‘ఉప్పెన’లాంటి లాభాలు.. దర్శకుడికి నిర్మాతల భారీ గిఫ్ట్.. గురువు‌కు మొదటి ప్రాధాన్యం
ఇప్పటి వరకు 2021లో టాలీవుడ్ బిగ్గెస్ట్ బ్లాక్ బస్టర్ హిట్, రికార్డులు అన్నీ కూడా 'ఉప్పెన' పేరు మీదున్నాయి. ఉప్పెన సినిమా కలెక్షన్లు చూసి అందరూ షాక్ అయ్యారు. అటు సినీ వర్గాలు, ఇటు సినీ పండితులు ఉప్పెన వసూళ్లు చూసి నోరెళ్లబెట్టారు. కరోనా లాంటి సమయంలోనూ ఈ రేంజ్ వసూళ్లు రావడంతో అందరూ ఆశ్చర్యపోయారు. వంద కోట్ల గ్రాస్ కొల్లగొట్టడంతో నిర్మాతల ఇంట లాభాల పంట పండింది. ఉప్పెన సినిమా విషయాన్నికొస్తే.. అన్నీ సమంగా కుదరడంతో ఈ రేంజ్‌లో హిట్ అయింది. కథ పాతదే అయినా తీర్చిదిద్దిన విధానం కొత్తగా ఉండటం, క్లైమాక్స్ కాస్త డిఫరెంట్‌గా ప్లాన్ చేయడంతో అందరూ బాగానే కనెక్ట్ అయ్యారు. అన్నింటి కంటే ముఖ్యంగా హీరోహీరోయిన్లుగా తెరకు మొదటగా పరిచయమైన వైష్ణవ్ తేజ్ కృతి శెట్టిల కాంబినేషన్‌కు అందరూ ఫిదా అయ్యారు. దేవీ శ్రీ ప్రసాద్ అందించిన సంగీత, నేపథ్య సంగీతం సినిమాను మరో స్థాయికి తీసుకెళ్లింది. ఉప్పెన పాటలు సోషల్ మీడియాలో రికార్డులు క్రియేట్ చేశాయి. ఇక విజువల్‌గానూ మరో స్థాయిలో తెరకెక్కించారు. ఇలా ఉప్పెన సినిమాకు అన్ని విషయాలు కలిసి రావడంతో ప్రేక్షకులు బ్రహ్మరథం పట్టారు. ఉప్పెన నిర్మాతలకు పెట్టిన దానికి నాలుగైదు రెట్ల లాభాలను తెలుగు ప్రేక్షకులు ఇచ్చారు. అలా సినిమా అనుకున్న దాని కంటే ఎక్కువగా విజయం సాధించడంతో నిర్మాతలు ఫుల్ ఖుషీ అయ్యారు. అలా వచ్చిన లాభాల్లోంచి హీరోకు అదనంగా కోటి, హీరోయిన్‌కు రూ. 25 లక్షలను ఇచ్చినట్టు తెలుస్తోంది. పారితోషికం కాకుండానే ఇలా అదనంగా ఇవ్వడంతో అందరూ షాక్ అయ్యారు. ఇక అంతే కాకుండా భారీ బ్లాక్ బస్టర్ తీసి.. మొదటి అవకాశాన్ని ఇవ్వడం, దాన్ని నిలబెట్టుకోవడంతో బుచ్చిబాబుపై మైత్రి నిర్మాతలు సంతోషం వ్యక్తం చేశారు. ఇక బుచ్చిబాబుకు ఓ విలాసవంతమైన ఇళ్లు లేదా.. లగ్జరీ కారు బహుమతిగా ఇవ్వబోతోన్నట్టు ఆ మధ్య టాక్ వచ్చింది. కానీ అది ఆలస్యమవుతూ వచ్చింది. మొత్తానికి బుచ్చిబాబు కాస్ట్‌లీ బెంజ్ కారును బహుమతిగా ఇచ్చారు నిర్మాతలు. అందులో తన గురువైన సుకుమార్‌ను మొదటగా ఎక్కించుకుని తన ప్రేమను చాటుకున్నాడు బుచ్చిబాబు. ఈ దర్శకుడు తన రెండో సినిమాను కూడా మైత్రి బ్యానర్‌లోనే చేయబోతోన్న విషయం తెలిసిందే.
By March 26, 2021 at 11:52AM
No comments