బెంగళూరు: ఆమే చెప్పుతో కొట్టింది.. యువతిపై జొమాటో డెలివరీ బాయ్ ఆరోపణ!
బెంగళూరు యువతి హితేషా చంద్రానీపై అమానుషంగా ప్రవర్తించి, దాడికి పాల్పడిన విషయం తెలిసిందే. తనపై దాడి జరిగిందంటూ బాధితురాలు ఇన్‌స్టా‌గ్రామ్‌ వీడియోతో ఆవేదన వ్యక్తం చేసింది. అనుకున్న సమయానికి ఆర్డర్ రాకపోవడంతో కస్టమర్ కేర్ ఎగ్జిక్యూటివ్‌తో మాట్లాడి.. తన ఆర్డర్ క్యాన్సిల్ చేయాలని యువతి కోరింది. అయితే, ఇంతలోనే డెలివరీ బాయ్‌ఆర్డర్‌ తీసుకురాగా.. తనకు వద్దంటూ ఆమె వాదనకు దిగింది. దీంతో డెలివరీ ఎగ్జిక్యూటివ్ కామరాజ్ ఆగ్రహం వ్యక్తం చేస్తూ ఆమెపై పిడిగుద్దులు కురిపించాడు. తొలుత ఆ యువతే తనను తిట్టి, చెప్పుతో కొట్టిందని నిందితుడు, జొమాటో డెలివరీ బాయ్ ఆరోపించాడు. వీటిని ఆమె తీవ్రంగా ఖండించింది. ఆర్డర్ ఆలస్యం కావడంతో కస్టమర్ కేర్‌కు ఫోన్‌చేసి క్యాన్సిల్ చేస్తున్నట్టు చెప్పానని తెలిపింది. తనకు ఆర్డర్ వద్దని చెప్పడంతో డెలివరీ ఎగ్జిక్యూటివ్ కామరాజ్ ఆగ్రహంతో ఘర్షణకు దిగాడని పేర్కొంది. క్యాన్సిల్‌పై ఎటువంటి సమాచారం అందలేదని, నా సమయం వృధా చేయకుండా డబ్బులు ఇవ్వాలని వాదించాడని తెలిపింది. కామరాజ్ అనే వ్యక్తి తనపై అరుస్తున్నాడని జోమాటో కస్టమర్ కేర్‌కు ఫోన్‌ చేసి చెప్పానని చంద్రనీ అన్నారు. ‘ఎగ్జిక్యూటివ్ మీతో మాట్లాడుతాను అంటున్నారని చెబితే.. అప్పుడు డెలివరీ బాయ్ నాపై గట్టిగా అరిచాడు ‘‘నేను మీ పనిమనిషినా? కస్టమర్ కేర్ కోసం నేను వేచి ఉండాలా?’అని బెదిరింపుగా మాట్లాడు’ అని ఆమె తెలిపారు. కస్టమర్ల పట్ల వ్యవహరించే పద్ధతి ఇదికాదని చెబుతుండగా నాపై దాడి చేశాడు. బలవంతంగా ఇంట్లోకి ప్రవేశించి తనపై పిడిగుద్దులు కురిపించాడని బాధితురాలు వీడియోలో ఆరోపించింది. తర్వాత తన ఆర్డర్‌ను తీసుకొని మరీ పారిపోయాడని ఆమె చెప్పారు. నా ముక్కుపై బలంగా గుద్దడంతో రక్తం కారుతున్న విషయాన్ని గమనించకుండా అతడి వెనుకాల పరుగెత్తి, ఆపడానికి ప్రయత్నించానని బాధితురాలు అన్నారు. లిఫ్ట్‌ దగ్గర అడ్డుకున్న తనపై మరోసారి కొట్టి, మెట్ల గుండా కిందికి వెళ్లిపోయాడని వాపోయింది. యువతి ఫిర్యాదుతో నిందితుడ్ని పోలీసులు అరెస్ట్ చేశారు. ఆమే తనను నోటికొచ్చినట్టు తిట్టి, చెప్పుతో కొట్టిందని అన్నాడు. ఆ తర్వాత ఆమెపై తాను చేయిచేసుకున్నానని అన్నాడు. దీనికి క్షమాపణలు చెప్పి అనంతరం జొమాటాతో మాట్లాడి పార్సిల్ ఇవ్వడానికి ప్రయత్నిస్తే ఆమె తిరస్కరించారని చెప్పాడు. అంతేకాదు, ఆమె చేతి వేలికి ఉన్న ఉంగరం వల్లే ముక్కుకు గాయమైందంటూ ఆరోపించాడు. అయితే, వీటిని యువతి తీవ్రంగా ఖండించింది. తాను డెలివరీ బాయ్‌ను తిట్టలేదని, అతడే ముందు అసభ్యంగా ప్రవర్తించాడని పేర్కొంది.
By March 12, 2021 at 02:50PM
No comments