మంత్రి రాసలీలల సీడీ: ఐదు కోట్లకు డీల్ కుదిరిందా.. మాజీ సీఎం సంచలన వ్యాఖ్యలు
మంత్రి రమేశ్ జార్ఖిహొళి రాసలీల వ్యవహారం కన్నడ రాజకీయాలకు కుదిపేస్తోంది. తాజాగా, ఈ వ్యవహారంపై మాజీ ముఖ్యమంత్రి కుమారస్వామి సంచలన వ్యాఖ్యలు చేశారు. ఇదో పెద్ద కుట్ర అని ఆయన ఆరోపించారు. సీడీ వెనుక రూ. 5కోట్ల ఒప్పందం జరిగిందని, దీనికి సంబంధించిన సమాచారం ఉందని అన్నారు. మైసూరులో శుక్రవారం ఆయన మీడియాతో మాట్లాడుతూ.. తొలుత సీడీ గురించి మాట్లాడిన వ్యక్తినే ముందు అరెస్టు చేయాలని కోరారు. ఇంకా తన వద్ద సీడీలు ఉన్నాయని ప్రకటించడం వెనుక బ్లాక్మెయిల్ కనిపిస్తోందని వ్యాఖ్యానించారు. ఎవరి వ్యక్తిగత జీవితాన్నైనా ఈ విధంగా చూపడం తప్పని, తనకున్న సమాచారం ప్రకారం మూడు నెలల కిందటే సీడీ చూపించి బ్లాక్మెయుల్ చేశారని చెప్పారు. అంతేకాదు, దీని వెనుక బడా రాజకీయ నేతల హస్తముందని ఆరోపించారు. సమాజంలో విసుగుపుట్టించే పరిస్థితి నెలకొందని కుమారస్వామి విచారం వ్యక్తం చేశారు. సామాజిక కార్యకర్త దినేశ్ కల్లహళ్లి వంటి వ్యక్తులు రాష్ట్రానికి పట్టిన చీడపీడ లాంటివారని మాజీ సీఎం ఆరోపించారు. అంతేకాదు, తన ప్రభుత్వాన్ని కూల్చిన రమేశ్ జార్ఖిహొళిపై నేను రాళ్లు వేయబోనని, యువతి జీవితాన్ని ఎందుకు నాశనం చేశారు? అని ఆయన ప్రశ్నించారు. ఒక మాజీ సీఎం ఎక్కడికెక్కడో వెళ్లివస్తారని.. ఆయనకు సంబంధించిన సీడీ కూడా తన వద్ద ఉందని చెబుతున్నారని, అదెవరిదో చెబితే బాగుంటుందని అన్నారు. రాష్ట్రంలో దేవేగౌడ, ఎస్ఎం కృష్ణ కాలం నుంచి ఎంతోమంది ముఖ్యమంత్రులుగా పనిచేశారని, ప్రజా జీవితంలో వారిని అనుమానంతో చూసే పరిస్థితి తీసుకురావద్దని కుమారస్వామి సూచించారు. యువతికి ఉద్యోగం ఇప్పిస్తానని చెప్పి ఆమెను లొంగదీసుకున్నారని ఆరోపణలు రావడంతో కర్ణాటక జలవనరుల మంత్రి రమేశ్ జార్ఖిహోళి తన పదవికి రాజీనామా చేసిన విషయం తెలిసిందే. అయితే, తనపై వచ్చిన ఆరోపణలు సత్యదూరమని, పూర్తిస్థాయిలో విచారణ జరిపించాల్సిన అవసరం ఉందని ఆయన పేర్కొన్నారు. ‘నాపై వచ్చిన ఆరోపణలు సత్యానికి దూరంగా ఉన్నాయి.. సమగ్రమై దర్యాప్తు అవసరం. నేను నిర్దోషిగా బయటకు వస్తాను.. ఈ విషయంలో నాకు నమ్మకం ఉంది. నేను నైతిక బాధ్యతతో రాజీనామా చేస్తున్నాను’ అని అన్నారు.
By March 06, 2021 at 09:25AM
No comments