మహారాష్ట్రకు మళ్లీ తాళం..!
మహారాష్ట్రలో మళ్లీ పూర్తి స్థాయిలో విధించే పరిస్థితులు కనిపిస్తున్నాయి. కరోనా వైరస్ మునుపటిలా పంజా విసురుతోంది. పాజిటివ్ కేసులు అంతకంతకూ పెరుగుతున్నాయి. 8 జిల్లాల్లో పరిస్థితి ఆందోళనకరంగా ఉంది. దీంతో రాష్ట్ర ప్రభుత్వం ఒక్కో జిల్లాలో కఠిన ఆంక్షలు విధిస్తూ వస్తోంది. తాజాగా పుణేలో రాత్రి కర్ఫ్యూ అమలు చేయనున్నట్లు ప్రకటించింది. దీంతో పాటు అకోలాలో పూర్తి స్థాయి లాక్‌డౌన్‌ను ప్రకటించారు. శుక్రవారం (మార్చి 12) రాత్రి 8 గంటల నుంచి లాక్‌డౌన్ ప్రారంభమవుతుందని తెలిపారు. అటు పర్భాని జిల్లాలో రాత్రి కర్ఫ్యూ విధిస్తున్నట్లు ప్రభుత్వం ప్రకటించింది. నాగ్‌పూర్‌లో ఇప్పటికే లాక్‌డౌన్ ప్రకటించారు. మార్చి 15 నుంచి 21 వరకు వారం రోజుల పాటు లాక్‌డౌన్ అమల్లో ఉంటుందని మంత్రి నితిన్ రౌత్ తెలిపారు. అత్యవసర సేవలు మాత్రమే అందుబాటులో ఉంటాయని వెల్లడించారు. పాలు, నిత్యావసర సరకులు, కూరగాయలు, పండ్లు, మందుల షాపులు మాత్రమే తెరిచి ఉంటాయని చెప్పారు. అంతకుముందే జల్‌గావ్ జిల్లాలో జనతా కర్ఫ్యూ (రాత్రి పూట కర్ఫ్యూ) విధించారు. రాత్రి 8 గంటల నుంచి ఉదయం 8 గంటల వరకు కఠిన నిబంధనలు అమలు చేస్తున్నారు. ఇతర ప్రాంతాల్లోనూ పరిస్థితి ఇలాగే దిగజారితే రాష్ట్రవ్యాప్తంగా మళ్లీ లాక్‌డౌన్ విధించాల్సి వస్తుందని ముఖ్యమంత్రి ఉద్ధవ్ ఠాక్రే అన్నారు. ఆంక్షలు కఠినతరం.. కరోనా వైరస్ తీవ్రత ఎక్కువగా ఉన్న ప్రాంతాల్లో మార్చి 31 వరకు స్కూళ్లు, కాలేజీలను మూసివేస్తున్నట్లు రాష్ట్ర ప్రభుత్వం ప్రకటించింది. హోటళ్లు, రెస్టారెంట్లను 50 శాతం కెపాసిటీతో మాత్రమే నడుపుకోవాలని ఆదేశాలు జారీ చేసింది. రెస్టారెంట్లు, మాల్స్, థియేటర్లను రాత్రి 10 గంటల లోగా మూసేయాలని హెచ్చరించారు. కర్ఫ్యూ అమల్లో ఉన్న ప్రాంతాల్లో నలుగురి కంటే ఎక్కువ మంది గుమిగూడదని హెచ్చరికలు జారీ చేశారు. కేంద్రం ఆందోళన.. మహారాష్ట్రలో కరోనా వైరస్ వ్యాప్తి చెందుతున్న తీరు పట్ల కేంద్ర ప్రభుత్వం కూడా ఆందోళన వ్యక్తం చేసింది. అక్కడ రోజు రోజుకూ కేసుల సంఖ్య పెరుగుతోంది. బుధవారం 13,659 కొత్త కేసులు నమోదు కాగా.. గురువారం 14,317 కేసులు నమోదయ్యాయి. ఈ ఏడాదిలో ఒక్క రోజులో నమోదైన అత్యధిక కేసులు ఇవే. తాజా కేసులతో మహారాష్ట్ర కరోనా కేసుల సంఖ్య 22,66,374కు ఎగబాకింది. ప్రస్తుతం రాష్ట్రంలో 1,06,070 యాక్టివ్ కేసులున్నాయి.
By March 12, 2021 at 03:20PM
No comments