Breaking News

ఆయన అవినీతికి పాల్పడితే మీరు చోద్యం చూశారా? మాజీ సీపీకి బాంబే హైకోర్టు అక్షింతలు


ముంబయి మాజీ పొలీస్ కమిషనర్ పరంబీర్ సింగ్‌‌‌పై తీవ్ర ఆగ్రహం వ్యక్తం చేసింది. హోంమంత్రి అవినీతిపై సీబీఐతో విచారణ జరిపించాలని కోరుతూ బాంబే హైకోర్టులో మాజీ సీపీ పిటిషన్ దాఖలు చేశారు. ఈ పిటిషన్‌పై బుధవారం విచారణ చేపట్టిన హైకోర్టు.. పరంబీర్ సింగ్‌‌కు అక్షింతలు వేసింది. మంత్రిపై ఆరోపణల విషయంలో ఎఫ్ఐఆర్ ఎందుకు నమోదుచేయలేదని పదే పదే నిలదీసింది. ‘మీరు పోలీసు కమిషనర్, మీ కోసం చట్టాన్ని ప్రత్యేకంగా ఎందుకు కేటాయించాలి? పోలీస్ అధికారులు, మంత్రులు, రాజకీయ నేతలు చట్టానికి అతీతులా? అంటే మీరు చట్టాలకు అతీతులమని భావిస్తున్నారా?’ అంటూ బాంబే హైకోర్టు ప్రధాన న్యాయమూర్తి జస్టిస్ సీజే దత్ వ్యాఖ్యానించారు. విచారణలో ఎఫ్ఐఆర్ నమోదు చేయడం తొలి దశ అని పేర్కొంది. ‘హోంమంత్రి, ముఖ్యమంత్రి ప్రమేయం ఉన్నందున మేము చట్టాలను పక్కన పెట్టలేం. ఒక ప్రధాని అవినీతికి పాల్పడితే ఎవరు దర్యాప్తు చేస్తారు? మీకు బయటి నుంచి విశిష్ట అధికారాలు కావాలా?’ అని ప్రశ్నించింది. ఈ అంశంపై విచారణ పూర్తిచేసిన బాంబే హైకోర్టు.. తీర్పును రిజర్వ్ చేసింది. ఇటీవల ముంబయి పోలీస్ కమిషనర్ బాధ్యతల నుంచి పరంబీర్ సింగ్‌ను తప్పించి, హోంగార్డు విభాగానికి బదిలీ చేశారు. అనంతరం ఆయన హోంమంత్రి అనిల్ దేశ్‌ముఖ్‌పై ఆరోపణలు గుప్పిస్తూ సీఎం ఉద్ధవ్ ఠాక్రేకు లేఖ రాయడం కలకలం రేగిన విషయం తెలిసిందే. హైకోర్టులో విచారణ సందర్భంగా పరంబీర్ సింగ్ తరఫున వాదనలు వినిపిస్తూ.. ‘నగరంలోని పోలీసు బలగాలకు అత్యున్నత పదవిని అలంకరించిన, 30 సంవత్సరాలకుపైగా సేవలందించిన వ్యక్తి నుంచి వచ్చిన కఠినమైన వాస్తవాలు ఇవి’ అని తెలిపారు. ఈ సందర్భంగా న్యాయమూర్తి జోక్యం చేసుకుంటూ.. ఎఫ్ఐఆర్ నమోదు చేయడంలో ఎందుకు విఫలమయ్యారని ప్రశ్నించింది. ‘విచారణలో ఎఫ్ఐఆర్ దాఖలు ముఖ్యం.. ఎఫ్ఐఆర్‌ నమోదు చేయకుండా ఎవరైనా అడ్డుకున్నారు.. ప్రధాన నిందితుడిపై ఎఫ్ఐఆర్ నమోదు చేయకుండా విచారణ జరపలేరు’ అని పేర్కొంది. ప్రధాన నిందితుడికి వ్యతిరేకంగా ఎటువంటి ఆధారం లేదని సింగ్ తరఫున లాయర్ పేర్కొనగా.. ‘ఎఫ్ఐఆర్ లేకుండా మన అధికార పరిధిని వినియోగించుకునే అవకాశం ఎక్కడ ఉంది?’ అని కోర్టు నిలదీసింది. తన లేఖను ప్రజాప్రయోజన వ్యాజ్యంగా పరిగణనలోకి తీసుకోవాలని పరంబీర్ సింగ్ కోరాగా.. ‘మీరు పోలీస్ అధికారి.. ఒకవేళ నేరం జరిగినట్టు గుర్తిస్తే ఎఫ్ఐఆర్ నమోదుచేయడం మీ బాధ్యత.. అది మీరెందుకు చేయలేదు.. నేరానికి పాల్పడినట్టు గుర్తించిన తర్వాత ఒకవేళ ఎఫ్ఐఆర్ నమోదు చేయకపోతే మీరు విఫలమైనట్టే.. మీరు సీఎంకి లేఖరాసి చేతులు దులుపుకోలేరు.. ఈ విషయంలో మిమ్మల్ని విచారించవచ్చు’ అని కోర్టు వ్యాఖ్యానించింది. ఎఫ్ఐఆర్ అనేది ప్రాథమిక అంశం.. ఇది లేకుండా దర్యాప్తు ఉండదని స్పష్టం చేసింది. ‘ఇంతకు ముందు ఎఫ్ఐఆర్ నమోదు చేయకపోవడం తీవ్ర ఆక్షేపనీయం. ఎఫ్‌ఐఆర్ నమోదు చేయబడిందా లేదా అనేది నిర్ణయించడానికి పోలీసులకు స్వేచ్ఛ ఇస్తున్నామని చెప్పుకోడానికి మనమంతా సిగ్గుపడాలి’ అని తీవ్రంగా వ్యాఖ్యానించింది. నెలకు రూ.100 కోట్లు వసూలు చేయాలని మీ సమక్షంలో హోంమంత్రి ఈ విషయం చెప్పారని ఈ ఫిర్యాదుకు ఆధారాలు మాకు చూపించగలరా?’ అని హైకోర్టు నిలదీసింది.


By April 01, 2021 at 08:38AM


Read More https://telugu.samayam.com/latest-news/india-news/where-is-fir-bombay-high-court-slams-ex-mumbai-cp-parmbir-singh/articleshow/81811670.cms

No comments