మరో మలుపు తిరిగిన అంబానీ బెదిరింపుల కేసు.. ఆ కారు నిలిపిందే పోలీస్ అధికారే!
పారిశ్రామికవేత్త ముకేశ్ అంబానీ ఇంటికి సమీపంలో కనుగొన్న పేలుడు పదార్థాల వాహనం కేసు రోజుకో మలుపు తిరుగుతోంది. జాతీయ దర్యాప్తు సంస్థ (ఎన్ఐఏ) విచారణంలో విస్తుగొలిపే నిజాలు వెలుగులోకి వస్తున్నాయి. ఈ కేసులో ఇటీవల అరెస్టయిన పోలీసు అధికారి పేలుడు పదార్థాలతో కూడిన వాహనాన్ని అంబానీ ఇంటి వద్ద ఉంచినట్టు నిర్ధారించింది. ‘తనను ఎవరూ గుర్తుపట్టకుండా ఉండేందుకు తలకు పెద్ద వస్త్రాన్ని సచిన్ వాజే చుట్టుకున్నట్టు సీసీటీవీ ఫుటేజ్లో గుర్తించారు. ఆయన పీపీఈ కిట్ కాకుండా కుర్తా పైజామా, ముఖానికి మాస్క్ ధరించాడు’ అని ఎన్ఐఏ తెలిపింది. ‘సచిన్ వాజే క్యాబిన్ నుంచి మంగళవారం ల్యాప్టాప్ను స్వాధీనం చేసుకున్నాం.. కానీ అందులోని డేటాను మొత్తం డిలీట్ చేశారు.. తన సెల్ఫోన్ గురించి అడిగితే అతను దానిని ఎక్కడో వదిలివేశానని చెప్పాడు.. కానీ వాస్తవం ఏమిటంటే దానిని ఉద్దేశపూర్వకంగా విసిరేశాడు’ అని పేర్కొంది. కాగా, మొత్తం వ్యవహారంలో కొందరు ‘ఇతరుల’ ప్రమేయం ఉందని, వారి సూచనల మేరకే వాజే పనిచేసినట్లు ఎన్ఐఏ భావిస్తోంది. ఆధారాల సేకరణకు సచిన్ వాజేను ఎన్ఐఏ బుధవారం ఘటనాస్థలికి తీసుకెళ్లింది. థాణేలోని వాజే నివాసంలోనూ సోదాలు నిర్వహించిన అనంతరం రాత్రి 8 గంటల ప్రాంతంలో వాజేను అక్కడికి తీసుకెళ్లి ప్రశ్నించింది. పేలుడు పదార్థాలతో వాహనం తనదేనని, అంతకుముందే అది చోరీకి గురైందని గతంలో హిరేన్ మన్సుఖ్ పోలీసులకు తెలిపిన సంగతి తెలిసిందే. ఎన్ఐఏ పరిశీలించిన ఓ సీసీటీవీ ఫుటేజిలో సీఎస్ఎంటీ వద్ద మన్సుఖ్ ఉండగా ఓ మెర్సిడ్ బెంజ్ కారు వచ్చి ఆగింది.. అందులోకి మన్సుఖ్ ఎక్కడం వెంటనే అది వేగంగా వెళ్లిపోవడాన్ని గుర్తించారు. ఆ తర్వాతే మన్సుఖ్ అదృశ్యం కావడం, అనంతరం అతను శవమై కనిపించడంతో దర్యాప్తులో ఈ కారు కీలకం కానుందని ఎన్ఐఏ భావిస్తోంది. వాజేను మార్చి 25 వరకు కస్టడీకి తీసుకున్నారు. అతడికి కోర్టు ముందస్తు బెయిల్ ఇవ్వడానికి నిరాకరించింది. ముంబయి క్రైంబ్రాంచి అధికారి రియాజుద్దీన్ ఖాజీని వరుసగా నాలుగో రోజు (బుధవారం) ఎన్ఐఏ ప్రశ్నించింది. క్రైంబ్రాంచికి చెంది అసిస్టెంట్ పోలీసు ఇన్స్పెక్టర్ ప్రకాశ్ హోవల్ కూడా ఎన్ఐఏ ఎదుట హాజరయ్యారు.
By March 18, 2021 at 08:16AM
No comments