Breaking News

క్యాంపస్‌లో బహిరంగంగా ప్రేమికులు కౌగిలింతలు.. వర్సిటీ సంచలన నిర్ణయం


యూనివర్సిటీ ప్రాంగణంలో ఓ విద్యార్ధిని, విద్యార్ధి ఆలింగనం చేసుకున్నారనే కారణంతో వారిని వర్సిటీ నుంచి తొలగించారు. ఈ ఘటన పాకిస్థాన్‌లోని లాహోర్ యూనివర్సిటీలో చోటుచేసుకుంది. ఇద్దరు యువతీ యువకులు ఆలింగనం చేసుకున్న వీడియో సోషల్ మీడియాలో వైరల్ కావడంతో యూనివర్సిటీ తీవ్రంగా పరిగణించింది. ఈ అంశంపై విశ్వవిద్యాలయ క్రమశిక్షణ కమిటీ శుక్రవారం సమావేశమై ఆ ఇద్దరిని తొలగించాలని నిర్ణయించింది. తమ ఎదుట హాజరు కావాల్సిందిగా క్రమశిక్షణ కమిటీ వీరికి సమన్లు జారీచేసింది. అయితే, ఇరువురూ రాకపోవడంతో యూనివర్సిటీ నుంచి తొలగిస్తున్నట్టు ప్రకటించింది. విశ్వవిద్యాలయ ఆవరణలోకి రాకుండా వారిపై నిషేధం విధించింది. నిబంధనలకు వ్యతిరేకంగా వారు అనుచితంగా ప్రవర్తించినట్లు విశ్వవిద్యాలయం ఓ ప్రకటనలో తెలిపింది. వైరల్ అవుతోన్న ఈ వీడియోలో యువతి తన చేత్తో గులాబీలు, గ్రీటింగ్ కార్డ్స్ పట్టుకుని ఉండగా.. యువకుడు మోకాళ్లపై నిలబడి ఆ యువతికి పూల బొకే అందజేశాడు.. తర్వాత ఆమె చేతిలోని రోజా పూలను తీసుకుని, అనంతరం హగ్ చేసుకున్నాడు.. వర్సిటీ క్యాంపస్‌లోనే విద్యార్థులంతా చుట్టుముట్టినా ప్రేమికులు మైమరిచిపోయారు. ఇదిలా ఉండగా, యూనివర్సిటీ తీసుకున్న నిర్ణయంపై భిన్నాభిప్రాయాలు వ్యక్తమవుతున్నాయి. వర్సిటీ చర్యలకు కొందరు సమర్ధిస్తుంటే, మరికొందరు తప్పుబడుతున్నారు. క్రమశిక్షణ కమిటీ సరైన నిర్ణయం తీసుకుంది ఎందుకంటే క్యాంపస్‌లో వారి ప్రవర్తన అనుచితంగా ఉందని కొందరు మద్దతు తెలిపారు. ప్రపోజల్ సోషల్ మీడియాలో వైరల్ కావడంతోనే తొలగించారని మరో వ్యక్తి ట్వీట్ చేశారు. అయితే, విశ్వవిద్యాలయంలో పరిష్కారానికి నోచుకోని అనేక సమస్యలు ఉన్నాయని, వాటిన్నింటినీ వదిలేసి ఈ చిన్న అంశంపై స్పందించడమేంటని నిలదీస్తున్నారు. చాలా మంది విద్యార్థులు వేధింపులకు గురవుతుంటే చోద్యం చూస్తున్నారని దుమ్మెత్తిపోస్తున్నారు. వేధింపులకు గురిచేస్తున్న ఆచార్యులపై ముందు కఠిన చర్యలు తీసుకోవాలని సూచించారు. న్యాయవాది, సామాజిక కార్యకర్త జిబ్రాన్ నాసిర్ మాట్లాడుతూ.. సమాజంలో అనేక సమస్యలు ఉన్నాయి.. ఇద్దరు యువతీ యువకులు తమ ప్రేమను బహిరంగంగా వ్యక్తం చేయడంపై ఆందోళన చెందాల్సిన అవసరం లేదన్నారు. ఇద్దరు వ్యక్తులు బహిరంగంగా ముద్దు పెట్టుకున్నప్పుడు కళ్లు మూసుకోమని దేశం చెబుతోంది, కానీ, జనం సహజ ప్రదర్శనను కళ్లార్పకుండా చూస్తున్నారని మరో నెటిజన్ వ్యంగ్యాస్త్రాలు సంధించారు.


By March 14, 2021 at 11:18AM


Read More https://telugu.samayam.com/latest-news/international-news/university-of-lahore-expels-students-for-hugging-and-proposed-on-campus/articleshow/81492244.cms

No comments