అమెరికా ఎన్నికల్లో జో-కమలా జోడీ విజయం.. తమిళనాడులోని ఆ రెండు గ్రామాల్లో సంబరాలు
అమెరికా అధ్యక్ష ఎన్నికలు తమిళనాడులోని రెండు గ్రామాలకు అత్యంత ప్రత్యేకంగా నిలిచాయి. డెమొక్రటిక్ ఉపాధ్యక్ష అభ్యర్థి కమలా హ్యారిస్ విజయమే దీనికి కారణం. కమలా తల్లి భారత సంతతి మహిళకాగా, తండ్రి జమైకన్. అమ్మమ్మ, తాతయ్యల స్వగ్రామాలు తమిళనాడులోని తిరువారూర్ జిల్లాలో ఉన్నాయి. ఆమె తాతయ్య పీవీ గోపాలన్ స్వస్థలం తుళసేంద్రపురం కాగా.. అమ్మమ్మ రాజమ్ పుట్టిళ్లు పైంగనాడు. మాజీ దౌత్యవేత్త గోపాలన్ పెద్ద కుమార్తె శ్యామల సంతానమే కమలా హ్యారిస్. ఆమె విజయంతో రెండు గ్రామాల ప్రజలు దీపావళికి ముందే సంబరాలు చేసుకోవాలని ఏర్పాట్లు చేశారు. మన్నార్గుడి నుంచి తుళసేంద్రపురం, పైంగనాడు వెళ్లే రహదారులలో ఫ్లెక్సీలతో పాటు గోడపత్రికలను అంటించారు. కమలా తల్లి శ్యామలా గోపాలన్ న్యూఢిల్లీలోని లేడీ ఇర్విన్ కాలేజీలో బీఎస్సీ(హోం సైన్స్) పూర్తిచేశారు. తన 19 వ ఏట 1958లో ఎంఎస్ కోసం అమెరికాకు వెళ్లారు. గుండెల నిండా ఆత్మవిశ్వాసంతో అగ్రరాజ్యానికి వెళ్లిన శ్యామలా.. బర్కెలీలోని కాలిఫోర్నియా విశ్వవిద్యాలయంలో చేరారు. 1964లో పీహెచ్డీ పూర్తిచేసి క్యాన్సర్ పరిశోధకురాలిగా ఉగ్యోగంలో స్థిరపడ్డారు. అక్కడికి వెళ్లిన నాలుగేళ్ల తర్వాత(1962లో) వర్సిటీలో జరిగిన నల్లజాతి విద్యార్థుల సమావేశంలో ఒక సహ విద్యార్థి ఇచ్చిన ప్రసంగానికి శ్యామల ముగ్ధులయ్యారు. ఆ జమైకా విద్యార్థి పేరు.. డొనాల్డ్ జె.హ్యారిస్. ఈ సమావేశం వేదికగా ఇద్దరి మధ్య ఏర్పడిన పరిచయం ప్రేమగా మారి, పెళ్లి చేసుకున్నారు. వివాహం అనంతరం ఆయన స్టాన్ఫర్డ్ విశ్వవిద్యాలయంలో ఆర్థికశాస్త్రం ప్రొఫెసర్గా ఎదిగారు. ఆ దంపతులకు కమల, మాయ జన్మించారు. కమల ఏడో ఏట ఉన్నప్పుడే తల్లిదండ్రులు విడిపోయారు. శ్యామల 2009లో పెద్దపేగు కేన్సర్తో కన్నుమూశారు. ఇటీవల ఓ ప్రచార కార్యక్రమంలో కమల మాట్లాడుతూ..‘నన్ను, చెల్లెల్ని అమ్మ అప్పుడప్పుడు తమిళనాడుకు తీసుకెళ్లేది. ఆమె చేసిన ఇడ్లీల రుచిని ఎప్పటికీ మరిచిపోలేను’ అని చెబుతూ ఉద్వేగానికి లోనయ్యారు. కాగా, కమలా హ్యారిస్ భర్త పేరు డగ్లస్ ఎమ్హాఫ్. ఆయన యూదు మతస్తుడు. వినోదరంగ కంపెనీలకు న్యాయ సలహాదారుగా సేవలు అందిస్తుంటారు.
By November 08, 2020 at 06:45AM
No comments