Breaking News

అంగీకారంతో మైనర్లు లైంగిక చర్యల్లో పాల్గొంటే పోక్సో వర్తిస్తుందా? సుప్రీం కీలక నిర్ణయం


మైనర్లు సహజీవనం చేస్తూ పరస్పర అంగీకారంతో లైంగిక చర్యలో పాల్గొంటే కింద శిక్షించాలా? వద్దా? అనే అంశంపై విచారణకు అంగీకరించింది. ఈ అంశంపై స్పందన తెలియజేయాలని తమిళనాడు ప్రభుత్వాన్ని న్యాయస్థానం ఆదేశించింది. ఈ మేరకు జస్టిస్‌ ఇందిరా బెనర్జీ, జస్టిస్‌ కృష్ణ మురారీతో కూడిన ధర్మాసనం శనివారం నోటీసులు జారీ చేసింది. మైనర్లు పరస్పరం అంగీకారంతో లైంగిక చర్యల్లో పాల్గొంటే శిక్షించడం పోక్సో చట్టం లక్ష్యం కాదని పిటిషనర్ వాదించాడు. 2015లో నమోదయిన ఈ కేసులో తన క్లయింట్‌కు అరెస్ట్ నుంచి రక్షణ కల్పించాలని ఈ సందర్భంగా అతడి తరఫున లాయర్ ధర్మాసనాన్ని అభ్యర్థించారు. ఇరువురి మధ్య పాఠశాల స్థాయి నుంచే పరిచయం ఉందని, ఇష్టపూర్వకంగానే యువతి శృంగారంలో పాల్గొందని వాదించారు. తమిళనాడుకు చెందిన 17 ఏళ్ల బాలిక 2015లో 18 ఏళ్ల యువకుడిపై పెళ్లి చేసుకుంటానని నమ్మించి మోసం చేశాడని ఫిర్యాదు చేసింది. తనతో సహజీవనం చేసి వివాహానికి నిరాకరించాడని తెలిపింది. దీంతో అతడిపై అత్యాచారం, చీటింగ్ కేసు నమోదైంది. అయితే, తనపై అత్యాచారం జరగలేదని, ఇష్టపూర్వకంగానే శృంగారంలో పాల్గొన్నట్లు విచారణలో బాధితురాలు వెల్లడించింది. అంతేకాదు, తిరిగి అతడితో కలిసి జీవించడానికి సుముఖంగా ఉన్నట్లు తెలిపింది. కానీ, ఆమె వాదనలను తిరస్కరించిన దిగువ కోర్టు.. పోక్సో చట్టం ప్రకారం నిందితుడికి 10 ఏళ్ల జైలు శిక్ష, రూ.5 వేల జరిమానా విధించింది. బాధితురాలికి పరిహారం కింద రూ.లక్ష చెల్లించాలని ఆదేశించింది. ఈ అంశం మద్రాసు హైకోర్టుకు చేరడంతో ఇద్దరూ ఒకే రకమైన వాదనలు వినిపించారు. తమ సంబంధం పరస్పర అంగీకారంతో కూడినదని మద్రాసు హైకోర్టుకు తెలిపింది. అయితే, ఆ వాదనను తోసిపుచ్చిన న్యాయస్థానం ఆమె పిటిషన్‌ను మార్చి 16న కొట్టివేసింది. దీంతో ఈ వ్యవహారం సుప్రీంకోర్టుకు చేరింది. మద్రాస్‌ హైకోర్టు తీర్పుపై వాదనలు విన్న సుప్రీంకోర్టు ధర్మాసనం తమిళనాడు ప్రభుత్వానికి నోటీసులు జారీ చేసింది. యువకుడిపై ఎలాంటి చర్యలు తీసుకోవద్దని ఆదేశించింది. బాధిత యువతి ప్రకారం.. తనను పెళ్లిచేసుకుంటానని ఇచ్చిన మాటను నిలబెట్టుకోవాలని అడిగితే.. తన తల్లిదండ్రుల ఒత్తిడితోనే మనసు మార్చుకున్నట్టు ప్రియుడు చెప్పాడని తెలిపింది.


By March 29, 2021 at 07:53AM


Read More https://telugu.samayam.com/latest-news/india-news/supreme-court-to-examine-consensual-relationship-involving-minors-is-punishable-under-pocso-act/articleshow/81741625.cms

No comments