Breaking News

భారత్-చైనా సరిహద్దుల్లో బలగాల ఉపసంహరణ.. అమెరికా ఆసక్తికర వ్యాఖ్యలు


తూర్పు లడఖ్ సరిహద్దుల్లో భారత్, చైనాల మధ్య గతేడాది మే మొదటి వారం నుంచి కొనసాగుతున్న ఉద్రిక్తతలు తగ్గించడానికి ఇరు దేశాలు చేసిన ప్రయత్నాలను అమెరికా స్వాగతించింది. పరిస్థితిని నిశితంగా గమనిస్తున్నామని, ఇరు వర్గాలూ శాంతియుత పరిష్కారం దిశగా పనిచేస్తున్నాయని పేర్కొంది. తూర్పు లడఖ్‌ సరిహద్దుల్లోని పాంగాంగ్ సరస్సు ఉత్తర, దక్షిణ తీరంలో బలగాల వెనక్కు మళ్లింపు విషయంలో భారత్, చైనాలు ఓ ఒప్పందానికి వచ్చాయని కేంద్ర రక్షణ మంత్రి రాజ్‌నాథ్ సింగ్ గురువారం రాజ్యసభలో ప్రకటించిన విషయం తెలిసిందే. ఈ నేపథ్యంలో అగ్రరాజ్యం అమెరికా స్పందించింది. ‘బలగాల ఉపసంహరణ నివేదికలను మేము నిశితంగా గమనిస్తున్నాం... ఉద్రిక్తతను తగ్గించడానికి కొనసాగుతున్న ప్రయత్నాలను మేం స్వాగతిస్తున్నాం’ అని అమెరికా విదేశాంగ శాఖ అధికార ప్రతినిధి వ్యాఖ్యానించారు. ‘ఇరు వర్గాలు శాంతియుత పరిష్కారం కోసం ప్రయత్నిస్తున్నాయి.. అయినప్పటికీ పరిస్థితిని మేం నిశితంగా గమనిస్తూనే ఉంటాం’ అని భారత్, చైనాల బలగాల ఉపసంహరణపై అడిగిన ఓ ప్రశ్నకు సమాధానం ఇచ్చారు. కాంగ్రెస్ సభ్యుడు, విదేశీ వ్యవహారాల కమిటీలో ఉన్న రిపబ్లిక్ నేత మైకేల్ మెక్‌కౌల్ సైతం చైనా, భారత్ బలగాల ఉపసంహరణ ప్రక్రియను స్వాగతించారు. ‘భారతదేశం తన సార్వభౌమత్వాన్ని కాపాడుకోవడానికి బలంగా నిలబడటం హృదయపూర్వకంగా అభినందిస్తున్నా’ అని ఆయన ట్వీట్ చేశారు. ‘చైనా కమ్యూనిస్ట్ తూర్పు నుంచి దక్షిణ చైనా సముద్రంలోని మెకాంగ్ జలాలు, హిమాలయాల వరకు చైనా కమ్యూనిస్ట్ పార్టీ స్థిరమైన ప్రాదేశిక దురాక్రమణకు ప్రయత్నిస్తోంది.. 21వ శతాబ్దంలో దాని ఆటలు సాగవు’ అని ఘాటు వ్యాఖ్యలు చేశారు. గతేడాది మే తొలివారం నుంచి భారత్, చైనా సైనికుల మధ్య సరిహద్దుల్లో ప్రతిష్టంభన కొనసాగుతుండగా.. జూన్‌లో జరిగిన గల్వాన్ లోయ ఘర్షణ తర్వాత ఉద్రిక్తతలు తారాస్థాయికి చేరాయి. జూన్ 15న గల్వాన్‌ లోయ వద్ద చోటుచేసుకున్న ఘర్షణలో 20 మంది భారత సైనికులు ప్రాణాలు కోల్పోయారు. దీంతో సరిహద్దులకు ఇరు దేశాలూ భారీగా బలగాలు, ఆయుధాలను తరలించాయి. చైనా మాత్రం తనవైపు జరిగిన ప్రాణనష్టం గురించి ఎటువంటి ప్రకటన చేయలేదు. అయితే, దాదాపు 45 మంది చైనా సైనికులు ఈ ఘర్షణలో చనిపోయినట్టు ఇటీవల రష్యా వెల్లడించింది.


By February 12, 2021 at 12:02PM


Read More https://telugu.samayam.com/latest-news/international-news/us-welcomed-india-china-troop-disengagement-process-in-eastern-ladakh/articleshow/80875709.cms

No comments