. అత్యవసర వినియోగం కింద ఈ వ్యాక్సిన్‌కు డ్రగ్స్ కంట్రోలర్ జనరల్ ఆఫ్ ఇండియా (డీసీజీఐ) ఆమోదం తెలిపింది. తాము అభివృద్ధి చేసిన వ్యాక్సిన్‌కు భారత్ ఆమోదం తెలిపిందని రష్యన్ డైరెక్ట్ ఇన్వెస్టిమెంట్ ఫండ్ (ఆర్డీఐఎఫ్) ఓ ప్రకటనలో వెల్లడించింది. రెండు డోస్‌ల స్పుత్నిక్-వీకి ఆమోదం తెలిపిన 60వ దేశంగా భారత్ నిలిచిందని పేర్కొంది. దీంతో ప్రపంచవ్యాప్తంగా అత్యధిక దేశాలు ఆమోదించిన వ్యాక్సిన్ల దేశాల్లో రెండో స్థానంలో ఉందని వివరించింది. రష్యా అభివృద్ధి చేసిన స్పుత్నిక్-వి వ్యాక్సిన్ భారత్‌లో తయారీకి డాక్టర్ రెడ్డీస్ సంస్థ ఒప్పందం కుదుర్చుకుంది. దేశంలో రెండు, మూడో దశ క్లినికల్ ట్రయల్స్ ఈ సంస్థ ఆధ్వర్యంలోనే కొనసాగుతున్నాయి. ఈ టీకా అత్యవసర వినియోగానికి అనుమతి కోరుతూ ఫిబ్రవరి 19న రెడ్డీస్ ల్యాబొరేటరీ దరఖాస్తు చేసింది. డాక్టర్ రెడ్డీస్ సమర్పించిన నివేదికను అధ్యయనం చేసిన సెంట్రల్ డ్రగ్స్ స్టాండర్డ్ కంట్రోల్ నిపుణుల కమిటీ.. స్పుత్నిక్-వీ అత్యవసర వినియోగానికి సమ్మతించింది. డీసీజీఐకి సిఫార్సు చేయడంతో అక్కడ అనుమతి లభించింది. ఇదిలా ఉండగా, దేశంలో కోవిడ్ వ్యాక్సినేషన్ ప్రక్రియ శరవేగంగా సాగుతోంది. జనవరి 16న వ్యాక్సినేషన్ ప్రారంభించగా.. ఇప్పటి వరకూ 10.85 కోట్ల మందికి టీకాను అందజేశారు. అయితే, డోస్‌లు కొరతతో కొన్ని చోట్ల టీకా కేంద్రాలను మూసివేశారు. తాజాగా, స్పుత్నిక్-వీ అందుబాటులోకి రానుండటంతో కొంతమేర ఉపశమనం లభిస్తుంది.

By April 13, 2021 at 10:33AM

Read More https://telugu.samayam.com/latest-news/india-news/dcgi-approves-russias-sputnik-v-for-use-indias-third-covid-vaccine/articleshow/82043840.cms