థన్‌బర్గ్ టూల్‌కిట్ వ్యవహారంలో అరెస్ట్.. తన కేసు తానే వాదించుకున్న దిశ!
పర్యావరణ ఉద్యమకారణి గ్రేటా థన్‌బర్గ్ టూల్‌కిట్ వ్యవహారంలో బెంగళూరుకు చెందిన కార్యకర్త దిశ రవిని ఢిల్లీ పోలీసులు అరెస్ట్ చేసిన విషయం తెలిసిందే. ఆదివారం దిశ రవిని కోర్టు ముందు హాజరుపరచగా ఆమెకు ఐదు రోజుల పోలీస్ కస్టడీ విధించారు. అయితే, ఆ సమయంలో తరఫున లాయర్ ఎవరూ హాజరుకాలేదు. శనివారం మధ్యాహ్నం దిశను బెంగళూరులోని ఆమె నివాసంలో అరెస్ట్ చేసి, ఢిల్లీకి తరలించారు. దిశ రవి న్యాయవాద బృందం మాట్లాడుతూ.. ఆమెను ఏ కోర్టులో హాజరుపరిచారో న్యాయవాదులకు తెలియదని, కోర్టులో ఆమే సొంతంగా వాదనలు వినిపించిందన్నారు. న్యాయవ్యవస్థ విధులు దిగ్భ్రాంతికి గురిచేసిందని న్యాయవాది రెబక్కా జాన్ ఆరోపించారు. దిశ రవికి న్యాయ సహకారం అందజేయడంలో ఢిల్లీ పాటియాలా హౌస్ కోర్టు న్యాయమూర్తి విఫలమయ్యారని దుయ్యబట్టారు. ‘న్యాయమూర్తి విధులు తీవ్ర నిరాశకు గురిచేశాయి.. ఎటువంటి న్యాయ సహయం లేకుండా దిశ రవికి ఐదు రోజుల పోలీస్ కస్టడీ విధించారు’ అని ట్విట్టర్‌లో పేర్కొన్నారు. ‘న్యాయాధికారులు తమ రిమాండ్ విధులను తీవ్రంగా పరిగణించాలి.. రాజ్యాంగంలోని ఆర్టికల్ 22 ఆదేశాన్ని తప్పనిసరిగా పాటించేలా చూడాలి’ అని రెబక్కా అన్నారు. విచారణ సమయానికి నిందితుడు తరఫున న్యాయవాది హాజరుకాకపోతే.. మెజిస్ట్రేట్ వేచిచూడటం లేదా ప్రత్యామ్నాయంగా న్యాయ సహాయం చేయాలి’ అని చెప్పారు. ‘కేసు డైరీలు, అరెస్ట్ మెమో ఎక్కడ పరిశీలించారు? బెంగుళూరు కోర్టుల ట్రాన్సిట్ రిమాండ్ లేకుండా ఆమెను నేరుగా అక్కడ నుంచి తీసుకొచ్చి ఇక్కడ ఎందుకు ప్రవేశపెడుతున్నారు అని మేజిస్ట్రేట్ ప్రత్యేక సెల్‌ను అడిగారా?’ ప్రశ్నించారు. రైతుల ఉద్యమానికి మద్దతుగా పర్యావరణ కార్యకర్త షేర్ టూల్‌కిట్‌ను దిశ రవి ఎడిట్ చేసినట్టు పోలీసులు ఆరోపిస్తున్నారు. ఆమెపై దేశద్రోహం, కుట్ర కేసు ఆరోపణలు చేశారు. టూల్‌కిట్‌ను ఖలిస్థాన్ వేర్పాటువాదులు క్రియేట్ చేశారని, దీనిని సిద్ధం చేయడం, షేర్ చేయడంలో రవి కీలక కుట్రదారుగా ఉందని ఢిల్లీ పోలీసులు అంటున్నారు. అయితే, తాను ఎటువంటి టూల్‌కిట్ రూపొదించలేదని, కేవలం రైతులకు మద్దతుగా నిలవడానికే ఫిబ్రవరి 3 రెండు లైన్లను ఎడిట్ చేశానని కోర్టులో దిశ రవి స్పష్టం చేశారు.
By February 15, 2021 at 12:43PM
No comments