ప్రముఖ బంగారం వ్యాపారి సంస్థల్లో ఐటీ సోదాలు.. వెయ్యి కోట్లకుపైగా బ్లాక్‌మనీ సీజ్

ఆదాయపు పన్ను శాఖ అధికారులు సోదాల్లో లెక్కల్లో చూపని రూ.1,000 కోట్లకుపైగా ఆదాయాన్ని గుర్తించారు. ఓ ప్రముఖ బంగారం వ్యాపారికి చెందిన నివాసాలు, కార్యాలయంలో నిర్వహించిన సోదాల్లో ఈ సొత్తు బయటపడింది. కేంద్ర ప్రత్యక్ష పన్నుల బోర్డు (సీబీడీటీ) అధికారులు స్వాధీనం చేసుకున్నారు. మార్చి 4 న చెన్నై, ముంబై, కోయంబత్తూరు, మదురై, తిరుచురాపల్లి, త్రిసూర్, నెల్లూరు, జైపూర్, ఇండోర్ సహా 27 చోట్ల సోదాలు నిర్వహించినట్టు సీబీడీటీ ప్రకటించింది. సోదాలకు సంబంధించిన వివరాలను ఆదాయపు పన్ను శాఖ ఆదివారం వెల్లడించింది. అయితే, ఆ వ్యాపారి ఎవరు అన్న వివరాలను మాత్రం తెలియజేయలేదు. దాడుల సందర్భంగా లెక్కల్లో చూపని నగదు లావాదేవీలు, ఆ సంస్థ బోగస్ రుణ చెల్లింపులు, అడ్వాన్స్ కొనుగోళ్ల రూపంలో రుణ చెల్లింపుల డమ్మీ ఖాతాలు, నోట్ల రద్దు సందర్భంగా ఖాతాల్లో డిపాజిట్ చేసిన లెక్క తేలని డబ్బు, వివరాల్లేని స్టాక్‌లను గుర్తించినట్టు పేర్కొంది. స్థానికంగా ఉన్న రుణదాతల నుంచి నగదు తీసుకుని బిల్డర్లకు రుణాలిచ్చారని, రియల్ ఎస్టేట్ వ్యాపారంలో పెట్టుబడులు పెట్టారని వివరించింది. ఇక, బంగారం కొనుగోళ్లలో అక్రమాలకు పాల్పడినట్టు వెల్లడించింది. తమకు అప్పులున్నట్టు తప్పుడు ప్రకటనలు ఇచ్చి, పాత బంగారాన్ని నగల తయారీ, ఇతర అంశాలకు వాడుకున్నట్టు చెప్పాడని పేర్కొంది. మొత్తంగా ఆ వ్యాపారి నుంచి రూ. 1,000 కోట్లకిపైగా స్వాధీనం చేసుకున్నామని చెప్పింది. అయితే, ఐటీ సోదాలు నిర్వహించిన వ్యాపారి దక్షిణాదికి చెందిన ప్రముఖుడనే ప్రచారం సాగుతోంది. గత నెలలో హైదరాబాద్‌కు చెందిన ఓ ప్రముఖ ఫార్మా కంపెనీలో ఐటీ అధికారలు సోదాలు నిర్వహించిన విషయం తెలిసిందే. ఈ సోదాల్లో భారీగా నల్లధనం బయటపడింది. బోగస్‌ కంపెనీల ద్వారా అవకతవకలకు పాల్పడుతోన్న ఓ ప్రసిద్ధ ఫార్మాస్యూటికల్‌ కంపెనీ వద్ద ఐటీ అధికారులు సుమారు రూ.400 కోట్ల లెక్కల్లో చూపని నగదును ఆదాయ పన్ను శాఖ గుర్తించినట్టు కేంద్ర ఆర్థిక శాఖ వెల్లడించింది. గత నెల 24న 5 రాష్ట్రాల్లోని 20 ప్రాంతాల్లో ఉన్న ఆ సంస్థ కార్యాలయాల్లో ఐటీ శాఖ సోదాలు నిర్వహించిందని ఓ ప్రకటనలో తెలిపింది.

By March 07, 2021 at 03:50PM

Read More https://telugu.samayam.com/latest-news/india-news/rs-1000-crore-undisclosed-income-found-in-i-t-searches-on-two-chennai-based-groups/articleshow/81376703.cms