మా ప్రభుత్వాన్ని ఆర్మీ చీఫ్ కూల్చేశారు.. పాక్ మాజీ ప్రధాని సంచలన వ్యాఖ్యలు
సైన్యం రిగ్గింగ్‌కు పాల్పడటం వల్లే గెలిచారంటూ పాకిస్థాన్ మాజీ ప్రధాని ఇటీవల సంచలన ఆరోపణలు గుప్పించిన విషయం తెలిసిందే. తాజాగా, మరోసారి పాక్ సైన్యాధిపతి జనరల్ కమర్ జావేద్ బజ్వాపై షరీఫ్ తీవ్ర విమర్శలు గుప్పించారు. 2018 ఎన్నికల్లో ఇమ్రాన్ ఖాన్‌ను ప్రధాన మంత్రిని చేయడానికి తన ప్రభుత్వాన్ని పడగొట్టి, న్యాయవ్యవస్థపై ఒత్తిడి తీసుకొచ్చారని దుయ్యబట్టారు. ఇమ్రాన్ ఖాన్ ప్రభుత్వానికి వ్యతిరేకంగా ప్రతిపక్ష పార్టీలు చేపట్టిన దేశవ్యాప్త ఆందోళన పాక్ తూర్పు తీర నగరం గుజ్రాన్‌వాల్ నుంచి ప్రారంభమయ్యింది. ఈ సందర్భంగా లండన్ నుంచి వర్చువల్‌ వీడియో ద్వారా షరీఫ్ ప్రసంగించారు. వేలాది మంది హాజరైన ఈ సమావేశంలో మాజీ ప్రధాని మాట్లాడుతూ.. జనరల్ కమర్ జావేద్ బజ్వా బాగా పనిచేస్తున్న మా ప్రభుత్వాన్ని కూలదోసి, మీ కోరిక నేరవేర్చుకోడానికి దేశాన్ని బలిపీఠంపై ఉంచారని మండిపడ్డారు. అలాగే, తమ ప్రభుత్వాన్ని కూలదోయడంలో గూఢచారి సంస్థ ఇంటర్ సర్వీస్ ఇంటెలిజెన్స్ (ఐఎస్ఐ) కుట్ర కూడా ఉందని దుయ్యబట్టారు. ఇమ్రాన్ ప్రభుత్వంపై దేశవ్యాప్త పోరాటానికి పాకిస్థాన్‌లోని తొమ్మిది ప్రతిపక్ష పార్టీలు ఏకమయ్యాయి. పాకిస్థాన్ డెమోక్రాటిక్ మూవ్‌మెంట్ (పీడీపీ) పేరుతో కూటమిగా ఏర్పడి, గత నెలలో దేశవ్యాప్త ఆందోళనకు పిలుపునిచ్చాయి. నవాజ్ షరీఫ్‌కి చెందిన పాకిస్థాన్ ముస్లిమ్ లీగర్-నవాజ్ (పీఎంఎల్-ఎన్) ప్రధాన ప్రతిపక్ష పార్టీ. అక్రమాస్తుల కేసులో పాక్ సుప్రీంకోర్టు 2017లో దోషిగా నిర్దారించడంతో నవాజ్ ప్రధాని పదవికి రాజీనామా చేశారు. జైల్లో ఉన్న ఆయనకు గతేడాది నవంబరులో వైద్య చికిత్స కోసం లండన్ వెళ్లేందుకు కోర్టు అనుమతించింది. అయితే, అక్కడకు వెళ్లిన తర్వాత షరీఫ్ తిరిగి రాలేదు. పాక్ ప్రభుత్వ వ్యవహారాల్లో సైన్యం జోక్యం జగమెరిగిన సత్యం. అయితే, ఈ వ్యాఖ్యలను పాక్ సైన్యం ఖండించింది. దీనిపై వ్యాఖ్యానించడానికి మిలటరీ పబ్లిక్ రిలేషన్స్ వింగ్ నిరాకరించింది. నవాజ్ కుమార్తె మరియమ్, పాకిస్థాన్ పీపుల్స్ పార్టీ చీఫ్ మాజీ ప్రధాని బెనజీర్ భుట్టో తనయుడు బిలావల్ భుట్టో ఈ సమావేశంలో ప్రసంగించారు. ఇమ్రాన్ ఖాన్ ప్రభుత్వం దుర్మార్గపు పాలన సాగిస్తోందని, ఆర్ధిక వ్యవస్థను దుర్వినియోగం చేస్తోందని ఆరోపించారు.
By October 17, 2020 at 11:30AM
No comments