పగ్గాలు చేపట్టిన మర్నాడే భారతీయులకు బైడెన్ తీపి కబురు.. ట్రంప్ విధానానికి స్వస్తి!
అమెరికా 46వ అధ్యక్షుడిగా బాధ్యతలు చేపట్టిన రోజే 15 అంశాలకు సంబంధించిన కార్వనిర్వహక ఉత్తర్వులపై సంతకం చేసిన విషయం తెలిసిందే. వీటిలో మాజీ అధ్యక్షుడు తీసుకున్న అనేక వివాదాస్పద నిర్ణయాలను బైడెన్ పక్కనబెట్టారు. మెక్సికో సరిహద్దుల్లో గోడ నిర్మాణం, వాతావరణ మార్పులపై పారిస్ ఒప్పందం, డబ్ల్యూహెచ్ఓ‌లో తిరిగి చేరడం, వలస విధానం సహా పలు కీలక అంశాలు ఉన్నాయి. ఈ నేపథ్యంలో విదేశీయుల డాలర్ డ్రీమ్స్ ఆశలు మళ్లీ చిగురిస్తున్నాయి. డొనాల్డ్‌ ట్రంప్ అనుసరించిన కఠినమైన వలస విధానాన్ని పక్కన పెట్టి ఓ సమగ్ర సంస్కరణ బిల్లును బైడెన్ యంత్రాంగం సిద్ధం చేసింది. యూఎస్‌ సిటిజన్‌షిప్‌ చట్టం-2021 పేరుతో తీసుకొచ్చిన ఈ బిల్లుపై బాధ్యతలు చేపట్టిన కొద్ది గంటల్లోనే అధ్యక్షుడు జో బైడెన్ సంతకం చేసి ఆమోదం కోసం కాంగ్రెస్కు పంపారు. అక్రమంగా ఉంటున్నవారిని బలవంతంగా పంపే కార్యక్రమాన్ని కూడా మార్చి 21 వరకు నిలిపేయాలని ఆదేశించారు. బైడెన్ నిర్ణయంతో కేవలం హెచ్‌-1బీ వీసాదారులే కాదు, వారి కుటుంబీకులు, డిపెండెంట్స్‌ అందరికీ ఊరట లభించింది. హెచ్‌1బీ వీసా విధానం ద్వారా విశేష ప్రయోజనం పొందుతున్న భారతీయ సాంకేతిక నిపుణులకు, ఇతర వృత్తి నిపుణులు, విద్యార్థులకు ఈ బిల్లు కొత్త ఏడాదిలో మళ్లీ డాలర్ డ్రీమ్స్‌ను చిగురింపచేసిందనడంలో సందేహాం లేదు. ‘అధ్యక్షుడు జో బైడెన్ ఇమిగ్రేషన్‌ బిల్లును ఈ రోజు కాంగ్రెస్కు పంపారు. ఈ కొత్త పౌరసత్వ చట్టం మా వలస విధానాన్ని మరింత ఆధునికీకరిస్తుంది. అమెరికా సుసంపన్నం కావడానికి దశాబ్దాలుగా కఠిన శ్రమ కోర్చిన అనేకమందికి పౌరసత్వం పొందే అవకాశాన్ని ఈ బిల్లు కల్పిస్తోంది. మా అధ్యక్షుడి ప్రాధాన్యతలు దీని ద్వారా స్పష్టమవుతాయి. సరిహద్దులను బాధ్యతాయుతంగా నిర్వహించడం, కుటుంబాలు కలిసుండేలా చేయడం, ఆర్థికవృద్ధి, మధ్య అమెరికా దేశాల నుంచి వలసలకు మూలకారణాలను అన్వేషించడం వీటిలో ప్రధానమైనవి. శరణార్థులకు అమెరికా ఆశ్రయ దేశం కానుంది’ అని వైట్‌హౌస్‌ ప్రెస్‌ సెక్రటరీ జెన్‌ సాకీ మీడియాకు చెప్పారు. పనిచేసే ప్రతీ ఉద్యోగీ, కార్మికుడినీ పరిరక్షించే విధంగా బిల్లు ఉంటుందన్నారు. తాజా బిల్లుతో ఉపాధి-ఆధారిత గ్రీన్‌కార్డు లభించడానికి దేశాలకున్న పరిమితులు తొలగిపోతాయి. ఈ పరిమితి వల్ల భారతీయులు, ముఖ్యంగా సాఫ్ట్‌వేర్ నిపుణులు ఎంతో నష్టపోతున్నారు. ఇప్పటి వరకు దేశాల పరిమితి 7 శాతం ఉండగా