Breaking News

బాధ్యతలు చేపట్టిన వెంటనే బైడెన్ సంతకం చేసిన ఉత్తర్వులివే.. 10 రోజుల్లో అమలు!


అమెరికా కొత్త అధ్యక్షుడిగా బాధ్యతలు చేపట్టిన వెంటనే 15 కీలక ఆంశాలపై సంతకాలు చేశారు. వీటి మాజీ అధ్యక్షుడు డొనాల్డ్ ట్రంప్ ఇచ్చిన పలు ఆదేశాలను వెనక్కి తీసుకున్న ఉత్తర్వులు కూడా ఉన్నాయి. కరోనా వైరస్ మహమ్మారిపై పోరులో భాగంగా ప్రతి ఒక్కరూ వంద రోజులపాటు మాస్కులు విధిగా ధరించడం, భౌతిక దూరం పాటించడంతో పాటు, అధ్యక్షుడికి కరోనాపై సమాచారాన్ని ఎప్పటికప్పుడు నివేదించే ‘కోవిడ్-19 రెస్పాన్స్ కో ఆర్డినేటర్’నియామకం కూడా బైడెన్ సంతకం చేసిన అంశాల్లో ఉన్నాయి. కరోనా వైరస్ విషయంలో చైనాకు అనుకూలంగా వ్యవహరించారని ఆరోపిస్తూ ప్రపంచ ఆరోగ్య సంస్థ (డబ్ల్యూహెచ్ఓ) నుంచి వైదొలుగుతూ ట్రంప్ తీసుకున్న నిర్ణయాన్ని కూడా బైడెన్ నిలిపివేశారు. డబ్ల్యూహెచ్ఓ సమావేశాలకు ఇక నుంచి అమెరికా అంటువ్యాధుల నియంత్రణ విభాగం నిపుణుడు డాక్టర్ ఆంథోనీ ఫౌచీ బృందం ప్రాతినిధ్యం వహించనుంది. వాతావరణ మార్పులపై పారిస్ ఒప్పందంలో ఆమెరికాను మళ్లీ భాగస్వామిని చేయడం, ముస్లిం దేశాలకు రాకపోకలపై ట్రంప్ విధించిన నిషేధాన్ని ఎత్తివేయడం, అమెరికా- మెక్సికో సరిహద్దుల్లో గోడ నిర్మాణాన్ని నిలిపివేయడం, దేశాభివృద్ధిలో భాగస్వామ్యమైన వారికి శాశ్వత నివాసం/పౌరసత్వ కల్పన వంటి ఉత్తర్వులు ఉన్నాయి. గ్రీన్ కార్డుల జారీలో పరిమితులను ఎత్తివేయడం వంటి నిర్ణయాలు తీసుకున్నారు. ఈ నిర్ణయాలు వచ్చే పది రోజుల్లో అమలు కానున్నాయి. ట్రంప్ పరిపాలనలో నాలుగేళ్లుగా అమెరికా ప్రజల మధ్య ఏర్పడిన విభజనను రూపుమాపడానికే బైడెన్ ఈ వేగవంతమైన నిర్ణయాలు తీసుకున్నారని నిపుణులు అభిప్రాయపడుతున్నారు. కోవిడ్ మహమ్మారి వ్యాప్తి, దాని కారణంగా ఏర్పడిన ఆర్ధిక సంక్షోభం, వాతావరణ మార్పులు, జాత్యంహకార ధోరణి ఈ నాలుగు ప్రస్తుతం ఎదుర్కొంటున్న పెద్ద సంక్షోభాలని బైడెన్ బృందం పేర్కొంటోంది. జార్జ్ వాషింగ్టన్ యూనివర్సిటీ ప్రొఫెసర్, పొలిటికల్ మేనేజ్‌మెంట్ ప్రోగ్రామ్ డైరెక్టర్ టాడ్ బెల్ట్ మాట్లాడుతూ.. ‘అమెరికాలో ట్రంప్ పరిపాలనకు ముందున్న పరిస్థితులను నెలకొల్పడానికి, ప్రపంచాన్ని మరింత సాధారణంగా చూపించడానికి బైడెన్ ప్రయత్నిస్తున్నారు. ఇంత త్వరగా చాలా ఉత్తర్వులపై సంతకం చేయడం ద్వారా ట్రంప్ విధానాలను తిరస్కరించడం’ అని చెప్పారు. విద్యార్థుల రుణ చెల్లింపులపై విరామం, ఆస్తుల జప్తుపై దేశవ్యాప్తంగా పరిమితులు, బహిష్కరణలను పొడిగిస్తూ నిర్ణయం తీసుకున్నారు. విధానాలు, కార్యక్రమాలలో ఏవైనా అసమానతలను పరిష్కరించడానికి ప్రతి ఫెడరల్ ఏజెన్సీ 200 రోజుల్లో కార్యాచరణ ప్రణాళికను అందజేయాలని తెలిపే ఉత్తర్వులపై అధ్యక్షుడు సంతకం చేశారు.


By January 21, 2021 at 11:16AM


Read More https://telugu.samayam.com/latest-news/international-news/us-president-joe-biden-signed-15-executive-orders-and-two-other-directives-wednesday/articleshow/80380453.cms

No comments