దేశంలో కరోనా ప్రళయం.. కేసులు, మరణాల్లో సరికొత్త రికార్డు, ఆ రాష్ట్రాల్లో మరీ దారుణం

దేశంలో కరోనా మహమ్మారి అడ్డూఅదుపు లేకుండా చెలరేగిపోతోంది. ఈ వైరస్ సృష్టిస్తున్న ప్రళయానికి యావత్‌ భారతావని వణికిపోతోంది. సెకండ్ వేవ్‌లో రెట్టింపు వేగంతో విస్తరిస్తున్న కరోనాను ఎలా కట్టడి చేయాలో అర్ధంగాక కేంద్ర, రాష్ట్ర ప్రభుత్వాలు తలలు పట్టుకున్నాయి. తాజాగా మంగళవారం ఒక్కరోజే దాదాపు 3లక్షల మంది కరోనా బారిన పడ్డారంటేనే పరిస్థితి ఎంత ఘోరంగా ఉందో అర్ధం చేసుకోవచ్చు. గడిచిన 24 గంటల్లో దేశవ్యాప్తంగా 2.95లక్షల కేసులు నమోదైనట్లు అధికారులు ప్రకటించారు. కరోనా దేశంలోకి ప్రవేశించిన తర్వాత ఈ స్థాయిలో కేసులు నమోదవడం ఇదే తొలిసారి. అదే సమయంలో 2023 మందిని కరోనా బలి తీసుకుంది. దేశంలో రోజువారీ మరణాలు 2వేలు దాటడం కూడా ఇదే తొలిసారి. మంగళవారం ఉదయం 8 గంటల నుంచి బుధవారం ఉదయం 8 గంటల వరకు దేశవ్యాప్తంగా 16,39,357 మందికి కొవిడ్‌ పరీక్షలు నిర్వహించగా.. 2,95,041 మందికి పాజిటివ్‌ అని తేలింది. దీంతో దేశంలో మొత్తం కేసుల సంఖ్య 1,56,16,130కి చేరింది. ఇదే సమయంలో కొవిడ్‌తో 2023 మంది ప్రాణాలు కోల్పోయారు. దీంతో దేశంలో కరోనా మృతుల సంఖ్య 1,82,553కి చేరింది. మరణాల రేటు 1.18శాతంగా కొనసాగుతోంది. మహారాష్ట్రలో అత్యధికంగా 519 మంది మరణించగా, దిల్లీలో 277, ఉత్తరప్రదేశ్‌లో 162 మరణాలు సంభవించాయి. తాజాగా 1,67,457 మంది కరోనా నుంచి కోలుకున్నారు. దీంతో ఇప్పటివరకు 1,32,76,039 మంది వైరస్‌ను జయించినట్లయింది. రికవరీ రేటు 85.56శాతంగా ఉంది. ప్రస్తుతం దేశంలో యాక్టివ్ కేసుల సంఖ్య 21,57,538కి చేరుకుంది. కరోనా సెకండ్‌ వేవ్‌తో పలు రాష్ట్రాలు అల్లాడుతున్నాయి. ముఖ్యంగా మహారాష్ట్రలో గతేడాది కంటే మించిన కేసులు, మరణాలు సంభవిస్తున్నాయి. దీంతో ఆ రాష్ట్రవ్యాప్తంగా పూర్తిస్థాయి లాక్‌డౌన్ విధించేందుకు అక్కడి సర్కార్ నిర్ణయించింది. మహారాష్ట్ర తర్వాత ఉత్తరప్రదేశ్‌, దిల్లీ, కర్ణాటకల్లో రోజువారీ కేసుల సంఖ్య రికార్డుస్థాయిలో నమోదవుతున్నాయి. తాజా కేసుల్లో అత్యధికంగా మహారాష్ట్రలో 62,097, యూపీలో 29,754, దిల్లీలో 28,395, కర్ణాటకలో 21,794 కొత్త కేసులు నమోదయ్యాయి. తెలంగాణలో 6,542 కొత్త కేసులు నమోదు కాగా.. 20 మంది ప్రాణాలు కోల్పోయారు.

By April 21, 2021 at 10:41AM

Read More https://telugu.samayam.com/latest-news/india-news/india-reports-more-than-2000-covid-deaths-in-last-24-hours/articleshow/82174334.cms