బీజేపీ ఎత్తులకు దీదీ పైఎత్తు.. 24 గంటల్లోనే యూ-టర్న్ తీసుకున్న టీఎంసీ ఎమ్మెల్యే
శాసనసభ ఎన్నికలకు మరో ఐదు నెలలు సమయం ఉండగానే పశ్చిమ్ బెంగాల్‌‌లో నాటకీయ పరిణామాలు చోటుచేసుకుంటున్నాయి. రెండు రోజుల వ్యవధిలోనే అధికార తృణమూల్ కాంగ్రెస్ ఎమ్మెల్యేలు ముగ్గురు పార్టీకి రాజీనామా చేసిన విషయం తెలిసిందే. వీరిలో ఓ ఎమ్మెల్యే 24 గంటలైనా తిరక్క ముందే యూటర్న్ తీసుకున్నారు. తాను ఇంకా తృణమూల్ కాంగ్రెస్ పార్టీతోనే ఉన్నానని, దానిలోనే కొనసాగుతానని ఎమ్మెల్యే జితేంద్ర తివారీ స్పష్టం చేశారు. టీఎంసీ పార్టీకి రాజీనామా చేసినట్లు ప్రకటించి ఒక్క రోజైనా గడవకు ముందే జితేంద్ర యూ టర్ను తీసుకోవడం విశేషం. మంత్రి అరుప్ బిశ్వాస్‌తో భేటీ అయిన తరువాత ఆయన ఈ నిర్ణయం తీసుకున్నారు. ఈ భేటీలో టీఎంసీ ఎన్నికల వ్యూహకర్త ప్రశాంత్ కిషోర్ సైతం పాల్గొన్నారు. భేటీ అనంతరం ఎమ్మెల్యే జితేంద్ర తివారీ మాట్లాడుతూ.. ‘ఇది నా తప్పిదం.. కొన్ని అపార్ధాలు చోటుచేసుకున్నాయి.. ఏదిఏమైనప్పటికీ నావైపు నుంచి కచ్చితంగా తప్పు జరిగింది.. నా వ్యాఖ్యలు దీదీని నొప్పించాయి.. అమెకు బాధకలిగించే పని ఏదీ నేను చేయలేను’ అని అన్నారు. ‘మమతా అక్కను వ్యక్తిగతంగా కలిసి, ఆమెను క్షమాపణలు కోరతాను.. నేను టీఎంసీలోనే కొనసాగుతాను’ అని జితేంద్ర ప్రకటించారు. మంత్రి అరుప్ బిశ్వాస్ మాట్లాడుతూ.. ‘జితేంద్ర తివారీ ప్రస్తుతం టీఎంసీలోనే ఉన్నారు.. ఇకపై పార్టీలోనే కొనసాగుతారు.. మమతా బెనర్జీకి విధేయుడైన ఓ సైనికుడిగా బీజేపీతో పోరాటం చేస్తారు.. కుటుంబం అన్నాక సమస్యలు ఉంటాయి.. కానీ, అన్నీ పరిష్కారమయ్యాయి’ అని వ్యాఖ్యానించారు. పండబేశ్వర్ నుంచి ఎమ్మెల్యేగా ఎన్నికయిన జితేంద్ర తివారీ.. అసన్సోల్ మున్సిపల్ కార్పొరేషన్ బోర్డు ఆఫ్ అడ్మినిస్ట్రేటర్స్ ఛైర్మన్‌గా ఉన్నారు. ఈ పదవికి రాజీనామా చేసిన జితేంద్ర.. పనిచేయడానికి అనుమతి లేకపోతే పదవి ఉండి ఏం లాభం, అందుకే రాజీనామా చేశాను అని గతంలో చెప్పారు. అనంతరం టీఎంసీ ప్రాథమిక సభ్యత్వానికి రాజీనామా చేశారు. మంత్రి, ప్రశాంత్ కిషోర్ ల దౌత్యం ఫలించడంతో జితేంద్ర తన రాజీనామాను వెనక్కుతీసుకున్నారు. కేంద్ర హోం మంత్రి అమిత్ షా రెండు రోజుల బెంగాల్ పర్యటనకు శనివారం వస్తుండగా.. టీఎంసీలోని పలువురు అసంతృప్తులు బీజేపీలోకి చేరేందుకు సిద్ధమయ్యారు. ఈ నేపథ్యలో బీజేపీ ఎత్తులకు మమత పైఎత్తు వేసి జితేంద్ర నిలువరించారు.
By December 19, 2020 at 08:12AM
No comments