రైతులను కలిసేందుకు వెళ్లిన విపక్ష ఎంపీలకు యూపీ పోలీసులు షాక్!
నూతన వ్యవసాయ చట్టాలకు వ్యతిరేకంగా నిరసనలు కొనసాగిస్తోన్న రైతులకు సంఘీభావం తెలిపేందుకు విపక్ష ఎంపీల బృందం గురువారం ఉదయం ఘాజీపూర్ సరిహద్దుకు చేరుకుంది. ఆందోళన చేస్తున్న రైతులను కలిసేందుకు ఢిల్లీ పోలీసులు అనుమతించినా.. సరిహద్దుల్లోని ఉత్తర్ ప్రదేశ్ పోలీసులు విపక్ష ఎంపీల బృందాన్ని అడ్డుకున్నారు. రైతుల ఆందోళనల గురించి వారితో మాట్లాడతామని చెప్పినా పోలీసులు అనుమతించలేదు. దీంతో అక్కడ నిరసన తెలియజేశారు. పది పార్టీలకు చెందిన 15 మంది ఎంపీలు ఈ బృందంలో ఉన్నారు. ఎన్సీపీ నేత శరద్ పవార్ కుమార్తె, ఎంపీ సుప్రియా సూలే, డీఎంకే ఎంపీ కనిమొళి, టీఎంసీ నుంచి సౌగత్ రాయ్, అకాళీదళ్కు చెందిన హర్సిమ్రత్ కౌర్ బాదల్ తదితరులు ఇందులో ఉన్నారు. సరిహద్దులోనే తమను నిలిపి వేసి, గాజీపూర్ దాటి వెళ్లేందుకు అనుమతించడం లేదని చెప్పారు. ఈ సందర్భంగా అకాళీదళ్ ఎంపీ హర్సిమ్రత్ కౌర్ మాట్లాడుతూ... ‘రైతుల నిరసనలపై లోక్సభలో మాట్లాడేందుకు స్పీకర్ అనుమతి ఇవ్వడంలేదు.. సరిహద్దుల్లో ఆందోళన చేస్తున్న నేపథ్యంలో పరిస్థితులను తెలుసుకునేందుకే ఇక్కడికి వచ్చాం... రైతులతో తాము మాట్లాడి తీరుతాం’ అని ఆమె స్పష్టం చేశారు. ‘ఘాజీపూర్ సరిహద్దులో సృష్టించిన పరిస్థితులను కళ్లారా చూశాం.. అన్నదాత పట్ల వ్యవహరిస్తున్న తీరుచూసి షాక్ తిన్నాం.. కోట మాదిరిగా రైతుల బారికేడ్ల చుట్టూ కాంక్రీట్ అడ్డంకులు, ముళ్ల తీగ కంచె ఏర్పాటు చేశారు.. అంబులెన్సులు, అగ్నిమాపక యంత్రాలు కూడా నిరసన ప్రదేశంలోకి ప్రవేశించలేవు’ అని ఆమె ఆవేదన వ్యక్తం చేశారు. మరోవైపు, రైతులు బయటకు రాకుండా, ఇతరులు లోపలికి వెళ్లకుండా సరిహద్దుల వద్ద బారికేడ్ల ముందు ఏర్పాటు చేసిన మేకులను రైతులు తొలగించారు. దీంతో ఉద్రిక్తత నెలకొంది. రిపబబ్లిక్ డే సందర్భంగా రైతులు చేపట్టిన ట్రాక్టర్ల ర్యాలీ హింసాత్మకంగా మారడంతో ఢిల్లీ సరిహద్దుల్లో సిమెంట్ దిమ్మెలతో బారికేడ్లు, ఇనుప తీగలతో కంచెను పోలీసులు ఏర్పాటుచేశారు. పలు మార్గాలను కూడా గురువారం ఉదయం పోలీసులు మూసివేశారు. ఇక్కడ పరిస్థితుల గురించి, ఏం జరుగుతుందో అఖిలపక్షం వివరించనుందని హర్స్రిమత్ కౌర్ అన్నారు.
By February 04, 2021 at 12:02PM
No comments