చిన్న, పెద్ద దేశాలనే తేడా లేదు. తాజాగా వాటిని ఎత్తేస్తున్నారు. వాస్తవానికి ఈ పరిమితిని 7% నుంచి 15 శాతానికి పెంచుతూ ‘ఫెయిర్‌నెస్‌ ఫర్‌ హైస్కిల్డ్‌ ఇమిగ్రెంట్స్‌ ఏక్ట్‌’ను సెనెట్‌ గత డిసెంబరులో ఆమోదించినా అందులో కఠిన నిబంధనలు, ఆంక్షలు విధించారు. వాటిని తొలగించి తాజా బిల్లు తెస్తున్నారు. బైడెన్ నిర్ణయంతో ఉపాధి-ఆధారిత వీసాల కోసం దరఖాస్తు చేసి పెండింగ్‌లో ఉన్న వేలాదిమందికి ఊరట కలగనుంది. అలాగే, హెచ్‌1బీ వీసాదారుల సంబంధీకులకు ఇక ఉద్యోగం చేసుకునే అవకాశం ఉంటుంది. భార్య లేదా డిపెండెంట్స్‌ ఎవరైనా సరే... వర్క్‌ పర్మిట్లు పొందడానికి అర్హులు. విద్య, ఉపాధి, ప్రత్యేక సేవలు పొందడానికి పిల్లలకున్న వయసు అడ్డంకి నిబంధన ఎత్తివేయనున్నారు. అమెరికన్‌ వర్కర్లతో అవాంఛనీయ పోటీ నివారించడానికి అత్యంత నైపుణ్యమున్న నాన్‌ ఇమిగ్రెంట్స్‌కు కంపెనీలు భారీ వేతనాలు చెల్లించడానికి ముందుకొస్తాయి. అమెరికాలో చదువుకునే ‘స్టెమ్‌’ (సైన్స్‌, టెక్నాలజీ, ఇంజనీరింగ్‌, మేథమేటిక్స్‌) గ్రాడ్యుయేట్లు, ఇతర ఉన్నత విద్యావంతులు దేశంలో ఉండేందుకు వెసులుబాటు లభిస్తుంది. అమెరికాలో జనాభా లెక్కలకు అందని ఇమ్మిగ్రెంట్లు దాదాపు 1.20 కోట్ల మంది ఉన్నారు. వారు దేశంలో కొనసాగేందుకు తాత్కాలిక చట్టబద్ధ హోదా కల్పిస్తారు. వీరు వెంటనే గ్రీన్‌కార్డులకు దరఖాస్తు చేసుకోవచ్చు. ఐదేళ్లపాటు అన్ని ప్రక్రియలూ పరిశీలిస్తారు. అన్నీ సక్రమంగా ఉంటే గ్రీన్‌కార్డు మంజూరు చేస్తారు. ఆ తరువాత అవసరమైన ఇతర సంబంధిత డాక్యుమెంట్లు పరిశీలించి, అమెరికా పౌర సంస్కృతిని అనుసరించగలిగితే వారికి దేశ పౌరసత్వం అందజేస్తారు. చట్టబద్ధ హోదా లేకుండా ఉంటున్నా లేదా గ్రీన్‌కార్డు కోసం దరఖాస్తు చేసుకున్న వ్యక్తులు 2021 జనవరి 1 నాటికి భౌతికంగా అమెరికాలోనే ఉండాలి. 2017 జనవరి 20కి లేదా ఆ తరువాత బలవంతంగా దేశం నుంచి పంపేసిన వాళ్ల విషయంలో అన్నింటినీ పరిశీలించి డీహెచ్ఎఫ్ మినహాయింపుతో వారికి ఓ అవకాశం కల్పిస్తారు. కానీ, వారు అంతకు మూడేళ్ల ముందు నుంచీ దేశంలోనే ఉండాలి. తక్కువ వేతనంతో ఉద్యోగం చేసే విదేశీయులు కూడా గ్రీన్‌కార్డులు పొందేందుకు మరింత స్వేచ్ఛ లభిస్తుంది. ఇమిగ్రేషన్‌ చట్టాల్లో విదేశీ (ఎలైన్‌) అన్న పదం స్థానంలో నాన్‌-సిటిజన్‌ అన్న పదాన్ని చేరుస్తారు. కుటుంబ-ఆధారిత ఇమ్మిగ్రేషన్‌ వ్యవస్థలోనూ సంస్కరణలు తీసుకొస్తారు. కొత్త బిల్లు ప్రకారం వీసాలను 55 వేల నుంచి 80వేలకు పెంచుతారు.
By January 22, 2021 at 08:58AM
No comments