Breaking News

అంబానీ కేసులో అనూహ్య మలుపు: హిరేన్‌ది హత్యే.. పోలీస్ అధికారే నిందితుడు?


అంబానీ నివాసం వద్ద పేలుడు పదార్థాలతో కూడిన వాహనం కేసు రోజుకో మలుపు తిరుగుతోంది. వాహనం యజమాని పది రోజుల కిందట అనుమానాస్పదరీతిలో మృతిచెందిన విషయం తెలిసిందే. ఈ ఘటనపై దర్యాప్తు కొనసాగుతుండగా.. హిరేన్‌ది హత్యేనని నిర్ధారణకు వచ్చినట్టు ఓ అధికారి పేర్కొన్నారు. హిరేన్ భార్య విమ్లా కూడా తన భర్తది హత్యేనని, ఇందులో పోలీస్ అధికారి సచిన్ వాజే పాత్ర ఉందని అనుమానం వ్యక్తం చేశారు. ఇదే సమయంలో ముందస్తు బెయిల్ కోసం వాజే కోర్టును ఆశ్రయించడం దీనికి మరింత బలం చేకూర్చింది. వాజే ముందస్తు బెయిల్ పిటిషన్‌ను మార్చి 19న విచారించనున్న కోర్టు.. ఏటీఎస్‌కు నోటీసులు జారీచేసే అవకాశం ఉంది. మహారాష్ట్ర ప్రభుత్వం, ప్రతిపక్ష బీజేపీ మధ్య రాజకీయ పోరాటంలో తాను బలవుతానని భయపడుతున్నందున వాజే ముందస్తు బెయిల్ కోసం దరఖాస్తు చేశాడని పోలీస్ వర్గాలు అంటున్నాయి. ఇదిలా ఉండగా, క్రైమ్ ఇంటెలిజెన్స్ యూనిట్ (సీఐయూ) నుంచి సచిన్ వాజేను స్పెషల్ బ్రాంచ్‌కు శుక్రవారం బదిలీ చేశారు. పోలీస్ ప్రధాన కార్యాలయంలోని సిటిజెన్ ఫెసిలిటేషన్ సెంటర్‌లో అతడికి పోస్టింగ్ ఇవ్వనున్నారు. హిరేన్‌ను హత్యచేసిన తర్వాతే నదీ పాయలోకి విసిరేసినట్టు భావిస్తున్నారు. చనిపోవడానికి ముందు హిరేన్ చివరిసారిగా ఎక్కడకు వెళ్లారనేది దాదాపు గుర్తించామని ఓ ఏటీఎస్ అధికారి వ్యాఖ్యానించారు. మాస్క్, హ్యాండ్ కర్చీఫ్‌లు హిరేన్ ముఖంపై ఉన్నట్టు దర్యాప్తులో వెల్లడయ్యింది. ‘ఆయన పొట్టలో నీళ్లు తాగినట్టు, శరీరంపై ఇసుక ఆనవాళ్లు లేవు.. ముక్కు ఎడమ రంధ్రం, భుజాలపై గాయాల గుర్తులు ఉన్నాయి.. హిరేన్‌ను హత్యచేసిన తర్వాత సముద్ర పాయలోకి విసిరేశారు.. కెరటం ఉద్ధృతికి మృతిదేహం కొట్టుకొచ్చింది’ అని పోలీస్ వర్గాలు పేర్కొన్నాయి. సచిన్ వాజే తమ వాహనాన్ని గత నవంబరు నుంచి ఫిబ్రవరి 19 వరకు వినియోగించినట్టు హిరేన్ భార్య ఆరోపించగా.. పోలీస్ అధికారి దీనిని ఖండించారు. అయితే, హిరేన్ కనిపించకుండాపోయిన రాత్రి వాజే మొబైల్, సీడీఆర్ లొకేషన్ దక్షిణ ముంబయిలో ఉన్నట్టు సాంకేతిక ఆధారాలు వెల్లడిస్తున్నాయని విశ్వసనీయ వర్గాలు తెలిపాయి. హిరేన్ సోదరుడు, ఆయన కుమారుడిని ఏటీఎస్ అధికారులు శుక్రవారం తొమ్మిది గంటల పాటు విచారించి, వాంగ్మూలం నమోదుచేశారు.


By March 13, 2021 at 12:23PM


Read More https://telugu.samayam.com/latest-news/india-news/ambani-suv-case-ats-sure-hiren-was-killed-waze-seeks-pre-arrest-bail/articleshow/81480823.cms

No comments