మలుపు తీరిగిన నేపాల్ రాజకీయాలు.. పార్లమెంట్ రద్దుకు ప్రధాని సిఫార్సు
గత ఆరు నెలలుగా కొనసాగుతున్న నేపాల్ రాజకీయ సంక్షోభంలో ఆదివారం కీలక పరిణామం చోటు చేసుకుంది. పార్లమెంటును రద్దు చేయాలని ప్రధాని నాయకత్వంలోని క్యాబినెట్ ఆదివారం సిఫార్సు చేసింది. ప్రధాన మంత్రి నిర్వహించిన అత్యవసర సమావేశంలోనే ఈ నిర్ణయం తీసుకోవడం గమనార్హం. దీనిపై మీడియాకు వివరాలను వెల్లడించిన నేపాల్ మంత్రి బార్సామన్ పున్.. పార్లమెంటును రద్దు చేయాలంటూ మంత్రి మండలి చేసిన సిఫారసును రాష్ట్రపతికి పంపామని తెలిపారు. అయితే, ఈ నిర్ణయాన్ని అధికార కమ్యూనిస్ట్‌ పార్టీ కీలక నేత నారాయణ్‌ కాజీ తప్పుబట్టారు. క్యాబినెట్‌లోని అందరూ మంత్రులూ హాజరు కాకుండానే ఈ నిర్ణయం తీసుకున్నారని దుయ్యబట్టారు. ప్రధాని ప్రజాస్వామ్య విలువలకు విరుద్ధంగా వ్యవహరించారని విమర్శించారు. ఈ నిర్ణయం నేపాల్ తిరోగమనానికి దారితీస్తుందని వ్యాఖ్యానించారు. మంత్రి మండలి నిర్ణయం అమలు కాబోదని ఆయన పేర్కొన్నారు. ఈ ఏడాది జూన్, జులైలో నేపాల్ అధికార కమ్యూనిస్టు పార్టీలో సంక్షోభం తలెత్తిన విషయం తెలిసిందే. ఆ సమయంలోనే ప్రధాని పదవికి కేపీ శర్మ రాజీనామా చేస్తారని ప్రచారం జరిగింది. అయితే, ఏకంగా పార్లమెంటును రద్దు చేయాలంటూ సంచలన నిర్ణయం తీసుకున్నారు. దీనిపై రాష్ట్రపతి నుంచి స్పందన రావాల్సి ఉంది. భారత్ భూభాగాలను తమవిగా పేర్కొంటూ ఈ ఏడాది మేలో నేపాల్ రూపొందించిన పొలిటికల్ మ్యాప్ వ్యవహారం అధికార పార్టీలో చీలిక తీసుకొచ్చింది. ప్రధాని నిర్ణయంపై సొంత పార్టీ నేతలు విమర్శలు గుప్పించడంతో తనను పదవి నుంచి తొలగించడానికి భారత్ ప్రయత్నిస్తోందని ఆరోపించారు. వీటిని సొంత పార్టీయే ఖండిస్తూ ఆగ్రహం వ్యక్తం చేస్తూ.. శర్మ రాజీనామా చేయాలని డిమాండ్ చేసింది. జూన్ 30న జరిగిన పాలక స్టాండింగ్ కమిటీ సమావేశంలో మాజీ ప్రధాని పుష్పా కమల్ దహాల్ ‘ప్రచండ’.. శర్మను తీవ్రంగా విమర్శించారు. తనను ప్రభుత్వం నుంచి గద్దె దించడానికి ఇండియా కుట్ర పన్నుతోందని ప్రధాని చేసిన ఆరోపణలు రాజకీయంగా సరికావన్నారు. అధికారం నుంచి తనను తొలగించేందుకు ‘ఎంబసీలు,’ ‘హోటళ్లలో’కార్యకలాపాలు కొనసాగుతున్నాయని, కొందరు నేపాలీ నేతలకు వీటితో సంబంధం ఉందని శర్మ ఆరోపించారు. దీంతో పాలక పార్టీ నేతలు ఆయన రాజీనామా చేయాల్సిందే అని కోరారు.
By December 20, 2020 at 12:39PM
No comments