అధ్యక్ష పీఠం నుంచి దిగిపోతూ భారతీయులకు షాక్ ఇచ్చిన ట్రంప్

అధికార పీఠం నుంచి దిగిపోవడానికి ముందు అమెరికా అధ్యక్షుడు మరో సంచనల నిర్ణయం తీసుకున్నారు. హెచ్-1బీ వీసాలు, విదేశీ వర్క్ వీసాలపై మరో మూడు నెలల పాటు నిషేధం పొడిగించారు. ట్రంప్ నిర్ణయం అమెరికా, భారతీయ ఐటీ సంస్థల్లో పెద్ద సంఖ్యలో పనిచేసే భారతీయ ఐటీ నిపుణులపై ప్రభావం చూపనుంది. అలాగే అమెరికా చట్టాలను ఉల్లంఘించిన తమ పౌరులను వెనక్కి రప్పించడానికి నిరాకరిస్తున్న దేశాలపై విధించిన వీసా ఆంక్షల్నీ పొడిగిస్తున్నట్లు ప్రకటించారు. గతేడాది ఏప్రిల్‌ నుంచి క్రమంగా అమల్లోకి వచ్చిన ఈ నిషేధాల గడువు డిసెంబరు 31, 2020తో ముగిసింది. మరోవైపు కొత్తగా అమెరికాలోకి రావాలనుకుంటున్న విదేశీయులు సొంతంగా ఆరోగ్య బీమా కలిగి ఉండాలంటూ ట్రంప్‌ గతంలో తీసుకున్న నిర్ణయాన్ని ఫెడరల్‌ అప్పీల్స్‌ కోర్టు సమర్థించింది. అమెరికన్ల ఉద్యోగాలను రక్షించేందుకు ఈ నిర్ణయం తీసుకున్నట్లు డొనాల్డ్ ట్రంప్‌ వెల్లడించారు. ‘కోవిడ్-19 అమెరికన్ల జీవనోపాధిని గణనీయంగా దెబ్బతీస్తోంది. యూఎస్‌లో నవంబర్ మొత్తం నిరుద్యోగిత రేటు 6.7 శాతం.. ఇది ఏప్రిల్ గరిష్ట స్థాయి నుంచి గణనీయమైన క్షీణతను ప్రతిబింబిస్తుంది.. 2020 ఫిబ్రవరి కంటే నవంబర్‌లో కాలానుగుణంగా సర్దుబాటు చేసిన 9,834,000 ఉద్యోగాలు ఉన్నాయి’ అన్నారు. ‘అంతేకాకుండా, వ్యాపార కార్యకలాపాలపై రాష్ట్రాలు నిరంతరం ఆంక్షలు విధించడం వంటి చర్యలు 2020 ఫిబ్రవరితో పోల్చితే కొత్తగా నియమించుకునే కార్మికుల సంఖ్యను ఇప్పటికీ ప్రభావితం చేస్తున్నాయి’ అని పేర్కొన్నారు. ప్రస్తుతం అమెరికాలో దాదాపు రెండు కోట్ల మందికి ప్రభుత్వం అందజేస్తున్న నిరుద్యోగ ప్రయోజనాలు లభిస్తున్నాయి. కరోనా వైరస్ కట్టడికి విధించిన ఆంక్షలు అమల్లోకి వచ్చిన కొద్దీ ఉపాధి కోల్పోయిన వారి సంఖ్య పెరుగుతూ వచ్చింది. దీంతో విదేశీయులకు ఉన్న పలు ప్రయోజనాలపై ఏప్రిల్‌ నుంచి ట్రంప్‌ నిషేధం విధిస్తూ వచ్చారు. తొలుత అమెరికాలో నివసిస్తున్న విదేశీయులకు జారీ చేసే గ్రీన్‌ కార్డులపై నిషేధం విధించారు. అనంతరం దాన్ని హెచ్‌-1బీ, హెచ్‌-2బీ, జే-1, ఎల్‌-1 వీసాలకు కూడా వర్తింపజేశారు. ట్రంప్ నిర్ణయాన్ని అక్కడి వ్యాపార, వాణిజ్య వర్గాలు తీవ్రంగా వ్యతిరేకించాయి. కోర్టుల్లో సవాల్‌ చేసి, అధ్యక్షుడి అనాలోచిత నిర్ణయం వల్ల వ్యాపారాలు, సంస్థలే నష్టపోతున్నాయని గట్టిగా వాదించాయి. దీంతో ట్రంప్‌ ఉత్తర్వుల్ని నిలిపివేయాలని కాలిఫోర్నియా ఫెడరల్‌ జడ్జి ఆదేశించారు. వీసాలపై నిషేధం వల్ల పూడ్చలేని నష్టం జరిగే ప్రమాదం ఉందని అభిప్రాయపడ్డారు.

By January 01, 2021 at 12:03PM

Read More https://telugu.samayam.com/latest-news/international-news/us-president-donald-trump-extends-freeze-on-h-1b-other-work-visas-until-march-31/articleshow/80057422.cms