రెబల్ జీ23 నేతలతో ఎట్టకేలకు సోనియా భేటీ.. రెండు రోజుల కీలక సమావేశాలు
పార్టీ అగ్రనాయకత్వంపై లేఖాస్త్రం సంధించి తిరుగుబావుటా ఎగురువేసిన సీనియర్లతో కాంగ్రెస్‌ అధ్యక్షురాలు సోనియాగాంధీ ఎట్టకేలకు వారితో భేటీకానున్నారు. డిసెంబరు 19, 20 తేదీల్లో అసమ్మతి నేతలతో సమావేశాలు సోనియా జరపనున్నారు. అసమ్మతి నేతలు లేవనెత్తిన అంశాలతో పాటు పార్టీ ప్రక్షాళన, సంస్థాగత ఎన్నికలపై చర్చించనున్నారు. ఈ ఏడాది ఆగస్టులో లేఖాస్త్రం సంధించిన 23 మంది అసమ్మతివాదులతో సోనియా ముఖాముఖి భేటీ కావడం ఇదే తొలిసారి. అసమ్మతి నేతలతో భేటీ జరగడానికి మధ్యప్రదేశ్‌ మాజీ ముఖ్యమంత్రి, సీనియర్ నేత కమల్‌నాథ్‌ ప్రధానంగా కృషి చేసినట్టు పార్టీ వర్గాలు పేర్కొంటున్నాయి. ఆయనే చొరవతీసుకుని గాంధీలతో మాట్లాడి ఇందుకు ఒప్పించినట్లు తెలుస్తోంది. రాజకీయాల నుంచి తప్పుకుంటానని కొద్ది రోజుల కిందట ప్రకటించిన కమల్‌నాథ్‌.. అసమ్మతి నేతలు లేవనెత్తిన అంశాలను లోపాయికారిగా వారిని సమర్థిస్తూ వచ్చారు. రెండు రోజుల పాటు జరిగే ఈ సమావేశాల్లో సోనియాతో పాటు రాహుల్‌గాంధీ కూడా పాల్గొనే అవకాశం ఉంది. వచ్చే జనవరిలో పార్టీ సంస్థాగత ఎన్నికలు జరగవచ్చని చాలా కాలం నుంచి ప్రచారం సాగుతోంది. విశ్వసనీయ వర్గాల సమాచారం ప్రకారం... రాహుల్‌కు పార్టీ పగ్గాలు తిరిగి అప్పగించడానికి ఓ ప్రణాళిక ప్రకారం ఈ సమావేశాలు నిర్వహించనున్నట్లు తెలుస్తోంది. ‘రాజకీయ సలహాదారుగా వ్యవహరించిన అహ్మద్‌ పటేల్‌ ఆకస్మిక మరణంతో ముఖ్యమైన రాజకీయ నిర్ణయాలను సోనియాయే స్వయంగా తీసుకోవాల్సిన పరిస్థితి ఏర్పడింది.. ఈ దశలో ఆమెకు సీనియర్ల సహకారం, వారి అభిప్రాయాలు అవసరమవుతున్నాయి’ అని పార్టీ వర్గాలు పేర్కొన్నాయి.. రాహుల్‌కు పార్టీ బాధ్యతలను అందించడానికి అందుకు ప్రధానంగా సీనియర్ల ఆమోదం కావాలి. అందుకే లేఖ రాసిన సీనియర్లు- గులాంనబీ ఆజాద్‌, ఆనంద్‌ శర్మ, వీరప్ప మొయిలీలతో పాటు మరికొందరితో ఆమె మంతనాలు సాగిస్తారని వినిపిస్తోంది. వారి ఆలోచన తెలుసుకోవడం ఒక ఎత్తయితే- పార్టీకి ఓ మంచి టీమ్‌ను ఏర్పాటు చేసి- కీలకాంశాలపై సరైన నిర్ణయాలు తీసుకొని ముందుకు వెళ్లేలా వ్యూహరచన సాగించాలని సోనియా తలపోస్తున్నట్లు సమాచారం. ఈ ఏడాది ఆగస్టులో రాజస్థాన్‌లో ముఖ్యమంత్రి అశోక్‌ గెహ్లాట్‌పై సచిన్ పైలట్ తిరుగుబాటు చేసిన సమయంలోనే 23 మంది సీనియర్లు సోనియాకు లేఖాస్త్రం సంధించిన విషయం తెలిసిందే. పైలట్‌‌ను బుజ్జగించి, మనసు మార్చడంలో కీలకపాత్ర పోషించిన ప్రియాంక, రాహుల్‌- సీనియర్లకు చెక్‌ పెట్టడంపై పూర్తిస్థాయిలో దృష్టిసారించారు. అయితే ఆజాద్‌ సహా మరో ముగ్గురు సీనియర్లు ప్రతివ్యూహాన్ని రచించి రాష్ట్రాలు, ప్రాంతాలకు అతీతంగా కాంగ్రెస్‌ నేతలను కూడగట్టి లేఖను రాశారు. ఈ లేఖపై సంతకం చేసిన వారిలో అత్యధికులు నెహ్రూ-గాంధీ కుటుంబ వీర విధేయులున్నారు. అనేక సందర్భాల్లో గాంధీలకు బాసటగా నిలిచిన విధేయులు ఈ ‘తిరుగుబాటు’కు దిగుతారని అనేకమంది ఊహించలేదు. లేఖపై సంతకం చేసిన నేతలకు వ్యక్తిగత కారణాలు కూడా ఉన్నాయనే వాదన వినిపించింది. గులాంనబీ ఆజాద్‌ రాజ్యసభ సభ్యత్వం వచ్చే ఫిబ్రవరిలో ముగుస్తుంది. ఆయన స్థానంలో దళితుడైన మల్లికార్జున ఖర్గేను పంపాలని పార్టీ నాయకత్వం యోచించింది. ఇది రాజ్యసభలో కాంగ్రెస్‌ పక్ష నేతగా ఉన్న ఆజాద్‌కు రుచించలేదు.
By December 18, 2020 at 10:49AM
No comments