రష్యా సరిహద్దుల్లోకి అమెరికా గూఢచారి విమానం.. వెంబడించిన మిగ్ 31

గతేడాది నవంబరులో జరిగిన అమెరికా అధ్యక్ష ఎన్నికల్లో రష్యా జోక్యం చేసుకున్నట్టు నిఘా వర్గాలు ధ్రువీకరించడంతో ఇరు దేశాల మధ్య అగ్గి రాజుకుంది. నేతల మధ్య మాటల తూటాలు పేలుతున్నాయి. ఈ నేపథ్యంలో పసిఫిక్ మహా సముద్రం తీరంలో రష్యా సరిహద్దుల్లోకి అమెరికా నిఘా విమానం శుక్రవారం ప్రవేశించడం కలకలం రేగుతోంది. దీనిని గమనించిన రష్యా తక్షణమే అప్రమత్తమై, మిగ్-31 యుద్ధ విమానంతో దానిని వెంబడించినట్టు ఇంటర్‌ఫ్యాక్స్ న్యూస్ ఏజెన్సీ వెల్లడించింది. ఈ మేరకు రష్యా నౌకాదళం ప్రకటన చేసినట్టు పేర్కొంది. ‘‘రష్యా సైనిక సిబ్బంది యుఎస్ వైమానిక దళం ఆర్‌సి -135 వ్యూహాత్మక నిఘా విమానం సరిహద్దుల్లోకి ప్రవేశించినట్టు గుర్తించి దానిని పసిఫిక్ మహాసముద్రం జలాల వరకు మిగ్-31 యుద్ధ విమానంతో వెంబడించారు.. ఆ విమానం రష్యా సరిహద్దులు దాటి వెళ్లిపోయిన తర్వాత తిరిగి మిగ్-31 వెనక్కు వచ్చింది’’ అని ఇంటర్‌ఫ్యాక్స్ తెలిపింది. ఎన్నికల్లో ట్రంప్‌నకు లబ్ధిచేకూర్చి బైడెన్‌ను ఓడించడానికి ప్రయత్నాలు చేసినట్లు అమెరికా జాతీయ ఇంటెలిజెన్స్‌ విభాగం డైరెక్టర్‌ యావ్రిల్‌ హెయిన్స్‌ ఇటీవల ధ్రువీకరించారు. ప్రతిపక్ష నేత అలెక్సీ నావెల్నీ, ఇతర ప్రత్యర్థులపై విషప్రయోగానికి ఆదేశించినట్లు ఆరోపణలు ఎదుర్కొంటున్న పుతిన్ ఒక ‘కిల్లర్’ అని అమెరికా అధ్యక్షుడు జో బైడెన్‌ అభిప్రాయపడ్డారు. అలెక్సీ నావెల్నీ విషప్రయోగానికి శిక్షగా రష్యాపై విధించిన ఎగుమతి ఆంక్షలను కఠినతరం చేస్తున్నట్లు అమెరికా వాణిజ్య విభాగం ప్రకటించింది. అమెరికా, రష్యా సంబంధాలు రోజు రోజుకూ క్షీణిస్తున్న నేపథ్యంలో అగ్రరాజ్యం నిఘా విమానం రష్యా సరిహద్దుల్లోకి ప్రవేశించడం ప్రాధాన్యత సంతరించుకుంది. ఇప్పటికే రష్యా తన రాయబారిని వెనక్కు పిలిచింది. అయితే, ఇరు దేశాల మధ్య ఏర్పడిన అంతరాన్ని తగ్గించడానికి ప్రయత్నాలు చేస్తామని ఆ దేశం ప్రకటించింది. అంతేకాదు రష్యా-అమెరికన్ సంబంధాలు మరింత క్షీణించే అంశం అమెరికాపై పూర్తిగా ఆధారపడి ఉందని అంటోంది. 2016 అధ్యక్ష ఎన్నికల్లో హిల్లరీ ఓటమికి రష్యానే కారణమని అమెరికా ఇంటెలిజెన్స్‌ వర్గాలు అనుమానిస్తున్నాయి. అలాంటిది వరుసగా మరో సారి అధ్యక్ష ఎన్నికల్లో జోక్యం చేసుకోవడం ఇంటెలిజెన్స్‌ ఏజెన్సీలను దిగ్భ్రాంతికి గురిచేసింది. రష్యా అధ్యక్షుడు పుతిన్‌ ఉక్రెయిన్‌ చట్టసభ సభ్యుడు ఆండ్రీ డెర్కెచ్‌ను ఉపయోగించుకొని ట్రంప్‌ను ప్రభావితం చేసినట్లు గుర్తించింది.

By April 23, 2021 at 12:53PM

Read More https://telugu.samayam.com/latest-news/international-news/russia-fighter-jet-mig-31-to-accompany-us-spy-plane-says-interfax-report/articleshow/82211437.cms