మా టీకా సైతం 95 శాతం ప్రభావవంతం.. ఒక్కో డోస్ రూ.740: గుడ్‌న్యూస్ చెప్పిన మరో సంస్థ

ప్రపంచాన్ని అతలాకుతలం చేస్తోన్న మహమ్మారి అంతం కోసం జరుగుతోన్న వ్యాక్సిన్ ప్రయోగాలు తుది దశకు చేరుకుంటున్నాయి. టీకా ఫలితాలు సానుకూలంగా ఉన్నట్టు ఇటీవల మోడెర్నా, ఫైజర్ నివేదికలు వెల్లడించాయి. తాజాగా మరో సంస్థ సైతం శుభవార్త అందించింది. తాము తయారుచేసిన స్పుత్నిక్-వీ టీకా 95 శాతం ప్రభావవంతంగా పనిచేస్తోందని రష్యా ప్రకటించింది. ఒక డోసు ధర అంతర్జాతీయ మార్కెట్‌లో 10 డాలర్లు(సుమారు రూ.740) లోపే ఉంటుందని.. ఈ టీకా రెండు డోసులుగా తీసుకోవాల్సి ఉంటుందని రష్యన్ డైరెక్టర్ ఇన్వెస్టిమెంట్ ఫండ్ హెడ్ కిరిల్ దిమిత్రోవ్ తెలిపారు. తొలి డోస్ తీసుకున్నవారిలో 42 రోజుల తర్వాత టీకా 95 శాతం ప్రభావంతంగా పనిచేస్తోందని వివరించారు. క్లినికల్ ట్రయల్స్2లో భాగంగా 22 వేల మంది వాలంటీర్లకు 42 రోజుల కిందట తొలి డోసు, 19 వేల మందికి 21 రోజుల కిందట రెండో డోసు ఇచ్చామని రెండో దశ క్లినికల్ ట్రయల్స్ మధ్యంతర ఫలితాలను గమలేయా నేషనల్‌ సెంటర్‌, ఆర్‌డీఐఎఫ్‌ సంయుక్తంగా వెల్లడించాయి. క్లినికల్ ట్రయల్స్‌లో ధ్రువీకరించిన 39 కేసులు, రెండు డోస్‌లు తీసుకున్న 18,794 మంది వాలంటీర్లలో స్పుత్నిక్- V 28 వ రోజు 91.4 శాతం, 42 వ రోజు 95 శాతంపైగా ప్రభావవంతంగా పనిచేస్తోందని తేలిందని ప్రకటించింది.ప్రపంచంలో అత్యంత సమర్థంగా పనిచేస్తున్న టీకా తమదేనని, మూడో దశ క్లినికల్ ట్రయల్స్‌లో 40 వేల మంది వాలంటీర్లు పాల్గొంటున్నారని పేర్కొన్నాయి. బెలారస్‌, యూఏఈ, వెనుజువెలాతో పాటు భారత్‌లోనూ ఫేజ్‌-3 ట్రయల్స్‌కు అనుమతి లభించినట్టు ఆర్‌డీఐఎఫ్‌ వెల్లడించింది. 2021 తొలి నాళ్లలోనే ప్రపంచవ్యాప్తంగా ఏటా 50 కోట్ల డోసుల ఉత్పత్తి ప్రారంభించేలా పలు దేశాలతో ఒప్పందాలు కుదిరినట్టు వివరించింది. ‘తాము తయారుచేసిన టీకా అధిక సామర్థ్యాన్ని ప్రదర్శించే డేటా, కొత్తరకం కరోనా వైరస్ మహమ్మారికి వ్యతిరేకంగా పోరాటంలో అతి ముఖ్యమైన సాధనాన్ని త్వరలో పొందుతామని ఆశిస్తున్నాం’ అని రష్యా ఆరోగ్య మంత్రి మిఖాయిల్ మురాష్కో వ్యాఖ్యానించారు. భారత్‌లో డాక్డర్‌ రెడ్డీస్‌ ల్యాబొరేటరీ ఆధ్వర్యంలో స్పుత్నిక్‌-వీ వ్యాక్సిన్ రెండో దశ క్లినికల్‌ ట్రయల్స్‌ ప్రారంభమైన విషయం తెలిసిందే. ఆగస్టులోనే ఈ వ్యాక్సిన్‌కు రష్యా ఆమోదం తెలపడంతో ప్రపంచంలోనే క్లినికల్ ఆమోదం పొందిన తొలి టీకాగా గుర్తింపు పొందింది. అమెరికా సంస్థలు ఫైజర్‌, మోడెర్నాలు సైతం తమ టీకాలు 95 శాతం ప్రభావవంతంగా పనిచేస్తున్నట్టు ఇప్పటికే ప్రకటించాయి. బ్రిటన్‌కు చెందిన ఆక్స్‌ఫర్డ్‌-అస్ట్రాజెనెకా.. తమ టీకా 70 శాతం ప్రభావవంతంగా పనిచేస్తోందని సోమవారం ప్రకటించింది.

By November 25, 2020 at 07:54AM

Read More https://telugu.samayam.com/latest-news/international-news/covid-19-vaccine-sputnik-v-95-effective-after-second-clinical-trial-interim-says-russian/articleshow/79400271.cms