పాక్: ఉగ్రవాదుల ఘాతకం.. 11 మందిని అపహరించి, చేతులు వెనక్కు కట్టేసి..
పాకిస్థాన్‌లోని బొగ్గుగని కార్మికులను ఉగ్రవాదులు అపహరించి, హతమార్చారు. బలూచిస్థాన్‌లో షియా హజారా తెగకు చెందిన కనీసం 11 మంది బొగ్గుగని కార్మికులను ఉగ్రవాదులు తుపాకులతో కాల్చి చంపారు. బోలన్‌ జిల్లాలోని మాచ్ పట్టణంలో ఆదివారం ఉదయం ఈ దారుణం చోటుచేసుకుంది. మైనార్టీలైన షియాలను సున్నీ వర్గానికి చెందిన ఉగ్రవాదులు లక్ష్యంగా చేసుకున్నారు. ఉగ్రవాదుల నరమేధంలో నలుగురు తీవ్రంగా గాయపడ్డారని, ప్రస్తుతం వారికి ఆస్పత్రిలో చికిత్స కొనసాగుతోందని అధికారులు తెలిపారు. సాయుధులైన ఉగ్రవాదులు బలూచిస్థాన్ ప్రావిన్సులు మాచ్ పట్టణంలోకి చొరబడి.. బొగ్గు గనుల్లో పనిచేసే హజారాలను అపహరించారు. వారి చేతులను వెనక్కు కట్టేసి, దగ్గర నుంచి కాల్చి చంపారు. చాలా మందికి గొంతులు కోశారు. ఆదివారం ఉదయం బాధితుల మృతదేహాలను అధికారులు గుర్తించారు. మృతదేహాలు రక్తపు మడుగులో పడి ఉన్నాయని, వారి ఒంటిపై బట్టలు రక్తసిక్తమయ్యాయని హజారా ఉద్యమహక్కుల కార్యకర్త అలీ రజా తెలిపారు. ఈ ఘటనతో భద్రతా దళాలు అప్రమత్తమయ్యాయని, ముష్కరుల కోసం గాలింపు చర్యలు చేపడుతున్నాయని బలూచిస్థాన్ ప్రావిన్సుల హోం మంత్రి మిర్ జియుల్లాహ్ లాంగ్వ్ అన్నారు. ఈ ఘటనకు పాల్పడింది తామేనని ఇస్లామిక్ స్టేట్ ఉగ్రవాద సంస్థ (ఐఎస్ఐఎస్) ప్రకటించింది. అంతేకాదు, ఇటీవల కాలంలో బలూచ్‌లోని జరిగిన పలు దాడులకు తామే కారణమని తెలిపింది. హజారా తెగకు చెందిన ప్రజలు శతాబ్దం కిందట అఫ్గనిస్థాన్ నుంచి వలస వచ్చి, బలూచ్ ప్రాంతంలో స్థిరపడ్డారు. పర్షియా భాషను మాట్లాడే వీరి జనాభా 5 లక్షల వరకు ఉంటుందని స్థానిక అధికారులు తలిపారు. ఈ ఘటనపై నిరసన వ్యక్తం చేస్తూ ప్రజలు వీధుల్లోకి వచ్చి నిరసన ప్రదర్శనలు నిర్వహించారు. క్వెట్టా జాతీయ రహదారిని నిర్బంధించారు. మరోవైపు, అఫ్గనిస్థాన్ శరణార్థులు మోసపూరితంగా సంపాదించిన 2 లక్షల నకిలీ పౌరసత్వ గుర్తింపు కార్డులను పాకిస్థాన్‌ రద్దుచేసింది.
By January 04, 2021 at 08:17AM
No comments