కేరళ: అదృష్టం అంటే అతడిదే.. అమ్ముడుపోని టిక్కెట్‌కు రూ.12 కోట్ల లాటరీ!
కేరళలో ప్రభుత్వమే లాటరీ నడుపుతోంది. దీనిని ఓ పథకంగా అమలుచేస్తూ రోజూ డ్రా నిర్వహిస్తోంది. లాటరీ ప్రైజ్ కింద రూ.70-80 లక్షల వరకు అందజేస్తోంది. రోజువారీ లాటరీలతోపాటు వీక్లీ, పండుగల వేళ ప్రత్యేక లాటరీలు కూడా ఉంటాయి. విన్-విన్, కారుణ్య, స్త్రీశక్తి, పౌర్ణమి వంటి పేర్లతో వీక్లీ లాటరీలు నిర్వహిస్తున్నారు. రాష్ట్రవ్యాప్తంగా టిక్కెట్లను అమ్మి ప్రతి రోజు మధ్యాహ్నం 3 గంటలకు ఆన్‌లైన్‌లో లాటరీ వేస్తారు. కొన్ని దశాబ్దాల్లో ఈ లాటరీల ద్వారా వేలాది మంది జీవితాలు బాగుపడ్డాయి. నిబంధనల ప్రకారం టిక్కెట్ ఎవరు కొనుగోలు చేస్తారో వారికే బహుమతి తీసుకునే అర్హత ఉంటుంది. కానీ, ఇటీవల లాటరీ టిక్కెట్లు అమ్ముకునే వ్యక్తిని అదృష్టం వరించింది. క్రిస్మస్-న్యూఇయర్ లాటరీలో అమ్ముడుపోని టిక్కెట్‌కు లాటరీ తగిలింది. లక్షల్లో కాదు ఏకంగా రూ.12 కోట్ల అతడికి దక్కాయి. అదృష్టం ఒక్కసారి పలకరిస్తే.. ఆ మనిషి జీవితం పూర్తిగా మారిపోతుందనడానికి ఈ వ్యక్తే ఉదాహరణ. మిగిలిన పోయిన టికెట్లలో ఒకదాన్ని లాటరీ వరించగా.. అప్పటివరకు అష్టకష్టాలు ఎదుర్కొన్న ఆయన.. ఒక్కరోజులో కోటీశ్వరుడిగా మారిపోయాడు. తమిళనాడులోని టెన్‌కాశీకి చెందిన షరాఫుద్దీన్.. తొమ్మిదేళ్ల పాటు గల్ఫ్‌ దేశాల్లో చిన్న చిన్న ఉద్యోగాలు చేసుకుంటూ జీవించాడు. 2013లో భారత్‌కు వచ్చేసిన షరాఫుద్దీన్.. ఆ తర్వాత కేరళ కొల్లాం జిల్లా ఆర్యంకవు సమీపంలోని ఎరావిధర్మపురానికి చేరుకున్నాడు. అక్కడ ప్రభుత్వ స్థలంలో చిన్న గుడిసె వేసుకుని, లాటరీ టికెట్లు అమ్ముకుంటా జీవనం సాగిస్తున్నాడు. ఈ నేపథ్యంలో కేరళ ప్రభుత్వం నిర్వహించిన క్రిస్మస్-న్యూఇయర్ లాటరీ టిక్కెట్లను అమ్మాడు. వాటిలో కొన్ని మిగిలిపోగా.. ఒక టికెట్‌‌కు లాటరీ తగిలింది. ఈ లాటరీలో షరాఫుదీన్‌ రూ. 12కోట్లు గెలుచుకున్నాడు. అయితే, ఇందులో 30 శాతం పన్నులు, 10 శాతం ఏజెంట్ కమిషన్ పోగా ఆయనకు రూ. 7.5కోట్లు లభించనున్నాయి. ‘కరోనా సంక్షోభం వల్ల పరిస్థితులు చాలా దారుణంగా మారాయి. వచ్చిన డబ్బుతో సొంత ఇంటిని నిర్మించుకుంటా. అప్పులు తీర్చేస్తా. చిన్న వ్యాపారం పెట్టుకుంటా’ అని షరాఫుదీన్‌ తెలిపాడు. లాటరీ వరించిన టిక్కెట్‌ను తీసుకుని తిరువనంతపురంలోని లాటరీ డైరెక్టరేట్‌ను కలిశాడు.
By January 22, 2021 at 08:08AM
No comments