టీకాతో కరోనా ముప్పు తొలగి పోతుందనుకుంటే పిచ్చితనమే.. ఐరాస సంచలన వ్యాఖ్యలు
ప్రపంచాన్ని వణికిస్తున్న మహమ్మారి మొదలై దాదాపు ఏడాది కావస్తోంది. ఇప్పటి వరకు మహమ్మారి బారినపడి ప్రపంచవ్యాప్తంగా 15 లక్షల మంది ప్రాణాలు కోల్పోయారు. వైరస్‌ను అంతం చేసే వ్యాక్సిన్ ప్రయోగాలు తుది దశకు చేరుకోగా.. అత్యవసర వినియోగం కోసం ఫైజర్ టీకాను యూకే ఆమోదించింది. ఈ నేపథ్యంలో టీకాపై ఐక్యరాజ్యసమితి ప్రధాన కార్యదర్శి ఆసక్తికర వ్యాఖ్యలు చేశారు. ఐరాస సాధారణ సభ సమావేశాల్లో ఆయన ప్రసంగిస్తూ.. కరోనా వైరస్ ప్రభావం దశాబ్దాలుపాటు ఉంటుందని అన్నారు. ‘కొవిడ్‌-19 మహమ్మారి మొదలై దాదాపు ఏడాది కావస్తోంది.. 1945 తర్వాత ప్రపంచానికి తొలిసారి ఉమ్మడి ముప్పు ఎదురైంది.. ఇది ఇప్పట్లో తొలగిపోదు.. వ్యాక్సిన్ వల్ల కరోనా మాయమైపోతుందని అనుకుంటే పిచ్చితనమే.. కాలమే దీనికి పరిష్కారం చూపుతుంది. ఒక టీకా మన వద్ద ఉన్న ఇతర సాధనాలను పూర్తి చేస్తుంది.. కానీ, వాటిని భర్తీ చేయదు అని పేర్కొన్నారు’ వ్యాక్సిన్ కోసం ప్రపంచవ్యాప్తంగా శాస్త్రవేత్తలు నిబద్ధతతో తీవ్రంగా శ్రమించారని, వారందరికి ధన్యవాదాలు చెప్పుకుంటున్నానని అన్నారు. మరి కొన్ని వారాలు, నెలల్లో అందుబాటులోకి రానుందని పేర్కొన్నారు. కరోనాతో ఏడాదిగా ప్రజలు ఎన్నడూలేనంతగా ఇబ్బందులు ఎదుర్కొంటున్నారు.. ప్రజారోగ్యానికి ముప్పు ఎదురయ్యిందని వ్యాఖ్యానించారు. కానీ మనల్ని మనం మోసం చేసుకోవద్దు.. ఒక టీకాకు ఈ మహమ్మారి మాయమైపోదు.. అది సంవత్సరాలు, రాబోయే దశాబ్దాలు కూడా ఉంటుంది అని గుటెర్రెస్ హెచ్చరించారు. పేదరికం తీవ్రమవుతోందని, కరువు విలయతాండవం చేస్తూ గత ఎనిమిది దశాబ్దాలలో అతిపెద్ద ప్రపంచ మాంద్యాన్ని ఎదుర్కొంటున్నామని ఆందోళన వ్యక్తం చేశారు. ఫలితంగా ఈ తరమే కాదు రాబోయే తరాలు కూడా దీర్ఘకాలిక అనారోగ్యం, బలహీనతలు, అసమానతలు.. అన్యాయానికి గురవుతాయని, వీటిని గాడిలో పెట్టడానికి సమయం పడుతుందని గుటెర్రెస్ చెప్పారు. ఇటీవల డబ్ల్యూహెచ్‌‌ఓ చీఫ్ సైతం ఇటువంటి వ్యాఖ్యలే చేశారు. వైరస్ విషయంలో అప్రమత్తంగా ఉండాలని హెచ్చరించారు. ‘నిరంతర పర్యవేక్షణ కొనసాగించాల్సిన అవసరం ఉంది.. పెద్ద ఎత్తున టెస్టింగ్ నిర్వహించి, పాజిటివ్‌గా తేలినవారిని ఐసోలేషన్‌లో ఉంచాలి.. వారితో కాంటాక్ట్ అయిన వ్యక్తులను గుర్తించాలి... వ్యక్తుల ఆరోగ్యంపై శ్రద్ధ వహించాల్సిన అవసరం ఉంది’ అని టెడ్రోస్ సూచించారు. తప్పనిసరిగా మాస్క్ ధరించి, భౌతికదూరం, చేతులు శుభ్రం చేసుకోవడం కొనసాగించాలని పునరుద్ఘాటించారు.
By December 04, 2020 at 08:17AM
No comments