గ్రే లిస్ట్‌లోనే కొనసాగనున్న పాక్.. ఎఫ్ఏటీఎఫ్ అంచనాలు అందుకోవడంలో విఫలం
ఉగ్రవాదులకు స్వర్గంగా మారిన పాకిస్థాన్‌ను ఫైనాన్షియల్‌ యాక్షన్‌ టాస్క్‌ఫోర్స్‌ గ్రే లిస్ట్‌లో కొనసాగించే అవకాశం ఉన్నట్టు భారత్ భావిస్తోంది. మోస్ట్ వాంటెడ్ ఉగ్రవాదులు మౌలానా మసూద్ అజార్, హఫీజ్ సయీద్‌లపై ఎటువంటి చర్యలు తీసుకోకపోగా.. మొత్తం 4వేల మందికిపైగా ఉగ్రవాదులను రికార్డుల నుంచి పాక్ తప్పించిందని ప్రభుత్వ వర్గాలు అంటున్నాయి. షెడ్యూల్ 1వీ నుంచి మొత్తం 4 వేల మంది ఉగ్రవాదులు అదృశ్యమయ్యారు.. పాకిస్థాన్‌ను గ్రే లిస్ట్ నుంచి తప్పించే అవకాశం లేదు’ అని ఓ ఉన్నతాధికారి వ్యాఖ్యానించారు. ఎఫ్ఏటీఎఫ్ నిర్దేశించిన ఆరు అంశాలను నెరవేర్చడంలోనూ పాక్ విఫలమయ్యిందని ఆయన పేర్కొన్నారు. ‘ఉగ్రవాద సంస్థల నిధులకు అడ్డుకట్టవేయడానికి మొత్తం 27 పాయింట్లతో కూడిన కార్యాచరణను పాక్‌కు ఎఫ్ఏటీఎఫ్ సూచించింది.. వీటిలో ఇప్పటి వరకు 21 అంశాలను పాక్ నేరవేర్చినా కీలకమైన ఆరింటిని మాత్రం పూర్తిచేయలేకపోయింది’ అని తెలిపారు. ఇందులోని నామినేటెడ్ దేశాలైన అమెరికా, బ్రిటన్, ఫ్రాన్స్, జర్మనీలు కూడా పాక్ వ్యవహార శైలిపై అసంతృప్తిగా ఉన్నాయని, అఫ్గనిస్థాన్ సహా భారత్ విషయంలో ఆ దేశం వైఖరి పట్ల గుర్రుగా ఉన్నాయన్నారు. ఉగ్రవాదులపై పాక్ సరైన చర్యలు తీసుకోవడంలేదనే అభిప్రాయంతో ఉన్నట్టు పేర్కొన్నారు. తాజాగా ఎఫ్ఏటీఎఫ్ సమావేశం ఈ వారంలోనే విర్చువల్‌గా జరగనుంది. అక్టోబరు 21-23 వరకు మూడు రోజులు కొనసాగే సమావేశంలో ఉగ్రవాదం విషయంలో తీసుకుంటున్న చర్యలు సమీక్షించి, గ్రే లిస్ట్‌లోనే కొనసాగించనుందని అన్నారు. ఉగ్రవాదులకు నిధులను అడ్డుకోవడంలో పాక్ ఘోరంగా విఫలమయ్యిందని ఆయన అన్నారు. ‘లష్కరే తొయిబా, జైషే మొహమూద్ వంటి ఉగ్రవాద సంస్థలకు నిధుల రాకను అడ్డుకోవడంలో విఫలమైనట్లు భావించిన ఎఫ్ఏటీఎఫ్.. పాక్‌ను గ్రేలిస్టులో కొనసాగించనుంది’ అని ఆ అధికారి వ్యాఖ్యానించారు. అసలే పీకల్లోతు ఆర్థిక కష్టాల్లో కూరుకుపోయిన పాకిస్థాన్‌కు ఎఫ్ఏటీఎఫ్ గ్రే లిస్ట్‌లో కొనసాగిస్తే మరిన్ని కష్టాలు తప్పవు. పాక్‌కు అంతర్జాతీయ ద్రవ్యనిధి, ప్రపంచ బ్యాంక్‌, ఆసియా డెవలప్‌మెంట్‌ బ్యాంక్‌, యూరోపియన్‌ యూనియన్‌ బ్యాంక్‌ల నుంచి అంత సులువుగా రుణాలు లభించే పరిస్థితి ఉండదు. ఇది ఆ దేశ ఆర్థిక వ్యవస్థకు శరాఘాతంగా మారనుంది.
By October 19, 2020 at 11:17AM
No comments