ఏప్రిల్ 15-20 మధ్య కోవిడ్ మహోగ్రరూపం.. ఐఐటీ శాస్త్రవేత్తలు సంచలన నివేదిక
దేశంలో కోవిడ్-19 రెండో దశ కొనసాగుతోంది. ప్రస్తుతం రోజువారీ కేసులు 90వేలకు చేరువలో ఉన్నాయి. మహమ్మారి ఉద్ధృతి ఏప్రిల్ మధ్య నాటికి గరిష్ఠ స్థాయికి చేరుతుందని శాస్త్రవేత్తలు అంచనా వేస్తున్నారు. ఆ తర్వాత నుంచి కేసులు క్రమంగా తగ్గుముఖం పడతాయని వెల్లడించారు. ఐఐటీ కాన్పూర్‌కు చెందిన శాస్త్రవేత్తలు ఈ మేరకు ఓ గణిత మోడల్ సాయంతో ఈ అంచనాలు రూపొందించారు. డాక్టర్ మణీంద్ర అగర్వాల్‌ నేతృత్వంలో జరిగిన ఈ పరిశోధనలో.. ‘సూత్ర’ అనే గణిత నమూనాను ఉపయోగించారు. దేశంలో తొలి దశ వ్యాప్తిపైనా ఇదే మోడల్ సాయంతో రూపొందించిన అంచనాలు దాదాపు నిజమయ్యాయి. ఆగస్టులో రోజువారీ కేసులు పెరుగుతాయని, సెప్టెంబర్‌లో అవి గరిష్ఠ స్థాయికి చేరి, 2021 ఫిబ్రవరికల్లా అదుపులోకి వస్తాయని అప్పట్లో పేర్కొన్నారు. ప్రస్తుతం అదే నమూనా సాయంతో కోవిడ్ ‘సెకండ్‌ వేవ్‌’తీవ్రత, వ్యాప్తిపై అంచనా వేశారు. ‘‘ఏప్రిల్ 15-20 మధ్యలో భారత్‌లో రోజువారీ కేసులు గరిష్ఠ స్థాయికి చేరుకుంటాయి.. దీని ప్రకారం చూస్తే చాలా వేగంగా కేసులు పెరిగినట్లే లెక్క. అయితే ఆ తర్వాత.. వైరస్ తగ్గుదల కూడా అంతే వేగంగా ఉంటుంది. మే నెల చివరినాటికి అనూహ్యంగా ఇన్‌ఫెక్షన్లు తగ్గిపోవచ్చు’’అని మణీంద్ర అగర్వాల్‌ అభిప్రాయపడ్డారు. రెండో దశలో కోవిడ్ కేసులు తొలుత పంజాబ్‌‌లో గరిష్ఠ స్థాయికి చేరుకుంటాయని, కొద్దిరోజుల్లోనే అది జరుగుతుందన్నారు. ఆ తర్వాత మహారాష్ట్రలో రోజువారీ కేసుల గరిష్ఠానికి చేరుతాయని అన్నారు. దేశంలో రెండో దశ ఉద్ధృతి తీరుతెన్నులపై హరియాణాలోని అశోకా యూనివర్సిటీకి చెందిన గౌతమ్‌ మీనన్‌ సహా పలువురు శాస్త్రవేత్తలు వేర్వేరు అంచనాల్లోనూ ఇదే ఫలితం వెల్లడయ్యింది. రెండో దశలో అమెరికా, ఫ్రాన్స్, యూకే సహా ఐరోపాలో పరిస్థితులే భారత్‌లోనూ ఉత్పన్నమయ్యే సంకేతాలు వెలువడుతున్నాయని వివరించింది. దేశవ్యాప్తంగా అన్ని వయసుల వారికీ వ్యాక్సినేషన్ వేగవంతం చేయాలని, వైరస్ అనేక కొత్త మార్పులకు గురై మరింత వేగంగా వ్యాపిస్తుందని, ఆరోగ్య అత్యవసర పరిస్థితికి దారితీస్తుందని హెచ్చరించింది. ఫిబ్రవరి చివరి నుంచి క్రమంగా కోవిడ్ కేసుల పెరుగుదల రెండో దశకు సంకేతమని తెలిపారు. గతేడాది అక్టోబరు నుంచి ఫిబ్రవరి వరకూ కేసుల తగ్గుముఖం పట్టాయి. మిగతా దేశాలతో పోల్చితే భారత్‌లో రెండో దశ ఆలస్యంగా ప్రారంభమైనట్టు అంచనాలు పేర్కొన్నాయి.
By April 03, 2021 at 10:55AM
No comments