Breaking News

డిసెంబరు నాటికి దేశంలో 10 కోట్ల డోస్‌లు.. పంపిణీ కూడా అప్పుడే: సీరమ్ సీఈఓ


ప్రపంచంలో అత్యధికంగా వ్యాక్సిన్ ఉత్పత్తి చేసే సంస్థగా గుర్తింపు పొందిన పుణేలోని సీరమ్ ఇన్‌స్టిట్యూట్ ఆఫ్ ఇండియా ప్రస్తుతం ఆస్ట్రాజెన్‌కా-ఆక్స్‌ఫర్డ్ టీకా మూడో దశ ప్రయోగాలను భారత్‌లో నిర్వహిస్తోన్న విషయం తెలిసిందే. ఈ సంస్థ డిసెంబరు నాటికి 100 మిలియన్ డోస్‌ల ఉత్పత్తే లక్ష్యంగా పెట్టుకుంది. అలాగే డిసెంబరులోనే దేశవ్యాప్తంగా టీకా పంపిణీ కూడా చేయనుంది. ఈ మేరకు సీరమ్ సంస్థ సీఈఓ అదర్ పూనావాలా వెల్లడించారు. సమర్ధవంతంగా పనిచేస్తున్నట్టు తుది దశ క్లినికల్ ట్రయల్స్‌లో తేలితే కనీసం బిలియన్ డోస్‌లను ఉత్పత్తి చేయనున్నామని తెలిపారు. అత్యవసర వినియోగం కింద కేంద్రం నుంచి డిసెంబరులో అనుమతి వచ్చే అవకాశం ఉందని పేర్కొన్నారు. వచ్చే ఏడాది పూర్తిస్థాయి అనుమతి వచ్చిన తర్వాత ఉత్పత్తి చేసిన డోస్‌లలో దక్షిణాసియా దేశాలకు 50 శాతం, కొవాక్స్‌కు 50 శాతం కేటాయిస్తామని తెలిపారు. అల్పాదాయ దేశాలకు వ్యాక్సిన్‌ను అందజేయడానికి ప్రపంచ ఆరోగ్య సంస్థ (డబ్ల్యూహెచ్ఓ) కొవాక్స్ పేరుతో కూటమిని ఏర్పాటుచేసిన విషయం తెలిసిందే. ఇప్పటి వరకు ఐదు వ్యాక్సిన్ అభివృద్ధి సంస్థలతో డోస్‌ల కోసం సీరమ్ ఒప్పందాలు చేసుకుంది. గత రెండు నెలలు నుంచి 40 మిలియన్ల వరకు ఆస్ట్రాజెన్‌కా టీకా డోస్‌లను ఉత్పత్తి చేసింది. అలాగే, తర్వలోనే నొవావాక్స్ టీకా ఉత్పత్తి ప్రారంభించనుంది. మేము కొంచెం ఆందోళన చెందాం.. అది పెద్ద ప్రమాదం.. కానీ, ఆస్ట్రాజెన్‌కా, నోవావాక్స్ షాట్స్ ఉత్పత్తి బాగుందని పునావాలా వ్యాఖ్యానించారు. ఫ్రంట్‌లైన్ యోధులకు ఈ వ్యాక్సిన్ వల్ల ప్రయోజనం ఉంటుందని అన్నారు. అత్యవసర వినియోగం కింద యూకే ప్రభుత్వం నుంచి అనుమతి లభించిన తర్వాత వీలైంత తర్వగా డిసెంబరులో వ్యాక్సినేషన్ ప్రారంభించే అవకాశం ఉందని ఆస్ట్రాజెన్‌కా సీఈఓ పాస్కల్ సోరియట్ అన్నారు. యూకే అనుమతి ఇస్తే.. ఆ నివేదికను భారత ప్రభుత్వానికి అందజేయాలని సీరామ్ భావిస్తోంది. ఇక, ప్రపంచం మొత్తానికి వ్యాక్సిన్ అందజేయడానికి రెండేళ్లు పడుతుందని, 2024 నాటికి ఇది పూర్తవుతుందని పునావాలా పునరుద్ఘాటించారు. తొలుత కరోనాపై ముందుండి పోరాటం చేస్తున్న వైద్య, ఆరోగ్య సిబ్బందికి వ్యాక్సిన్ అందజేయాలనే ప్లాన్‌లో ఉన్నట్టు తెలిపారు. అయితే, దేశంలోని 1.3 బిలియన్ల జనాభాకు ఒకేసారి వ్యాక్సిన్ పంపిణీ పెద్ద సవాల్‌తో కూడుకున్నదని, ఆరోగ్య వ్యవస్థ అంతంత మాత్రంగా ఉండటమే దీనికి కారణమని అన్నారు.


By November 14, 2020 at 09:44AM


Read More https://telugu.samayam.com/latest-news/india-news/india-to-get-100-million-oxford-vaccine-shots-by-december-say-serum-ceo-adar-poonawalla/articleshow/79219440.cms

No comments