ఫైజర్ కోవిడ్ టీకాకు డబ్ల్యూహెచ్ఓ అనుమతి.. పేద దేశాలకు అందుబాటులోకి టీకా
కరోనా వైరస్ మహమ్మారికి అమెరికాకు చెందిన ఫైజర్-జర్మనీ సంస్థ బయోఎన్‌టెక్ సంయుక్తంగా అభివృద్ధి చేసిన టీకాను అత్యవసర వినియోగానికి ప్రపంచ ఆరోగ్య సంస్థ(డబ్ల్యూహెచ్‌వో) గురువారం అనుమతించింది. దీంతో ప్రపంచవ్యాప్తంగా ఈ టీకా దిగుమతి, పంపిణీకి మార్గం సుగమమైంది. అలాగే పేద దేశాలకు సైతం త్వరలోనే ఈ టీకా అందుబాటులోకి వచ్చే అవకాశం కలిగింది. ఇప్పటికే ఐరోపా, ఉత్తర అమెరికా దేశాల్లో ఈ టీకాను అత్యవసర వినియోగం కింద అనుమతించి పంపిణీ ప్రారంభించిన విషయం తెలిసిందే. అయితే, ఆయా దేశాల్లోని రెగ్యులేటరీలు సైతం ఈ టీకాకు ఆమోదం తెలపాల్సి ఉంటుంది. కానీ, సరైన ఆరోగ్య సంరక్షణ వ్యవస్థలు లేని అల్పాదాయ దేశాలకు డబ్ల్యూహెచ్‌వో ఆమోదమే కీలకంగా మారనుంది. ఫైజర్ టీకా అత్యవసర వినియోగానికి అనుమతించడం ద్వారా ప్రపంచ దేశాలు తమ వ్యాక్సిన్‌ డోసుల కొనుగోలు, పంపిణీని వేగవంతం చేసుకునే వెసులుబాటు కలుగుతుందని డబ్ల్యూహెచ్‌వో తెలిపింది. బ్రిటన్‌, అమెరికా సహా మరో 12కిపైగా దేశాల్లో వినియోగంలోకి వచ్చిన ఈ వ్యాక్సిన్‌ భద్రతా ప్రమాణాలకు అనుగుణంగా ఉందని తమ సమీక్షలో తేలినట్టు స్పష్టం చేసింది. చైనాలో ఏడాది కిందట మొదలైన కొత్తరకం కరోనా వైరస్ మహమ్మారికి అత్యవసర వినియోగం కింద తొలి టీకాను ఫైజర్-బయోఎన్‌టెక్ అందుబాటులోకి తెచ్చింది అని పేర్కొంది. కోవిడ్ టీకాలకు ప్రపంచ అనుమతి పొందే దిశలో ఇది సానుకూల దశ అని డబ్ల్యూహెచ్ఓ ఔషధ విభాగం అధికారి మరియాంజెలా సిమావో వ్యాఖ్యానించారు. ‘ప్రతిచోటా ప్రాధాన్యతను బట్టి జనాభా అవసరాలను తీర్చడానికి తగినంత టీకా డోసులను సరఫరాను సాధించడానికి ప్రపంచం ఇంకా ఎక్కువగా ప్రయత్నించాల్సిన అవసరాన్ని నేను నొక్కిచెప్పాలనుకుంటున్నాను’ అని పేర్కొన్నారు. కోవిడ్ నిరోధక టీకాల రవాణాలో యునిసెఫ్ కీలక పాత్ర పోషించనుంది. ఫైజర్ టీకాను మైనస్ 70 డిగ్రీలో వాతావరణంలో నిల్వ చేయాల్సి ఉంటుంది. కానీ, ఇటువంటి సౌకర్యాలు లేని పేద దేశాలకు ఈ టీకా అందిపుచ్చుకోవడం పెద్ద సవాల్‌. అయితే, అలాంటి దేశాలకు తమ సహకారం అందిస్తామని డబ్ల్యూహెచ్‌వో హామీ ఇచ్చింది. ఇప్పటికే దానికి సంబంధించిన ప్రణాళికల్ని రూపొందిస్తున్నట్లు తెలిపింది.
By January 01, 2021 at 10:42AM
No comments