Breaking News

ఆర్‌ఆర్ఆర్‌ నుంచి ఫ్యాన్స్‌కి లేటెస్ట్ అప్‌డేట్.. స్టూడియోలో మ్యాజిక్ జరిగిందట.. అదేంటో తెలుసా..


‘బాహుబలి’ సినిమాతో తెలుగు సినిమా కీర్తిని ప్రపంచవ్యాప్తంగా తెలిసేలా చేశారు దర్శకధీరుడు ఎస్ఎస్ రాజమౌళి. టాలీవుడ్‌లో తిరుగులేని దర్శకుడిగా పేరు తెచ్చుకున్న ఆయన మరో భారీ ప్రతిష్టాత్మక చిత్రాన్ని త్వరలో ప్రేక్షకుల ముందుకు తీసుకురానున్నారు. యంగ్‌టైగర్ ఎన్టీఆర్, మెగా పవర్‌స్టార్ కథానాయకులుగా ‘ఆర్‌ఆర్ఆర్’ పేరుతో ఓ చరిత్రత్మక చిత్రాన్ని రూపొందిస్తున్నారు జక్కన. ఈ సినిమాలో రామ్ చరణ్ మన్యం వీరుడు అల్లురి సీతారామ రాజుగా, ఎన్టీఆర్ గిరిజన యోధుడు కొమురం భీమ్ పాత్రలో కనిపించనున్నారు. ఇప్పటికే ఈ సినిమాపై టాలీవుడ్‌లోనే కాదు యావత్ భారతదేశంలో భారీ అంచనాలు నెలకొన్నాయి. ఈ సినిమా నుంచి ఎప్పుడు అప్‌డేట్ వస్తుందా అని ప్రేక్షకులు కళ్లలో వొత్తులు వేసుకొని ఎదురుచూస్తున్నారు. ఇప్పటికే ‘భీమ్ ఫర్ రామరాజు’, ‘రామరాజు ఫర్ భీమ్’ పేరుతో రెండు టీజర్‌లు విడుదల చేసి.. సినిమా ఏ రేంజ్‌లో ఉండబోతుందో చిన్న ట్రయల్ ఇచ్చారు రాజమౌళి. ఇక తాజాగా రామ్ చరణ్ పుట్టినరోజు సందర్భంగా సినిమా నుంచి అతని ఫస్ట్‌లుక్‌ని విడుదల చేశారు. ఈ సినిమాకి ఎంఎం కీరవాణి సంగీతం అందిస్తున్నారు. గ్రాండియర్‌గా రాజమౌళి తెరకెక్కిస్తున్న ఈ సినిమాకి అంతే గ్రాండ్‌గా సంగీతం సమరకూరుస్తున్నారు ఆయన. తాజాగా బాలీవుడ్ సంగీత దర్శకుడు విశాల్ మిశ్రా షేర్ చేసిన ఓ ఫొటో అభిమానుల్లో నూతన ఉత్సాహాన్ని నింపింది. ‘మేము ఈ రోజు స్టూడియోలో మ్యాజిక్ చేశాము.. త్వరలో రాబోతుంది’ అంటూ రాజమౌళి, కీరవాణిలతో కలిసి దిగిన ఫొటోని విశాల్ షేర్ చేశారు. అంతే ఈ సినిమా సంగీతం పనులు శరవేగంగా సాగుతున్నాయంటూ ఆయన ఇన్‌డైరెక్ట్‌గా హింట్ ఇచ్చినట్లు తెలుస్తోంది. ఇక డీవీవీ ఎంటర్‌టైన్‌మెంట్స్ బ్యానర్‌పై డీవీవీ దానయ్య పాన్ ఇండియా మూవీగా ఈ సినిమాని నిర్మిస్తున్నారు. ఈ సినిమాలో ఎన్టీఆర్‌కు జోడీగా హాలీవుడ్ నటి ఒలివియా మోరిస్ నటిస్తుండగా.. చరణ్‌కు జోడీగా బాలీవుడ్ బ్యూటీ ఆలియా నటిస్తోంది. అజయ్ దేవ్‌గన్ ఈ సినిమాలో ఓ కీలక పాత్రలో కనిపించనున్నారు. ఆలియా పుట్టిన రోజు సందర్భంగా ఆమె ఫస్ట్‌లుక్‌ని, అజయ్ దేవ్‌గన్ పుట్టినరోజు సందర్భంగా ఆయన ఫస్ట్‌లుక్‌ని కూడా విడుదల చేసింది చిత్ర యూనిట్. ఈ సినిమాని ఈ ఏడాది అక్టోబర్ 13వ తేదీన ప్రపంచవ్యాప్తంగా విడుదలకానుంది.


By April 11, 2021 at 01:27PM


Read More https://telugu.samayam.com/telugu-movies/cinema-news/bollywood-music-director-vishal-mishra-shares-pic-with-rajamouli-and-keeravani/articleshow/82014871.cms

No comments