హిమాచల్‌లో 2,300 విదేశీ పక్షుల మృతి.. గుట్టువిప్పిన శాస్త్రవేత్తలు
కరోనా వైరస్ మహమ్మారి నుంచి ఇప్పుడిప్పుడే కోలుకుంటున్న ప్రజలకు బర్డ్ ఫ్లూ రూపంలో మరో ముప్పు ముంచుకొస్తోంది. బర్డ్ ఫ్లూతో దేశవ్యాప్తంగా పలు రాష్ట్రాల్లో వందలాది పక్షులు మృత్యువాతపడుతున్నాయి. రాజస్థాన్, మధ్యప్రదేశ్‌లో వందలాది కాకులు, కేరళలో వేలాది బాతులు, హిమాచల్ ప్రదేశ్‌లో విదేశీ పక్షులు భారీగా మృతిచెందాయి. రాజస్థాన్‌లోని ఝలావార్‌లో సోమవారం మరో 172 కాకులు చనిపోయాయి. అటు, హిమాచల్ ప్రదేశ్ కాంగడా పరిధిలోని పాంగ్ సరస్సులో2,300 వలస పక్షులు డెత్ మిస్టరీ బయటపడింది. వారం రోజుల క్రితం పాంగ్ చిత్తడి నేలలో పక్షుల కళేబరాలను జీవశాస్త్రవేత్తలు గుర్తించారు. అంతరించే దశలో ఉన్న బాతు ఆకారంలో ఉండే బార్ హెడెడ్‌ గూస్ 1000కిపైగా ఉండగా.. షోవెలెర్, రివర్ టర్న్, బ్లాక్‌ హెడెడ్‌ గల్‌, కామన్ టీల్ వంటివి పక్షులు ఇందులో ఉన్నాయి. ఈ పక్షుల మృతదేహాలకు నిర్వహించిన పరీక్షల్లో హెచ్ 5ఎన్ 1 వైరస్ గుర్తించారు. దీంతో ఇది బర్డ్ ఫ్లూగా నిర్ధారించారు. ఈ పక్షుల నమూనాలను సేకరించి, భోపాల్‌లోని ల్యాబ్‌లో పరీక్షించగా పాజిటివ్‌గా వచ్చింది. భారీ సంఖ్యలో పక్షులు మృతి చెందడంతో అధికారులు మందు జాగ్రత్త చర్యలు తీసుకుంటున్నారు. ఇందులో భాగంగానే ఈ ప్రాంతాల సందర్శనకు పర్యాటకులు రావద్దని సూచించారు. హిమాచల్ ప్రదేశ్ రాజధాని సిమ్లాకు 300 కిలోమీటర్ల దూరంలోని కాంగ్డా జలాశయంలో ఈ వలస పక్షుల కోసం ప్రత్యేక ఏర్పాట్లు చేశారు. ఫతేపూర్ ప్రాంతంలో బాతులు, కామన్ టీల్ హఠాత్తుగా మరణించడాన్ని డిసెంబర్ 28న క్షేత్రస్థాయి సిబ్బంది గుర్తించారు. తరవాత రోజు ఆ ప్రాంతమంతా గాలించగా..నగ్రోటా రేంజ్‌లో 421 కళేబరాలను గుర్తించారు. తర్వాత ఆ సంఖ్య క్రమంగా 1,800కి చేరింది. ఏటా శీతకాలంలో దాదాపు 114 జాతులకు చెందిన లక్షకుపైగా పక్షులకు ఈ చిత్తడి నేలలు ఆవాసంగా మారాయి. బాతులతో పాటు, కామన్ టీల్, కామన్ పోచర్డ్, గ్రేట్ కార్మోరెంట్ వంటి పలు రకాల పక్షులు ఇక్కడ సేదతీరుతుంటాయి. ఇక్కడకు ప్రతీయేటా సైబీరియా, మధ్య ఆసియా నుంచి లక్షల సంఖ్యలో పక్షులు తరలివస్తుంటాయి. ఫిబ్రవరి నుంచి మార్చి వరకూ ఈ విధంగా జరుగుతుంటుంది.
By January 05, 2021 at 08:00AM
No comments