ఆ నాలుగు దేశాల మహిళల్ని పెళ్లి చేసుకోవద్దు.. షాక్ ఇచ్చిన సౌదీ.. కారణం ఇదే
ఇతర దేశాల మహిళలను వివాహం చేసుకునే విషయంలో సౌదీ ఆరేబియా జారీచేసిన ఉత్తర్వులు విస్మయానికి గురిచేస్తున్నాయి. పాకిస్థాన్, బంగ్లాదేశ్, చాద్, మాయన్మార్‌కి చెందిన మహిళలను వివాహం చేసుకోవద్దని ఉత్తర్వుల్లో పేర్కొన్నట్టు పాక్ పత్రిక డాన్ వెల్లడించింది. అనధికారిక గణాంకాల ప్రకారం.. ఈ నాలుగు దేశాలకు చెందిన 5 లక్షల మంది మహిళలు ప్రస్తుతం సౌదీ అరేబియాలో ఉంటున్నారు. ఇప్పటి వరకూ ఈ నాలుగు దేశాలకు చెందినవారిని సౌదీవాసులు వివాహం చేసుకోవడానికి ఎటువంటి అభ్యంతరాలు లేవు. తాజా ఆదేశాల ప్రకారం ఈ దేశాల మహిళల్ని పెళ్లి చేసుకోవాడానికి కఠిన నిబంధనలు అడ్డొస్తాయని మక్కా పోలీస్ డైరెక్టర్ మేజర్ జనరల్ అసఫ్ అల్-ఖురేషీ అన్నట్టు మక్కా డైలీ పేర్కొంది. సౌదీ అరేబియాలో విదేశీ మహిళల్ని పెళ్లి చేసుకునేవారి సంఖ్య గణనీయంగా పెరగడంతో ఈ నిబంధనలను పాలకులు తీసుకున్నట్టు తెలిసింది. విదేశీ మహిళను వివాహం చేసుకోవాలనుకునే వ్యక్తులు కొన్ని అదనపు నియమాలు, నిబంధనలను పాటించాల్సి ఉంటుంది. విదేశీ మహిళను పెళ్లి చేసుకోవాలనుకునే సౌదీ పురుషులు... తప్పనిసరిగా ప్రభుత్వానికి దరఖాస్తు చేసుకోవాలి. దాన్ని ప్రభుత్వం దీనిని పరిశీలించి ఆమోదించాలో లేదో నిర్ణయిస్తుంది. అలాగే, విడాకులు తీసుకున్న వ్యక్తులు మరో పెళ్లి చేసుకోవాలని భావిస్తే 6 నెలల దాకా వేచి ఉండాలని అల్ ఖురేషీ తెలిపారు. దరఖాస్తు చేసుకునే వారి వయసు 25 ఏళ్లు పూర్తయి ఉండాలి. అలాగే, ముందుగానే స్థానిక జిల్లా మేయర్ సంతకం చేసిన దరఖాస్తుతోపాటు గుర్తింపు పత్రాలు, ఫ్యామిలీ కార్డు కాపీ వంటివి సమర్పించాలి. ఒకవేళ, దరఖాస్తు చేసిన వ్యక్తికి అప్పటికే వివాహమై ఉంటే తన భార్య ఆరోగ్య పరిస్థితి గురించి హాస్పిటల్ నివేదికను అందజేయాలి. ఆమె ఏదైనా వ్యాధితో బాధపడుతుందా? దివ్యాంగురాలా? ఆరోగ్యవంతురాలేనా? అనేది తెలియజేయాలి. తాజా నిబంధనలు సౌదీ పౌరులకు కొంత ఇబ్బంది కలిగిస్తాయనడంలో ఎటువంటి సందేహం లేదు. కానీ, అక్కడ పాలకులు చెప్పిందే వేదం కాబట్టి వీటిని తప్పనిసరిగా పాటించాల్సిందే. ఈ అంశం ఇప్పుడు అంతర్జాతీయంగా చర్చనీయాంశమయ్యింది.
By March 20, 2021 at 11:59AM
No comments