లైంగిక వేధింపుల కేసుల్లో బెయిల్.. కింది కోర్టులకు సుప్రీంకోర్టు సప్త సూత్రాలు
లైంగిక వేధింపుల కేసుల్లో ఇటీవల దిగువ కోర్టులు ఇచ్చిన తీర్పులు విస్మయానికి గురిచేస్తుండటంతో సర్వోన్నత న్యాయస్థానం కీలక నిర్ణయం తీసుకుంది. కింది కోర్టులకు ఏడు సూత్రాలతో కూడిన మార్గదర్శకాలను గురువారం విడుదల చేసింది. లైంగిక వేధింపుల కేసులో నిందితుడికి బెయిల్ మంజూరు చేస్తూ.. బాధితురాలితో రాఖీ కట్టించుకోవాలని మధ్యప్రదేశ్ హైకోర్టు షరతు విధించడం.. ఇటీవల బాంబే హైకోర్టు పోక్సో కేసులో తీర్పులు వివాదాస్పదమైన విషయం తెలిసిందే. మధ్యప్రదేశ్ హైకోర్టు ఉత్తర్వులను సవాల్ చేస్తూ.. 9 మంది మహిళా న్యాయవాదులు సుప్రీంకోర్టులో పిటిషన్ వేశారు. ⍟ ఈ పిటిషన్ విచారణ సందర్భంగా.. కింది కోర్టుల జడ్జిలకు నిరంతర శిక్షణ అవసరం అని అభిప్రాయపడింది. లైంగిక నేరాల విచారణ సందర్భంగా ఏడు ప్రధాన సూత్రాలను పాటించాలని పేర్కొంటూ జస్టిస్ ఏఎం ఖన్విల్కర్, జస్టిస్ రవీంద్ర భట్ల ధర్మాసనం పలు అనుబంధ సూచనలు చేసింది. ⍟ బెయిల్ షరతుల్లో బాధితురాలిని నిందితుడు కలవాలని సూచించరాదు. ఇటువంటి పరిస్థితులలో నిందితుడి నుంచి బాధితురాలిని రక్షించడానికి ప్రయత్నించాలి. ⍟ నిందితుడికి బెయిల్ ఇవ్వడం వల్ల తనకు ముప్పందని బాధితురాలు, పోలీసుల నివేదికలు భావించినప్పుడు భద్రత కల్పించేలా ఆదేశాలివ్వాలి. ఆమె కలవొద్దని నిందితుడిని స్పష్టంగా హెచ్చరించాలి. ⍟ నిందితుడికి బెయిల్ ఇచ్చిన విషయాన్ని బాధితురాలికి వెంటనే తెలియజేయాలి. ఆమెకు రెండు రోజుల్లో బెయిల్ కాపీలు అందేలా ఏర్పాట్లు చేయాలి. ⍟ బెయిల్ షరతులు, ఉత్తర్వులు ఖచ్చితంగా క్రిమినల్ ప్రొసీజర్ కోడ్ అవసరాలకు అనుగుణంగా ఉండాలి. బాధితురాలి ఆహార్యం, ప్రవర్తన, విలువలను ఉటంకించకూడదు. పితృస్వామ్య భావజాలాలు ప్రతిబింబించకూడదు. ⍟ నిందితుడు, బాధితురాలి మధ్య మధ్యవర్తిత్వం, వివాహం చేసుకునేలా ప్రతిపాదించడం వంటి రాజీ చర్యలకు అవకాశమివ్వరాదు. ⍟ విచారణ, వాదనలు, తీర్పు ఇలా అన్ని సమయాల్లో.. న్యాయమూర్తులు బాధితుల పట్ల సున్నితత్వాన్ని ప్రదర్శించాలి. బాధితురాలికి భరోసా కల్పించాలి. ⍟ న్యాయ వ్యవస్థపై బాధితులకు విశ్వాసం కోల్పోవడానికి దోహదపడే పదాలను మాట్లాడం, రాయడం వంటివి చేయరాదు. మరికొన్ని సూచనలు మహిళలు అబలలు, బలహీనురాలు అందుకే వారికి భద్రత కావాలి అనే ధోరణి తగదు. వారు అసమర్థులు, సొంతంగా నిర్ణయాలు తీసుకోలేరనే భావనలను దిగువ కోర్టులు విడనాడాలి. మగవారే ఇంటికి పెద్ద దిక్కు. నిర్ణయాధికారం వారిదే.. మాతృత్వం మహిళ విధి అనే ధోరణిని జడ్జిలు విడిచిపెట్టాలి. రాత్రిళ్లు ఒంటరిగా ఉండటం.. వస్త్రధారణ వల్ల మహిళలు లైంగిక దాడికి గురయ్యారనే ఆలోచనలను పక్కనబెట్టాలి. బాధితురాలికి మద్యం, ధూమపానం వంటి అలవాట్లున్నంత మాత్రాన.. ఆమె నిందితుడికి సహకరించిందని ఎట్టి పరిస్థితుల్లోనూ భావించరాదు.
By March 19, 2021 at 07:04AM
No comments