మా టీకా 92 శాతం ప్రభావవంతం.. రష్యా ప్రకటన.. ఫైజర్‌కు పోటీగానే ప్రకటించిందా?
తాము అభివృద్ధి చేసిన టీకా 90 శాతం ప్రభావవంతంగా పనిచేస్తున్నట్టు అమెరికా ఫార్మా దిగ్గజం ఫైజర్ నాలుగు రోజుల కిందట ప్రకటించిన విషయం తెలిసిందే. తాజాగా, రష్యా సైతం తమ టీకా సమర్ధవంతంగా పనిచేస్తోందని ప్రకటించింది. కరోనా వైరస్‌ కట్టిడికి తాము రూపొందించిన ‘స్పుత్నిక్‌-వీ’ 92 శాతం ప్రభావవంతంగా పని చేస్తోందని ఆ దేశ ఆరోగ్య శాఖ వెల్లడించింది. ఈ మేరకు రష్యన్ డైరెక్ట్ ఇన్వెస్ట్‌మెంట్‌ ఫండ్ (ఆర్డీఐఎఫ్) బుధవారం ఓ ప్రకటనను విడుదల చేసింది. టీకా ప్లాసిబోలు వేసిన వాలంటీర్ల పరీక్షల మధ్యంతర నివేదికల ఆధారంగా ఈ వివరాలను తెలిపింది. అయితే, ఫైజర్ ప్రకటన విడుదలైన నాలుగు రోజులకే రష్యా ఈ ప్రకటన చేయడం ప్రాధాన్యత సంతరించుకుంది. ఈ టీకాను గమాలేయ పరిశోధన సంస్థ తయారు చేస్తోంది. ‘స్పుత్నిక్‌-వీ’ టీకాకు సంబంధించి ప్రస్తుతం బెలారస్‌, యూఏఈ, వెనెజువెలా, ఇతర దేశాలలో మూడో దశ ప్రయోగ పరీక్ష నిర్వహిస్తున్నారు. భారత్‌లో రెండు, మూడు దశల్లో ప్రయోగాలు జరుగుతున్నాయి. టీకాల ద్వారా మహమ్మారిని కట్టడి చేయవచ్చనే ఆలోచనను రష్యన్ డేటా ప్రోత్సహిస్తుందని, బలోపేతం చేస్తుందని నిపుణులు పేర్కొన్నారు. అయితే, టీకా తీసుకున్న కొద్ది మంది వాలంటీర్ల ఆధారంగా మాత్రమే ఫలితాలు వచ్చాయని హెచ్చరిస్తున్నారు. క్లినికల్ ట్రయల్స్‌లో కేవలం 20 మంది వాలంటీర్లకు మాత్రమే ప్లాసిబో ఇచ్చి, పరిశీలించారు. ఇది ఫైజర్ క్లినికల్ ట్రయల్స్ కంటే తక్కువ సంఖ్యే. మొత్తం 94 మంది ఫలితాలను ఫైజర్ ప్రకటించింది. ఫైజర్-బయోఎన్‌టెక్ మధ్యంతర ఫలితాలు వెల్లడించిన తర్వాత గురించి ఫలితాలను ప్రకటించడం వెనుక రాజకీయ ఒత్తిడి ఉందని తాను భావిస్తున్నానని మైనాన్ యూనివర్సిటీ వైరాలజీ ఇన్‌స్టిట్యూట్ డిప్యూటీ డైరెక్టర్ బోడో ప్లాచేటర్ అన్నారు. గణాంకాల విశ్లేషణకు ప్రాముఖ్యత లేదని అన్నారు. ఇదిలా ఉండగా.. తమ టీకా సమర్ధత రేటును నిర్ధారించడానికి ట్రయల్స్ కొనసాగుతాయని ఫైజర్ తెలిపింది. అటు, వ్యాక్సిన్ తయారు చేసిన రష్యన్ డైరెక్ట్ ఇన్వెస్టిమెంట్ ఫండ్ (ఆర్డీఐఎఫ్) ఆరు నెలల వరకు ప్రయోగాలు కొనసాగుతాయని ప్రకటించింది. మధ్యంతర ఫలితాలు టీకా సమర్ధతను తెలియజేస్తున్నాయని, రాబోయే వారాల్లో పెద్ద సంఖ్యలో వ్యాక్సినేషన్ ప్రారంభిస్తామని గమలేయా ఇన్‌స్టిట్యూట్ డైరెక్టర్ అలెగ్జాండర్ జింట్స్‌బర్గ్ అన్నారు.
By November 12, 2020 at 07:57AM
No comments