Breaking News

స్వలింగ వివాహాలపై కుండబద్దలుకొట్టిన కేంద్రం.. ఢిల్లీ హైకోర్టులో అఫిడ్‌విట్


స్వలింగ వివాహాలపై కేంద్ర ప్రభుత్వం తన వైఖరిని స్పష్టం చేసింది. ఈ వివాహాలకు చట్టబద్దత కల్పించాలని కోరే రాజ్యాంగ హక్కు లేదని పేర్కొంది. భారతదేశంలో వివాహం కేవలం ఇద్దరు వ్యక్తులు కలవడం మాత్రమే కాదని, ఒక జీవసంబంధమైన పురుషుడు, స్త్రీ మధ్య కుటుంబ విభాగంగా ఉన్న సంస్థ అని తెలిపింది. ఈ మేరకు ఢిల్లీ హైకోర్టులో అఫిడ్‌విట్ దాఖలు చేసింది. ప్రత్యేక వివాహ చట్టం (ఎస్‌ఎంఏ), విదేశీ వివాహ చట్టం (ఎఫ్‌ఎంఏ) కింద స్వలింగ వివాహాలను గుర్తించాలా? వద్దా? అన్న అంశంపై వైఖరి తెలియజేయాలని కేంద్రాన్ని గతంలో ఆదేశించిన విషయం తెలిసిందే. ‘కుటుంబ సమస్యలు ఒకే జెండర్‌కు చెందిన వ్యక్తుల మధ్య వివాహం గుర్తింపు, నమోదుకు మించినవి.. స్వలింగ సంపర్కులు భాగస్వాములుగా కలిసి జీవించడం, లైంగిక సంబంధం కలిగి ఉండటం (ఇది ఇప్పుడు విచక్షణారహితంగా ఉంది) భారతీయ కుటుంబ వ్యవస్థలోని భర్త, భార్య, పిల్లలు భావనతో పోల్చలేరు.. ఇది తప్పనిసరిగా పురుషుడు 'భర్త', స్త్రీ 'భార్య'గా వీరి కలయిక వల్ల పిల్లలు పుడతారు’ అని అఫిడ్‌విట్‌లో పేర్కొంది. స్వలింగ జంటలు తమ భాగస్వామిని ఎన్నుకోవడానికి చట్టపరమైన గుర్తింపు కోరుతూ దాఖలు చేసిన పిటిషన్లను వ్యతిరేకిస్తున్నామని తెలిపింది. ఈ పిటిషన్లను కొట్టివేయాలని కోర్టును కోరిన కేంద్రం, పురుషుడిని భర్తగా, మహిళను భార్యగా పరిగణించడం మినహా ఏదైనా వివరణ చట్టబద్ధమైన నిబంధనలను పనికిరానిదిగా చేస్తుందని వ్యాఖ్యానించింది. వివాహం తప్పనిసరిగా ఇద్దరు వ్యక్తుల కలయికను సామాజికంగా గుర్తించే అంశమని కేంద్రం పేర్కొంది. ఈ విషయంలో న్యాయపరమైన జోక్యం ‘వ్యక్తిగత చట్టాల సున్నితమైన సమతుల్యతను దెబ్బతీయడానికి’కారణమవుతుందని వివరించింది. అంతేకాదు ఈ అంశంపై చట్టం రూపొందించడానికి ‘సమర్థవంతమైన శాసనసభ’కు విజ్ఞతతో కూడిన అధికారాన్ని మాత్రమే ఉందని,ఇది మానవ సంబంధాలను శాసిస్తుందని తెలిపింది. స్వలింగ సంపర్కుల మధ్య వివాహాలకు గురించి రాజ్యాంగ చట్టబద్ధత లేదని వ్యాఖ్యానించింది. స్వలింగ సంపర్కం కేవలం నేరం కాదని మాత్రమే సుప్రీంకోర్టు చెప్పిందని కేంద్రం ఉదహరించింది. ఇది ఒక నిర్దిష్ట ప్రవర్తనను మాత్రమే వివరించింది, కానీ దానిని చట్టబద్ధం చేయలేదని పేర్కొంది. ఎనిమిదేళ్లుగా సహజీవనం చేస్తున్న ఇద్దరు మహిళలు, అమెరికాలో వివాహం చేసుకున్న ఇద్దరు భారతీయ యువకులు వేర్వేరుగా ఢిల్లీ హైకోర్టులో పిటిషన్లు దాఖలు చేశారు. రాజ్యాంగంలోని ఆర్టికల్‌ 21 ప్రకారం.. నచ్చిన వ్యక్తిని వివాహం చేసుకొనే హక్కు ఉందని, అది స్వలింగ సంపర్కులకైనా వర్తిస్తుందని ఈ రెండు జంటలు పేర్కొన్నాయి.


By February 26, 2021 at 11:09AM


Read More https://telugu.samayam.com/latest-news/india-news/no-fundamental-right-to-same-sex-marriage-centre-told-to-delhi-high-court/articleshow/81222888.cms

No comments