Breaking News

భారత్‌కు సాయం కోసం మా తలుపులు తెరిచే ఉన్నాయి, కానీ...: చైనా ప్రకటన


కరోనా రెండో దశ వ్యాప్తితో భారత్ చిగురుటాకులా వణుకుతోంది. ఆస్పత్రుల్లో పడకలు, ఆక్సిజన్ కొరతతో పలువురు ప్రాణాలు కోల్పోతున్నారు. భారత్‌లో పరిస్థితిపై ప్రపంచ దేశాలు ఆందోళన వ్యక్తం చేస్తున్నాయి. ఇప్పటికే పలు దేశాలు సాయం ప్రకటించగా.. తాము కూడా సిద్ధంగా ఉన్నామని చైనా ప్రకటించింది. ఇందుకు తలుపులన్నీ తెరిచే ఉంచామని ఆ విదేశాంగ మంత్రి వాంగ్ యీ వెల్లడించారు. ప్రస్తుత కొవిడ్‌ పరిస్థితులు, వ్యాక్సిన్‌ అవసరాలపై దక్షిణాసియా విదేశాంగ మంత్రులతో మంగళవారం జరిగిన సమావేశంలో ఈ ప్రకటన చేశారు. విర్చువల్‌గా జరిగిన ఈ సమావేశానికి అఫ్గనిస్థాన్‌, పాకిస్థాన్‌, నేపాల్‌, శ్రీలంక, బంగ్లాదేశ్‌ హాజరుకాగా.. భారత్‌, మాల్దీవులు, భూటాన్‌‌లు గైర్హాజరయ్యాయి. అయితే ఈ సమావేశంలో పాల్గొనాలని భారత్‌ను తాము ఆహ్వానించామని చైనా విదేశాంగ మంత్రి తెలిపారు. ఈ సందర్భంగా కొవిడ్‌ సంక్షోభాన్ని ఎదుర్కొంటున్న భారత ప్రజలకు ఆయన సంఘీభావం తెలిపారు. తమ వంతు సాయంగా భారత్‌కు ఆక్సిజన్‌ పంపుతున్నామని, తొలి బ్యాచ్‌కు ఇప్పటికే అక్కడకు చేరిందని వాంగ్ యీ చెప్పినట్లు చైనా మీడియా వెల్లడించింది. అంతకు ముందు చైనా విదేశాంగ శాఖ అధికార ప్రతినిధి వాంగ్ వెన్‌బిన్‌ మాట్లాడుతూ.. వ్యాక్సిన్‌ సరఫరా, అత్యవసర సమయాల్లో దక్షిణాసియాలోని ఇతర దేశాలతో కలిసి పనిచేసేందుకు తాము సిద్ధంగా ఉన్నామని పేర్కొన్నారు. ఇందుకు తగిన ఫ్రేమ్‌వర్క్‌ను సమావేశంలో ప్రతిపాదించినట్లు పేర్కొన్నారు. అలాగే, కరోనా కారణంగా దెబ్బతిన్న ఆర్థిక వ్యవస్థను తిరిగి పట్టాలెక్కించేందుకు పరస్పరం సహకరించుకోవాలన్న అంగీకారం కుదిరినట్లు చెప్పారు. భారత్‌కు అన్నివిధాలా సహకారం అందిస్తామని తెలిపారు. భారత్‌లో చైనా రాయబార కార్యాలయం అధికార ప్రతినిధి వాంగ్ జియాజియన్ మాట్లాడుతూ.. కరోనాపై పోరుకు చైనా ప్రభుత్వం మద్దతు పూర్తిగా ఉంటుందని అన్నారు. ఆక్సిజన్‌ కాన్సంట్రేటర్స్‌ సరఫరా, వైద్య సామాగ్రి సులభంగా పొందడానికి చైనా పరిశ్రమలు సానుకూలంగా స్పందించేలా తాము ప్రయత్నిస్తున్నామని తెలిపారు. భారత్‌కు సహకరించడానికి చైనా సంస్థలకు మార్గనిర్దేశం చేసి, వారి అవసరాలకు అనుగుణంగా మద్దతు, సాయం అందిజేస్తామన్నారు. వైద్య సామాగ్రి, వ్యాక్సిన్లు, నివారణ-చికిత్సా విధానంపై చైనా సాయం భారత ప్రభుత్వ అభ్యర్థన, కోవిడ్ పరిస్థితులపై ఆధారపడి ఉంటుందని లాంజౌహ్ యూనివర్సిటీ ప్రొఫెసర్ ఝూ యాంగ్‌బియో అన్నారు.


By April 29, 2021 at 11:42AM


Read More https://telugu.samayam.com/latest-news/international-news/china-announces-ready-to-help-india-fight-covid-19-surge/articleshow/82305144.cms

No comments