Breaking News

వాటర్ బాటిళ్లలో ఉద్యోగులు మూత్రం పోస్తున్నది నిజమే.. ఒప్పుకున్న అమెజాన్!


తమ సిబ్బంది వాటర్ బాటిళ్లలో మూత్రం పోయడం నిజమేనని ఎట్టకేలకు అంగీకరించిన ఈ-కామర్స్ దిగ్గజం అమెజాన్.. అందుకు క్షమాపణలు కోరింది. నిజానిజాలు తెలుసుకోకుండా అమెరికా చట్టసభ ప్రతినిధి వ్యాఖ్యలను తోసిపుచ్చామని పేర్కొంది. విస్కాన్సిన్ కు చెందిన డెమొక్రటిక్ ప్రతినిధి గత వారం అమెజాన్ పై చేసిన ఓ ట్వీట్ వైరల్ అయిన విషయం తెలిసిందే. ‘‘ఉద్యోగ సంఘాలు లేకుండా చేయడం, మీ డ్రైవర్లు వాటర్ బాటిళ్లలో మూత్రం పోయడం వంటివి ఉన్నంత కాలం.. సిబ్బందికి గంటకు 15 డాలర్లు ఇచ్చినా మీది గొప్ప సంస్థ అనిపించుకోదు’’ అంటూ ట్వీట్ చేశారు. అలబామాలోని అతిపెద్ద అమెజాన్ కేంద్రంలో ఉద్యోగ సంఘాల ఏర్పాటుకు ఆ సంస్థ వ్యతిరేకత వ్యక్తం చేసిన నేపథ్యంలో ఆయన ఈ విధంగా స్పందించారు. ట్విట్టర్‌లో ఆయన చేసిన వ్యాఖ్యలను అమెజాన్ తోసిపుచ్చింది. ‘‘ఎవరైనా వాటర్ బాటిళ్లలో మూత్రం పోస్తారా? అలా చేస్తే మా సంస్థలో ఎవరూ ఉద్యోగం చేయరు’’ అంటూ కౌంటర్ ఇచ్చింది. అయితే, అమెజాన్ డెలీవరీ బాయ్స్ వాటర్ బాటిళ్లలో మూత్రం పోస్తున్న విషయాన్ని ఆధారాలతో సహా మీడియా సంస్థలు బయటపెట్టాయి. తమకు బాటిళ్లలో మూత్రం చేయడం తప్ప వేరే మార్గం లేదంటూ మీడియా ముందు తమ గోడు వెళ్లబోసుకున్నారు. అంతేకాదు, ఉన్నతాధికారులకూ ఈ విషయం తెలుసని బాంబు పేల్చారు. వాస్తవాలు ఆధారాలతో సహా బయటపడటం అమెజాన్ దిగిరాక తప్పలేదు. మార్క్ పోకన్‌కు క్షమాపణలు చెబుతూ ప్రకటన విడుదల చేసింది. ‘‘మేం చేసిన ట్వీట్ తప్పు. మా సంస్థలో చాలా మంది డ్రైవర్లున్నారు. ఫుల్‌ఫిల్‌మెంట్ సెంటర్ల గురించి మాట్లాడుతున్నారనుకున్నాం. దానిపైనే వివరణ ఇచ్చాం.. ఆ సెంటర్లలో ఎన్నో మరుగుదొడ్లు ఉన్నాయి. ఎవరైనా ఎప్పుడైనా వాటిని వినియోగించుకోవచ్చు’’ అని పేర్కొంది. అయితే, డ్రైవర్ల విషయంలో మాత్రం బాటిళ్లలో మూత్రం పోస్తున్న మాట నిజమేనని తెలిపింది. చాలా మంది డ్రైవర్లు గ్రామీణ ప్రాంతాలకు వెళుతుంటారని, అక్కడ బాత్రూంలు టైంకు అందుబాటులో ఉండకపోవడం వల్లే బాటిళ్లలో మూత్రం పోస్తున్నారని పేర్కొంది. ఇటు కరోనా సమయంలో చాలా ఓపెన్ బాత్రూంలను మూసేశారని, అదీ డ్రైవర్లు బాటిళ్లలో మూత్రం చేయడానికి కారణమవుతోందని వివరణ ఇచ్చింది. అయితే, అమెజాన్ వివరణకు అసహనం వ్యక్తం చేసిన పోకన్.. క్షమాపణలు తనకెందుకుని నిట్టూర్చారు. ‘నేను మాట్లాడేది మీ ఉద్యోగుల గురించి’ అని వ్యాఖ్యానించిన ఆయన... వారికి అమెజాన్ సరైన గౌరవం ఇవ్వట్లేదని ఆగ్రహం వ్యక్తం చేశారు. పని ప్రదేశాల్లో సరైన వసతులు కల్పించాలని, ప్రతి ఒక్కరినీ సమానంగా చూడాలని, సంఘాల ఏర్పాటుకు సహకరించాలని అమెజాన్ కు సూచించారు.


By April 04, 2021 at 02:08PM


Read More https://telugu.samayam.com/latest-news/international-news/amazon-acknowledges-issue-of-drivers-urinating-in-bottles-and-apologize/articleshow/81896623.cms

No comments