తాత కడసారి చూపునకు హ్యారీ.. కానీ ఆ ఇద్దరూ దూర దూరంగా.. రాజ కుటుంబం కీలక ప్రకటన!

బ్రిటన్‌ రాణి ఎలిజబెత్‌-2 భర్త ప్రిన్స్‌ ఫిలిప్‌ (99) అంత్యక్రియలు శనివారం జరగనున్నాయి. ఇటీవల రాజకుటుంబం నుంచి బయటకు వచ్చిన యువరాజు హ్యారీ తాత అంత్యక్రియలకు హాజరవుతున్నారు. అయితే, సోదరులు ప్రిన్స్‌ విలయమ్, ప్రిన్స్‌ హ్యారీలు పక్కపక్కన నడిచే అవకాశాలు మాత్రం లేవు. అంత్యక్రియలకు ముందు మృతదేహం ఉంచిన శవపేటికను చర్చిలోకి తీసుకెళ్లేటప్పుడు కుటుంబసభ్యులు దానితో పాటు నడుస్తారు. ప్రిన్స్ హ్యారీ రాజకుటుంబం నుంచి విడిపోవాలని నిర్ణయించుకున్న తర్వాత సోదరుల మధ్య సంబంధాలు దెబ్బతిన్నాయి. ఒకవేళ విలయమ్, హ్యారీలు పక్కపక్కన ఉంటే ఏవైనా ఇబ్బందికర పరిణామాలు తలెత్తవచ్చన్న ఉద్దేశంతో రాజకుటుంబం కీలక నిర్ణయం తీసుకుంది. ఫిలిప్ అంత్యక్రియలకు సంబంధించిన బకింగ్‌హామ్‌ ప్యాలెస్‌ గురువారం ఓ ప్రకటన జారీచేసింది. హ్యారీ, విలియంల మధ్య హ్యారీ బంధువు ఫిలిప్స్‌ నడుస్తారని అందులో స్పష్టంచేసింది. చివరిసారిగా 1997లో డయానా మరణించిన సమయంలో సోదరులిద్దరూ తల్లి శవపేటికతోపాటు కలిసే నడిచారు. ఏప్రిల్ 9న ప్రిన్స్‌ ఫిలిప్‌ కన్నుమూసిన విషయం తెలిసిందే. ఆయన అంత్యక్రియలు ఆగ్నేయ ఇంగ్లండ్‌లోని విండ్సర్‌ కోటలో ఉన్న సెయింట్‌ జార్జ్‌ చాపెల్‌లో ఏప్రిల్ 17న జరగనున్నాయి. ఇందుకోసం ఏర్పాట్లు చురుగ్గా సాగుతున్నాయి. విలయమ్, హ్యారీల తండ్రి ప్రిన్స్ చార్లెస్, తన సోదరి అన్నే సహా రాజకుటుంబానికి చెందిన 15 మంది ఇందులో పాల్గొంటారు. అలాగే, కోవిడ్ కారణంగా 30 మందికి మాత్రమే అనుమతి ఉంది. ఇదిలా ఉండగా, విలయమ్, హ్యారీ మధ్య కుటుంబ వివాదాలు పరిష్కారానికి ఎటువంటి చర్యలు తీసుకుంటున్నారనే వ్యాఖ్యలపై స్పందించడానికి బకింగ్‌హమ్ ప్యాలెస్ అధికారులు నిరాకరించారు. మేము డ్రామాలు వంటివి వేయడం లేదు.. ఇవి అంత్యక్రియలు.. రాణి అనుమతితో ఏర్పాట్లు చేస్తున్నామని రాజసౌధం అధికార ప్రతినిధి ఒకరు వ్యాఖ్యానించారు. రాజకుటుంబ ఐక్యతను కాపాడటానికి మరొక ప్రయత్నంలో భాగంగా కుటుంబం మొత్తం అంత్యక్రియలకు యూనిఫామ్ ధరిస్తారని చెప్పారు. రాణి తీసుకున్న నిర్ణయం ప్రకారం హ్యారీ తప్ప మిగతా అందరూ ఒకే విధమైన దుస్తులు ధరిస్తారు. ఇక, హ్యారీ భార్య మేఘన్ మార్కెల్ గర్భవతి కావడంతో వైద్యుల సూచనలతో ఆమె అంత్యక్రియలకు హాజరుకావడం లేదు. బ్రిటీష్ ఆర్మీ, రాయల్ నేవీ, రాయల్ ఎయిర్ ఫోర్స్‌ గౌరవ సూచికంగా రాజ కుటుంబసభ్యులు తరచూ బహిరంగ కార్యక్రమాలకు యూనిఫాం ధరిస్తారు. కానీ, హ్యారీ గతేడాది రాజకుటుంబం నుంచి విడిపోవాలని నిర్ణయించుకున్నప్పుడు తన గౌరవ సైనిక బిరుదులను కోల్పోయాడు. పర్యవసానంగా అఫ్గన్‌లో సైనిక విధులు నిర్వర్తించిన హ్యారీ.. రాజకుటుంబం వేడుకలో పతకాలతో మాత్రమే సూట్ ధరిస్తాడని ప్రోటోకాల్ సూచిస్తుంది. రాణి రెండో కుమారుడు ప్రిన్స్ ఆండ్రూ తన తండ్రి అంత్యక్రియలకు అడ్మిరల్ యూనిఫాం ధరించాలని భావించినట్లు కథనాలు రాగా.. ఈ నిర్ణయం మరో వివాదాన్ని రేపింది. లైంగిక ఆరోపణలు ఎదుర్కొని దోషిగా తేలడంతో ఆండ్రూను రాజకుటుంబ నుంచి బహిష్కరించారు.

By April 16, 2021 at 09:00AM

Read More https://telugu.samayam.com/latest-news/international-news/princes-william-harry-wont-walk-side-by-side-at-philips-funeral-says-royal-family/articleshow/82095220.cms