Breaking News

నిన్న రికార్ఢుస్థాయిలో 1.26 లక్షల కేసులు.. నేడు సీఎంలతో ప్రధాని కీలక భేటీ


దేశవ్యాప్తంగా కరోనా మహమ్మారి విజృంభించిస్తోంది. గడచిన 24 గంటల్లో రికార్డుస్థాయిలో 1,26,265 పాజిటివ్ కేసులు నమోదు కాగా.. 684 మంది మృతి చెందారు. కరోనా కేసులు, మరణాలు పెరుగుతుండటంతో ఈ అంశంపై చర్చించేందుకు రాష్ట్రాల ముఖ్యమంత్రులతో ప్రధాని నరేంద్రమోదీ గురువారం సాయంత్రం సమావేశమవుతున్నారు. ఆయా రాష్ట్రాల్లో కరోనా వైరస్ వ్యాప్తిని కట్టడిచేయడానికి తీసుకుంటున్న చర్యలు, వ్యాక్సినేషన్ ప్రక్రియ గురించి ప్రధాని ఈ సందర్భంగా చర్చించనున్నారు. గతవారం ఉన్నతాధికారులతో అత్యున్నత సమావేశం ఏర్పాటుచేసిన ప్రధాని.. కరోనా నియంత్రణకు పంచముఖ వ్యూహాన్ని అమలు చేయాలని సూచించారు. టెస్టింగ్, ట్రేసింగ్, ట్రాకింగ్ విధానాలను సమగ్రంగా అమలు చేయడం ఎలా అనే దానిపై చర్చించున్నారు. గతేడాది కరోనా కేసుల రెట్టింపునకు ఎక్కువ సమయం పట్టింది. రోజూవారి కేసుల సంఖ్య లక్షకు చేరుకోవడానికి కొన్ని నెలల సమయం పట్టగా.. ప్రస్తుతం పరిస్థితి అందుకు భిన్నంగా ఉంది. గతంలో 76 రోజుల్లో రోజువారీ పాజిటివ్ కేసులు గరిష్ఠంగా 97,894కు చేరితే.. ప్రస్తుతం 25 రోజుల్లో లక్ష దాటేయడం గమనార్హం. కేవలం నెల రోజుల్లోపే రోజూవారీ కేసుల సంఖ్య లక్ష దాటింది. దేశంలో ఇప్పటి వరకూ 1,29,26,061 మంది వైరస్ బారినపడగా.. వీరిలో 1,18,48,905 మంది కోలుకున్నారు. మరో 1,66,892 మంది మృతి చెందగా.. ప్రస్తుతం దేశవ్యాప్తంగా 905,021 యాక్టివ్ కేసులున్నాయి. దేశంలో వైరస్ నెల రోజుల్లోనే 4.5 శాతం రెట్టింపయ్యింది. ప్రధాని అత్యున్నత సమావేశం నిర్వహించిన మర్నాడే దేశంలో కోవిడ్ కేసులు లక్షకుపైగా నమోదయ్యాయి. వైరస్ మొదలైన తర్వాత దేశంలో ఒక్క రోజు ఇంత పెద్ద సంఖ్యలో కేసులు నమోదుకావడం ఇదే తొలిసారి. అప్పటి నుంచి కొత్త రికార్డులు కొనసాగుతున్నాయి. బుధవారం ఉదయానికి 1.15 లక్షల మందికి వైరస్ నిర్ధారణ కాగా.. గురువారం ఉదయానికి మరో 1.26 లక్షల మంది వైరస్ బారినపడ్డారు. మార్చి 17న ముఖ్యమంత్రులతో సమావేశమైన ప్రధాని.. దేశంలో కరోనా రెండో దశ వేగంగా విస్తరిస్తోందని, కట్టడికి తగిన చర్యలు తీసుకోవాలని సూచించారు. అటు, కోవిడ్ కేసులు భారీగా నమోదవుతున్న 11 రాష్ట్రాల ఆరోగ్య మంత్రులతో కేంద్ర ఆరోగ్య శాఖ మంత్రి డాక్టర్ హర్ష్‌వర్దన్ బుధవారం వర్చువల్ సమావేశం నిర్వహించారు. మహారాష్ట్ర, చత్తీస్‌గఢ్, ఢిల్లీ, గుజరాత్, హరియాణా, హిమాచల్ ప్రదేశ్, ఝార్ఖండ్, కర్ణాటక, మధ్యప్రదేశ్, పంజాబ్, రాజస్థాన్‌లో పరిస్థితులు దారుణంగా ఉన్నాయి. వచ్చే నాలుగు వారాలు మరింత అప్రమత్తంగా ఉండాలని కేంద్ర ప్రభుత్వ అధికారులు, నిపుణులు హెచ్చరిస్తున్నారు. ప్రపంచంలోనే అత్యధికంగా కోవిడ్ కేసులు నమోదవుతున్న దేశాల్లో ప్రస్తుతం భారత్ తొలిస్థానంలో ఉంది. ఇప్పటి వరకు అత్యధిక కేసులు అమెరికా, బ్రెజిల్‌లో నమోదుకాగా.. మూడో స్థానంలో భారత్ నిలిచింది. కరోనా కట్టడికి మాస్క్ ధరించడం, భౌతికదూరం పాటించడం, తరుచూ చేతులను శుభ్రం చేసుకోవడం వంటి కోవిడ్ నిబంధనలు పాటించాలని పదే పదే ప్రజలకు విజ్ఞ‌ప్తిచేస్తున్నారు.


By April 08, 2021 at 09:27AM


Read More https://telugu.samayam.com/latest-news/india-news/pm-narendra-modi-to-interact-with-cms-on-covid-19-situation-vaccination-strategy-on-today/articleshow/81962621.cms

No comments