కార్తికేయ సినిమాకు అల్లు అర్జున్ ప్రచారం.. బస్తీ బాలరాజు ఛాన్స్ కొట్టాడు!

RX 100 చిత్రంతో బ్లాక్ బస్టర్ హిట్ అందుకుని ఓవర్‌నైట్ స్టార్ అయిపోయారు కార్తికేయ. కేవలం హీరోగానే కాకుండా ‘నానీస్ గ్యాంగ్ లీడర్’లో విలన్‌గానూ మెప్పించారు. అయితే, RX 100 తరవాత హీరోగా మళ్లీ ఆ స్థాయి హిట్ అందుకోలేదు కార్తికేయ. కానీ, ఇప్పుడు ‘చావు కబురు చల్లగా’ సినిమాతో తన కెరీర్‌లోనే బిగ్గెస్ట్ హిట్‌ను అందుకునేలా కనిపిస్తున్నారు. దీనికి ప్రధాన కారణం ఈ సినిమా అల్లు అరవింద్ కాంపౌండ్ నుంచి వస్తుండటమే. ‘గీత గోవిందం’, ‘ప్రతిరోజూ పండగే’ వంటి సూపర్ హిట్ సినిమాలను రూపొందించిన జీఏ2 పిక్చర్స్ సంస్థ ‘చావు కబురు చల్లగా’ చిత్రాన్ని నిర్మిస్తోంది. అల్లు అరవింద్ సమర్పిస్తున్నారు. దీంతో ఈ సినిమాపై అందరి దృష్టి పడింది. దీనికి తోడు ఇప్పటికే ప్రేక్షకుల్లోకి వెళ్లిన పబ్లిసిటీ కంటెంట్ సినిమాపై అంచనాలను పెంచింది. బస్తీ బాలరాజుగా కార్తికేయ లుక్, మ్యానరిజం ఆకట్టుకున్నాయి. లేటెస్ట్‌గా విడుదలైన ‘పైన పటారం’ మాస్ సాంగ్ కూడా ఈ సినిమా హైప్‌ను పెంచింది. అనసూయ ఈ పాటలో కార్తికేయతో స్టెప్పులేయడం దీనికి కారణం. ‘చావు కబురు చల్లగా’ సినిమాకు ఇప్పటి వరకు వచ్చిన పాపులారిటీ ఇప్పుడు రెట్టింపు కాబోతోంది. దీనికి కారణం స్టైలిష్ స్టార్ అల్లు అర్జున్. మార్చి 9న నిర్వహించబోయే ‘చావు కబురు చల్లగా’ ప్రీ రిలీజ్ ఈవెంట్‌లో అల్లు అర్జున్ ముఖ్య అతిథిగా పాల్గొంటున్నారు. బన్నీ రాకతో ఈ సినిమాకు మరింత ప్రచారం దక్కడం ఖాయం. సినిమా ఎలాగూ వాళ్లదే కాబట్టి బన్నీ చీఫ్ గెస్ట్‌గా రావడం ఆశ్చర్యానికి గురిచేసే అంశమైతే కాదు. కానీ, కార్తికేయ సినిమా ఈవెంట్‌కు బన్నీ గెస్ట్‌గా రావడం అనేది విశేషం. అందుకే, కార్తికేయ కూడా తన స్టైల్లో బన్నీకి థాంక్స్ చెప్పారు. ‘చావు కబురు చల్లగా’ సినిమా ప్రీ రిలీజ్ ఈవెంట్‌కు అల్లు అర్జున్ చీఫ్ గెస్ట్‌గా విచ్చేస్తున్నట్టు తెలిపే పోస్టర్‌ను ట్వీట్ చేసిన కార్తికేయ.. ‘‘విచ్చేస్తున్న స్టైలిష్ స్టార్ అల్లు అర్జున్ గారికి మా బాలరాజు గాడి నుంచి సానా సానా పెద్ద థాంక్స్’’ అని పేర్కొన్నారు. కాగా, ఈ సినిమాలో కార్తికేయ సరసన లావణ్య త్రిపాఠి హీరోయిన్‌గా నటించారు. కౌశిక్ పెగళ్లపాటి దర్శకుడిగా పరిచయం అవుతున్నారు. జేక్స్ బెజాయ్ సంగీతం సమకూర్చిన ఈ చిత్రానికి కరమ్ చావ్లా సినిమాటోగ్రఫీ అందించారున. సత్య జి ఎడిటర్. జి.ఎమ్.శేఖర్ ఆర్ట్ డైరెక్టర్. శివకుమార్ భూజుల అడిషనల్ డైలాగ్స్ అందించారు. ఆమ‌ని, ముర‌ళీ శ‌ర్మ, ర‌జిత‌, భ‌ద్రం, మ‌హేష్‌, ప్రభు ముఖ్య పాత్రల్లో నటించిన ఈ చిత్రం మార్చి 19న ప్రపంచ వ్యాప్తంగా విడుదలవుతోంది.

By March 02, 2021 at 12:31PM

Read More https://telugu.samayam.com/telugu-movies/cinema-news/allu-arjun-chief-guest-for-kartikeya-chaavu-kaburu-challaga-pre-release-event/articleshow/81289325.cms