దేశంలో కొత్తరకం కరోనా కలకలం.. మరో 14 మందికి యూకే స్ట్రెయిన్ నిర్ధారణ

దేశంలో యూకే కరోనా వైరస్ స్ట్రెయిన్ ఆరుగురికి నిర్ధారణ అయినట్టు కేంద్రం మంగళవారం వెల్లడించిన విషయం తెలిసిందే. తాజాగా మరో 14 కేసులు నిర్ధారణ అయినట్టు కేంద్ర ఆరోగ్య శాఖ బుధవారం ఉదయం వెల్లడించింది. దీంతో దేశంలో మొత్తం కేసులు 20కి చేరాయి. యూకే నుంచి వచ్చిన పలువురికి కరోనా వైరస్ పాజిటివ్‌గా నిర్ధారణ కాగా.. వారి రక్తనమూనాలను సేకరించి జీనోమ్ సీక్వెన్స్ పరీక్షలు నిర్వహిస్తున్నారు. ఇప్పటి వరకు 20 మందిలో కొత్తరకం కరోనా స్ట్రెయిన్ నిర్ధారణ అయ్యింది. బుధవారం వెల్లడించిన కేసుల్లో ఎనిమిది ఢిల్లీలోనే నమోదు కావడం గమనార్హం. మంగళవారం నిర్ధారణ అయిన కేసుల్లో మూడు కర్ణాటక, ఏపీ, తెలంగాణ, పుణేలో ఒక్కొక్కటి చొప్పున బయటపడ్డాయి. తెలుగు రాష్ట్రాల్లో యూకే నుంచి వచ్చిన వరంగల్ వాసి, రాజమండ్రి మహిళకు కొత్త వైరస్ నిర్ధారణ అయ్యింది. వరంగల్ బాధితుడు డిసెంబరు 10 బ్రిటన్ నుంచి రాగా.. అతడికి 16న కరోనా లక్షణాలు కనిపించాయి. స్థానికంగానే నిర్ధారణ పరీక్షలు నిర్వహించగా కరోనా పాజిటివ్‌గా తేలింది. అప్పటి నుంచి వరంగల్‌లోని ఒక ప్రైవేటు ఆసుపత్రిలో చికిత్స పొందుతున్నాడు. అతడి నమూనాలను సేకరించి సీసీఎంబీకి పంపగా జీనోమ్ సీక్వెన్స్ పరీక్షల్లో కొత్తరకం కరోనా బయటపడింది. యూకే నుంచి రాజమహేంద్రవరం వచ్చిన మహిళకు కరోనా స్ట్రెయిన్‌గా తేలింది. దీనిపై వైద్య, కుటుంబ సంక్షేమ శాఖ నుంచి అధికారిక ప్రకటన విడుదలైనా.. జిల్లా అధికారులు మాత్రం స్ట్రెయిన్‌ కేసుగా తమకు ఎలాంటి అధికారిక సమాచారం రాలేదని పేర్కొన్నారు. రామకృష్ణానగర్‌కు చెందిన వ్యక్తి ఉద్యోగరీత్యా బ్రిటన్‌కు వెళ్లారు. ఆయన వద్దకు కుమార్తెతోపాటు వెళ్లిన భార్య.. నగరంలో ఉన్న కుమారుడ్ని తీసుకెళ్లడానికి వచ్చే క్రమంలో పాజిటివ్‌గా తేలింది. డిసెంబరు 24న ఇద్దరికీ పరీక్షలు నిర్వహిస్తే తల్లికి పాజిటివ్‌, కుమారునికి నెగిటివ్‌గా తేలింది. ఈ ఫలితం ఇప్పుడు స్ట్రెయిన్‌ పాజిటివ్‌గా తేలిందని ఉన్నతాధికారి ప్రకటించారు. బ్రిటన్‌ నుంచి వచ్చిన మహిళ.. తల్లి (78) కూడా కొవిడ్‌ బారిన పడ్డారు. కుమార్తెను ఈమె నేరుగా కలవకపోవడంతో ఇది సాధారణ కరోనా అని అధికారులు భావిస్తున్నారు.

By December 30, 2020 at 08:58AM

Read More https://telugu.samayam.com/latest-news/india-news/total-20-uk-returnees-have-tested-positive-for-the-new-covid-strain-so-far-in-india/articleshow/80020451.cms