Breaking News

అమెరికాలో తెలుగు తేజం.. వాషింగ్టన్ కోర్టు జడ్జ్‌గా నియమించిన బైడెన్


అమెరికా అధ్యక్షుడు యంత్రాంగంలో భారతీయులకు సముచిత స్థానం దక్కింది. వీరిలో పలువురు తెలుగువారు కూడా ఉన్నారు. తాజాగా, మరో భారతీయ సంతతి మహిళను బైడెన్ కీలక పదవిలో నియమించారు. ఆమె తెలుగువారు కావడం మరో విశేషం. వాషింగ్టన్‌ డీసీ జిల్లా కోర్టు న్యాయమూర్తిగా భారతీయ వనిత పుట్టగుంట రూపా రంగాను బైడెన్ నామినేట్ చేశారు. రూపా రంగ తల్లిదండ్రులది కృష్ణా జిల్లా ఉయ్యూరు మండలం కలువపాముల. రూపా తల్లిదండ్రులు పుట్టగుంట పున్నమ్మ, రంగా ఇద్దరూ వైద్యులు కాగా.. అమెరికాలో వారు స్థిర పడ్డారు. అయితే, 15 ఏళ్ల కిందట రూపా తల్లి పున్నమ్మ ఓ రోడ్డు ప్రమాదంలో మృతి చెందారు. లయన్స్‌ జిల్లా గవర్నర్‌ పుట్టగుంట సతీష్‌ కుమార్‌, కాకులపాడు మాజీ సొసైటీ అధ్యక్షుడు చలసాని పూర్ణ బ్రహ్మయ్య.. పుట్టగుంట పున్నమ్మకు సమీప బంధువులు. వాషింగ్టన్‌ డీసీ జిల్లా కోర్టు జడ్జిగా రూప నియమితులు కావడంతో ఆమె బంధువులుసంతోషాన్ని వ్యక్తం చేశారు. రూపా రంగాతోపాటు మరో 10 మందిని వివిధ కోర్టులకు న్యాయమూర్తులుగా నామినేట్ చేస్తూ బైడెన్ ప్రకటించారు. వీరిలో ఆఫ్రికన్ అమెరికన్, ముస్లింలకు కూడా అవకాశం లభించింది. బైడెన్ నామినేట్ చేసినవారిలో ఫెడరల్ సర్క్యూట్, డిస్ట్రిక్ట్ కోర్టు న్యాయమూర్తులు ఉన్నారు. ‘వృత్తిపరంగా అనుభవం, అత్యున్నత అర్హతలు కలిగిన వీరి నియామకం అమెరికా ప్రజల పూర్తి వైవిధ్యాన్ని ప్రతిబింబించాలన్న అధ్యక్షుడి లోతైన నమ్మకాన్ని ప్రతిబింబిస్తుంది’ అని వైట్‌హౌస్ వ్యాఖ్యానించింది. రూపా రంగా నియమాకాన్ని సెనేట్ ధ్రువీకరిస్తే వాష్టింగ్టన్ డీసీ డిస్ట్రిక్ట్ న్యాయమూర్తిగా నియమితులైన తొలి ఆసియా అమెరికన్‌గా ఘనత సాధించనుంది. ఇదిలా ఉండగా, పుట్టగుంట రూపా ప్రస్తుతం వాషింగ్టన్ డీసీ రెంటల్ హౌసింగ్ కమిషన్ అడ్మినిస్ట్రేటివ్ న్యాయమూర్తిగా విధులు నిర్వర్తిస్తున్నారు. మోర్టిజ్ కాలేజ్ ఆఫ్ లా నుంచి 2007లో డాక్టర్ డిగ్రీ పొందిన పుట్టగుంట.. తర్వాత లా క్లర్క్‌గా చేరారు. డీసీ కోర్టు న్యాయమూర్తి విలియమ్ ఎం జాక్సన్ వద్ద 2008 నుంచి 2010 వరకు, తర్వాత సీనియర్ న్యాయమూర్తుల వద్ద 2011 వరకు లా క్లర్క్‌గా పనిచేశారు. న్యాయవాదిగా 2013లో కెరీర్ ప్రారంభించిన రూపా.. క్రిమినల్ కేసులను వాదించారు. గృహహింసకు సంబంధించిన కేసులలో వాషింగ్టన్ డీసీ కోర్టులో న్యాయవాదిగా విశేష సేవలు అందజేశారు. స్వయం సహాయ కేంద్రం, అటార్నీ నెగోషియేటర్ ప్రోగ్రామ్‌లో స్వచ్ఛందంగా పాల్గొని గృహ హింస బాధితుల తరఫున ప్రాతినిధ్యం వహించారు.


By April 02, 2021 at 09:45AM


Read More https://telugu.samayam.com/latest-news/nri/joe-biden-nominates-indian-american-rupa-ranga-puttagunta-as-judge-of-dc-district-court/articleshow/81867522.cms

No comments