రైతు సంఘాల ఫేస్‌బుక్, ఇన్‌స్టాలపై నిషేధం.. విమర్శలతో కొద్ది గంటల్లోనే ఎత్తివేత
కొత్త వ్యవసాయ చట్టాలకు వ్యతిరేకంగా ఆందోళనలు చేస్తున్న రైతులు.. ఈ ఉద్యమానికి సామాజిక మాధ్యమాలను కూడా ఉపయోగించుకుంటున్నారు. ఈ నేపథ్యంలో వ్యవసాయ చట్టాలపై ఫేస్‌బుక్, ఇన్‌స్టాగ్రామ్‌ల ద్వారా ఆదివారం చర్చావేదికను నిర్వహించగా.. వీటిని మూడు గంటల పాటు నిలిపివేశారు. రైతు సంఘాలు తమ ఫేస్‌బుక్, ఇన్‌స్టా ఖాతా ద్వారా లైవ్‌లో ప్రసంగిస్తుండగా.. వాటిని నిలిపివేశారు. మూడు గంటల తర్వాత తిరిగి పునరుద్దరించారు. సామాజిక ప్రమాణాలకు విరుద్దంగా ఉందని చెబుతూ తమ పేజ్‌ను ఫేస్‌బుక్ తొలగించిందని పెద్ద ఎత్తున సోషల్ మీడియాను వినియోగిస్తున్న కిసాన్ ఏక్తా మోర్చా రైతు సంఘం ప్రతినిధులు పేర్కొన్నారు. కేంద్రంలోని బీజేపీ ప్రభుత్వం వ్యాపారవేత్తల ప్రయోజనాలను పరిరక్షిస్తూ వారికి అనుకూలంగా వ్యవహరిస్తోందని ఫేస్‌బుక్ ఆధ్వర్యంలో ఉన్న ఇన్‌స్టాగ్రామ్‌ పేజ్‌లో కిసాన్ ఏక్తా మోర్చా ఆరోపించింది. ఈ చర్యలకు వ్యతిరేకంగా కొత్త పోస్టులను పెట్టడానికి అనుమతించలేదని తెలిపింది. అయితే, అసౌకర్యానికి చింతిస్తున్నామని చెప్పిన ఫేస్‌బుక్ యాజమాన్యం.. ఆ పేజీని ఎందుకు తొలగించిందో పేర్కొనలేదు. ‘మేము కిసాన్ ఏక్తా మోర్చా ఎఫ్‌బీ పేజీని పునరుద్ధరించాం.. అసౌకర్యానికి చింతిస్తున్నాం’అని ఫేస్‌బుక్ ప్రతినిధి ఒకరు తెలిపారు. రైతు సంఘాల ప్రకారం.. ఆందోళనలో భాగంగా సోమవారం నుంచి రిలే నిరాహార దీక్షలను ప్రారంభించనున్నట్టు స్వరాజ్ ఇండియా సంఘం అధ్యక్షుడు యోగేందర్ యాదవ్ ప్రసంగాన్ని లైవ్‌లో ప్రచారం చేస్తున్న కొద్దిసేపటికే నిలిపివేశారు. సామాజిక మాధ్యమాల్లో తీవ్ర వ్యతిరేకత వ్యక్తం కావడంతో కొద్ది గంటల తరువాత ఈ నిషేధాన్ని ఎత్తేశాయని పేర్కొన్నాయి. వచ్చే ఆదివారం ఈ ఏడాదికి చివరి మన్‌కీ బాత్‌ ప్రసంగం చేయనున్నారు.. ఆ ప్రసంగం వస్తున్నంతసేపూ అన్నం పళ్లాలను బలంగా మోగించాలని, తమ మనసులో మాటను మోదీ వినాలని నినదించాలని రైతులకు స్వరాజ్ ఇండియా అభియాన్‌ చీఫ్‌ యోగేంద్ర యాదవ్ పిలుపునిచ్చారు. రైతుల సమస్యలను ఎప్పుడు వింటారో? ప్రధాని మోదీని నిలదీయాలని ఈ సందర్భంగా యోగేంద్ర యాదవ్ పిలుపునిచ్చారు. కరోనా వైరస్ మహమ్మారి ప్రారంభ రోజుల్లో ఫ్రంట్‌లైన్ కార్మికులకు కృతజ్ఞతలు చెబుతూ చప్పట్లు కొట్టాలని ప్రధాని పిలుపునిచ్చారని, మరి రైతులకు ఎప్పుడు కొడతారో చెప్పమని నిలదీయాలని అన్నారు. మరోవైపు, ఢిల్లీ పొలిమేరల్లో నిరసన కొనసాగిస్తున్న రైతు సంఘాలపై కేంద్రం నలువైపుల నుంచీ ఒత్తిడి తెస్తోంది. ఇప్పటికే దళారీ, కమీషన్‌ ఏజెంట్ల నివాసాలపై ఐటీ దాడులు, నోటీసులతో దాడి మొదలెట్టిన కేంద్ర దర్యాప్తు సంస్థలు ఇపుడు విదేశీ విరాళాల నియంత్రణ చట్టం(ఎఫ్‌సీఆర్‌ఏ)ని కూడా ప్రయోగించాయి.
By December 21, 2020 at 10:19AM
No comments