లవర్‌కు భయపడి మండపం నుంచి వరుడు పరార్.. మరో ట్విస్ట్‌తో కథ సుఖాంతం!
తెల్లారితే పెళ్లి.. వధూవరుల కుటుంబాలు అంతా సందడిగా ఉన్నాయి.. ముందు రోజు రాత్రి వరకు వివాహా వేడుకల్లో ఉత్సాహంగా ఉన్న పెళ్లికొడుకు తీరా ముహూర్తం సమయానికి కనిపించకుండా పోయాడు. ఈ హఠాత్పరిణామానికి వధువు కుటుంబసభ్యులు షాక్ తిన్నారు. అయితే, ఇదే ముహూర్తానికి తమ కుమార్తెకు వివాహం జరిపించాలని నిశ్చయించుకున్నారు. దీంతో అతిథిగా వచ్చిన ఓ యువకుడు ఈ వివాహం చేసుకోడానికి ముందకొచ్చి ఆమె మెడలో తాళికట్టాడు. ఈ ఘటన కర్ణాటకలోని చిక్‌మంగళూరులో చోటుచేసుకుంది. చిక్ మంగుళూరు జిల్లా తారికారే తాలుకాలోని దోరనాలు గ్రామానికి చెందిన సోదరులు అశోక్, నవీన్‌లకు పెళ్లి నిశ్చయమయ్యింది. ఇద్దరీకి ఒకే రోజు ఆదివారం (జనవరి 3న) న వివాహం జరిపించేందుకు ముహూర్తం నిర్ణయించారు. నవీన్‌కు చిత్రదుర్గ జిల్లా హోసదుర్గా తాలూకా సారపనహళ్లి గ్రామానికి చెందిన సింధు అనే యువతితో పెళ్లి కుదిరింది. పెళ్లి వేడుకల్లో భాగంగా శనివారం సాయంత్రం జరిగిన విందులో నవీన్, సింధులు ఉత్సాహంగా పాల్గొన్నారు. అయితే ఇంతలోనే కథ అడ్డం తిరిగింది. నవీన్ ఇదివరకే వేరే యువతితో ప్రేమలో ఉండగా.. ఆ రోజు రాత్రి ఫోన్ చేసిన ప్రియురాలు అతడిని బెదిరించింది. ఈ పెళ్లి చేసుకుంటే మండపానికి వచ్చి అతిథుల ముందు విషం తాగుతానని హెచ్చరించింది. దీంతో భయపడిపోయిన నవీన్ తుముకూరులో ఉన్న ప్రియురాలిని కలవడానికి చెప్పాపెట్టకుండా వెళ్లిపోయాడు. ముందుగా నిర్ణయించిన ముహుర్తానికే నవీన్ సోదరుడు అశోక్ వివాహం జరిగింది. కానీ, నవీన్ కనిపించకుండా పోవడంతో సింధు వివాహం ఆగిపోయింది. దీంతో ఆమె కుటుంబం తీవ్రంగా కలతచెందింది. సింధు కన్నీళ్లు పెట్టుకోవడం చూడలేక అదే మండపంలో పెళ్లి జరిపించాలనే నిర్ణయానికి తల్లిదండ్రులు వచ్చారు. ఈ వేడుకకు హాజరైన ఓ యువకుడు తాను సింధును వివాహం చేసుకుంటానని ముందుకొచ్చాడు. దీంతో బీఎంటీసీలో కండక్టర్‌గా పనిచేసే చంద్రుతో సింధుకు అదే మండపంలో పెళ్లి జరిపించారు. ఇరు కుటుంబాలకు ఇష్టమైతే సింధును పెళ్లి చేసుకోవడానికి తనకు ఎలాంటి అభ్యంతరం లేదని చెప్పడంతో కథ సుఖాంతమయ్యింది. ఇరు కుటుంబాలు చర్చల అనంతరం సింధు, చంద్రు వివాహానికి అంగీకరించడంతో అతిథిగా వచ్చిన వ్యక్తి వరుడయ్యాడు. సింధు మెడలో తాళికట్టి ఆమెను తనదానిని చేసుకున్నాడు.
By January 06, 2021 at 07:05AM
No comments